1 Ku kone yiri totolo so de Adaa ma nshi nyowa a kiya amu, ari de sa sua sukwa mu yaya Mirikisi! Yomu na mu kwa ma! Delili de durinya shina mu ba sobon su shina Adaa ba. 2 Oku nsu oboki na de mma so, kuzukam mu ma yaya Mirikisi, mbode mua ma ta a geba su tuku bure mu nshi wo ba. Sede mu shina nkye kwanki de Kiristi te zo, mua ma kankye e shi, sobon mua geni yi yiri de e ma. 3 Guru nsu de mani sa dishiya mu anya Kiristi yaa wonkye kiya yi ma nsu seki, yiride eshi ema nsuseki.

4 Guru nsu de yi lepi e watala doka ni Mirikisi naka; gaskye, lepi e shiya ma rishi biya doka. 5 Sede ku shina nkye e zo de e la lepi mu. A siki Yesu lepi ma ba. 6 Ba nsude zunwa a siki Kiristi de yaa sigeba ni yi lepi. Du nsude sigeba ni yi lepi e taba shina Yesu ko e geni yi ba.

7 Oku yaya na, kede ku yeda de nseda shishirigye ku. Nsude yi mbode ma gangasi e shiya ma nse gangasi nse, kankye yiride Kiristi ma nse gangasi. 8 Du nsude sigeba ni yi lepi e ma ni obiri la, sobon obiri e ma nsu yi lepi na tun dege pari. Delili de Yaa ni Mirikisi zo e shiya ma de e zo juru ANKI ni obiri. 9 Ba nsude e ma yapu ni Mirikisi de yaa sigeba ni yi lepi, sobon yiri ni Mirikisi ma a siki yi; yaa sigeba ni yi lepi ba, sobon e ma yapu ni Mirikisi. 10 Yomuna mua shina worede su ma yaya ni Mirikisi nja worede su ma yaya ni obiri: Du nsude e yi mbode ma kyakya ba e ma yaa ni Mirikisi na ba; ko nsude yaa so yayuwa e yi ba.

11 Nsum na e ma manki de ku zi dege pari: Mu so nkiya mu. 12 Kede ku ma kankye Kayinu, nsude e mani dishiya ni obiri ari e kisa yayiwa yi. Mina sa e kisa yayiwa yi? sobon mbode yaa yi e mani obiri, ni yayiwa yi ema gangasi. 13 Kede ema ku mbo mamanki, yayuwa naa, nde ntani durinya ki ku. 14 Mu shina nkye mu bise dege muntu te man leyi, sobon mu so yayuwa amu. Du nsude so ma a siki yi ba e ma mumuntu nse la. 15 Du nsude yaa yi geba nja yayiwa yi e ma nsu kisa nse la, ku shina nkye nsude kisa nse yaa man leyi ni dindindin ba.

16 Yomuna mu shina yiride so e ma: Yesu Kiristi beyi leyi yi sobon mu. Omu ma e ma dole na mu beyi leyi mu sobon yayuwa amu. 17 Nde nsedaa ku mani mbo nani nde e geni yayiwa e yi ma siki ngala, sede e zi toseyi e yi ba, yaya na so ni Mirikisi yaa ma a siki yi? 18 Oku yaya na de mma so, kede so mu e ma ni kelima nja ni baki kin ba sede ni ANKI nja gaskye.

19 Yomuna mua shina nkye mu ma ni gaskye, nja mu sori dishiya mu man pushe a geba Mirikisi 20 Nde dishiya amu ba mu lepi, girima ni Mirikisi pi mbode ma a dishiya amu, e kuma shina guru.

21 Oku oboki na, nde dishiya amu ba mu lepi ba, mu man sori dishiya a geba ni Mirikisi. 22 Mua keleba a anya e yi guru mbode mu ologba yi sobon mu biya doka yi nja mua yi mbode jima yi.

23 Nsum na e ma doka yi: Mu beigaskye nja seni Yaa e yi Yesu Kiristi, nja mu so nkimu, iride Kiristi gye mu. 24 Worede su biya doka ni Mirikisi sua zunwa a siki e yi Mirikisi kuma a siki su . Yomuna mu shina nkye e zunwa a siki mu: Mu shina sobon ni Aworo de e ba mu.