1 Oku nsu oboki na, kede ku beigaskye nja kowoni aworo, sede ku gwada kowoni aworo de ku geni ko e ma ni Mirikisi la, sobon anebi nsu yaruwa nyowa su butu yuru anya guru a siki durinya. 2 Yomu na kwa shina Aworo ni Mirikisi: Du aworo de e yeda nkye Yesu Kiristi zo a siki nki naba e ma dege anya Mirikisi naba, 3 Sede aworo de yeda nkye Yesu zo dege anya Mirikisi na ba. E shiya e ma aworo ni oboki geba Yesu, de kwa zi nkye yaa zo ko kuzukam e ma a durinya.

4 Oku, yaya dende, ku butu anya Mirikisi la nja ku shakiya su, sobon Aworo Mirikisi de e ma a siki dishiya ku e pi daa de ma a siki durinya. 5 Su mani durinya la sobon yomu, durinya sua zi su. 6 Sede omu mu mani Mirikisi la, du nsude shina Mirikisi yaa zi mu; sede nsude mani Mirikisi ba yaa zi mu ba. Yomu na mua shina aworo ni gaskye nja aworo ni yaruwa.

7 Oku oboki na, mu so nkiya mu, so e butu anya Mirikisi la. Nsude mani so a dishiya e yi yapu yi mani Mirikisi la e kwa shina Mirikisi. 8 Du nsude mani so a dishiya e yi ba e shina Mirikisi ba, sobon Mirikisi e ma so la. 9 Yomu na Mirikisi nana so e yi a sisika amu: E saka Yaa yi ndandaa zo a siki durinya de mu samu leyi anya e yi. 10 Yomu na so ni gaskye ma: ba omu na mu so Mirikisi ba, sede Mirikisi la so mu e saka Yaa e yi zo ma sedeka ni yape lepi mu. 11 Oku nsu oboki na, tunde Mirikisi yaa so mu, omu ma du mu so nkiya mu. 12 Ba nseda de e taba geni Mirikisi ba; sede nde mua so nkiya mu, Mirikisi ma a siki amu nja so e yi sika a siki amu.

13 Mu shina nkye mu ma a siki yi nja e shi e ma a siki amu, sobon Mirikisi e ba mu Aworo yi 14 Nja mu geni mu sheeda nkye Adaa saka Yaa yi de zo ma nsude yaa sila ni durinya. 15 Du nsude yeda nkye Yesu ma Yaa Mirikisi la, Mirikisi yaa zunwa a siki dishiyeyi e shi ma du e ma a siki Mirikisi. 16 Yomu na mu shina mu kwa beyi gaskye a kiya so de Mirikisi ma nshi sobon mu.

Mirikisi e ma so la. Du nsude man so e ma a siki Mirikisi, nja Mirikisi ma a siki yi. 17 A turiki nsum na, so sika a siki mu ari mua mani sori dishiya a nana ni shiriya, sobon a siki durinya mu mua ma yiride e ma. 18 Ba womba a siki so. Sede so ni gaskye yaa butu womba, sobon womba e ma poro la. Nsude yaa zi womba e mani so ni gaskye ba.

19 Mua yi so sobon Mirikisi para so mu, 20 Nde nsude nkye, <<Mma so Mirikisi,>> Se yaa yi geba nja yayiwa e yi, e ma nsu yaruwa na. Du nsude yaa so yayiwa e yi, de yaa geni ba, yaya yaa so Mirikisi, de e taba geni ba, 21 Kiristi ba mu doka nkye: Du nsude yaa so Mirikisi dole na yaa so yayiwa e yi du.