1 Yayuwa na, mua so de mu gye ku beta a kiya ni kuma zo ni Obagizi mu Yesu Kiristi nja tala amu de mu gomu nja e shi, mua ologba ku yayuwa, 2 Kede dishiya ku e dege a kiya worosu su mbo mamanki, ko takada de e ma kankye e butu anya mu na, de yaa pala nkye nana ni Obagizi rigye zo wo. 3 Kede ku yeda de nseda e shirigye ku a kowoni turiki, sobon a nana ni Obagizi yaa zo ba se ntani su yi gabo tuku seleki gabo mere biya doka yaa pelesa, nseminji mu Mirikisi yaa alaka e yi 4 nsu gabo mu yaa yi geba nja Mirikisi yaa kuma ba kiya yi girima a kiya guru mbode sua sukwa Mirikisi ko bowuta e yi, ari yaa zunwa a laki lepa ni Mirikisi, yaa la kiya yi kankye e ma Mirikisi la.

5 Ku turunwa kwanki de ni ma nja ku ni gye ku mbo worosu mu bo? 6 Se kuzukam ku shina mbode yaa nana e yi zo, sobon de e pelesa a kwanki de e ma kyakya. 7 Sobon sori de mungu nse mu ma nshi a boyi e rigye ma a siki ANKI a durinya; sede Mirikisi de yaa nani yi kuzukam yaa sigeba ni nani yi ari nana de Mirikisi yaa la yi bila turuki. 8 Se nsu gabo mu yaa pelesa, nsude Obagizi Yesu yaa kisa e yi ni aminshi baki e yi nja yaa bebeta e yi ni girima nana de yaa zo. 9 Sua shina zo ni gabo mu te anya shiri anki ni mungu nse de yaa zo yi guru yiri mbo mamanki yaruwa, nja totolo alama nja yiko e yi, 10 A siki guru turuki ni mungu de e shirigye worede su ma turuki bebeta. Sua bebeta sobon su ki biya gaskye de su samu sila. 11 Sobon yomu Mirikisi yaa yiri su mungu shishirigye de su yeda ni yaruwa. 12 Sobon Mirikisi yaa poro guru worede su ki yeda ni gaskye sede sua zi dadi yi mungu mbo.

13 Sede e ma dole na mu gbede Mirikisi sobon ku, yayuwa de Obagizi yaa so ku, sobon butu a pari Mirikisi zabi ku de ku sila te anya anki Aworo nsuseki nja yeda ku ni gaskye. 14 Mirikisi sukwa ku te anya nabari kyakyawu de mu ba ku, de ku samu girima ni Obagizi mu Yesu Kiristi. 15 Sobon yomu, yayuwa, ku sakisi nsori de ku keyi gaskye de mu kokoyi ku, ko kelima beta baki ko rubutu a takada. 16 Bila de Obagizi mu Yesu Kiristi nkiyeyi nja Mirikisi Adaamu, de yaa so mu a siki aniyeri e yi e ba mu sori guyam nja kyakyawu sa dishiya, 17 Mirikisi e ba ku sori dishiya de ku sakisi nsori a kiya guru mbo kyakyawu nja kelima beta e yi.