1 Muma keyi ku manki kyakyawu de e ma tun dege pari, de mu zi, nsude mu geni ni ndani amu, nsude mu kone nja mu kpa ni nani amu woto e shiya ma kelima ni leyi. 2 Leyi mu Mirikisi pelesa mu nshi; mu geni yi mu beyi sheeda a kiya e yi, nja mu gye ku nkye leyi ni dindindin ema nja Adaa nja e nana kiya e yi ba mu. 3 Mua gye ku mbode mu geni nja mbode mu zi, de oku ma ku yi zumunshi nja mu. Zumunshi amu nja Adaa nja Yaa e yi, Yesu Kiristi. 4 Mu rubuta ku takada mu de peri siki mu e sika.

5 Osu na ma manki de mu zi dege anya Yesu na mua gye ku nkye: Mirikisi ma asikye la; a siki yi dopuwa ma ko piri ba. 6 Nde mu nkye mu mayi zumunshi nja Mirikisi, sede nde ari kuzukam mua yi tepiya a siki dopuwa, mu mayi yaruwa la gaskye ma a siki amu ba. 7 Sede nde mua yi tepiya a siki asikye, yiride eshi ema asikye, mua yi zumunshi nja nkiya mu, zini Yesu, Yaa Mirikisi, wonkye mu dege siki guru lepi.

8 Sede nde mu nkye mu mani lepi ba, mu ma shishirigye nkiya mu na gaskye ma a siki amu ba. 9 Sede nde mu pala lepi amu, Mirikisi ma nsu aminshi la yaa yape lepi amu nja yaa wonkye guru rishi gangasi amu. 10 Nde mu nkye mu man lepi ba, mu nkye Mirikisi ma nsu yaruwa naka nja kelima yi mani anya zunwa a siki dishiya amu ba.