1 A karishe, yayuwa, ku yi mu lepa de manki ni Obagizi e sigeba soseyi nja de e samu girima, yiride e samu a siki aku. 2 Ku yi mu lepa de Mirikisi butu mu a nani mungu ntani sobon guru ntani na su beigaskye ba. 3 Sede Obagizi e ma nsu aminshi na, yaa ja ku sori guyam yaa tengele ku dege obiri. 4 Mu aminshe ni Obagizi nkye ku mayi mbode mu gye ku nkye ku yi kuma kwa sigeba ni yi su. 5 Obagizi e biya ni dishiya ku a siki so ni Mirikisi nja takuwa ni kiristi.

6 Yayuwa, a siki seni Obagizi mu Yesu Kiristi, mwa ba ku doka, ku butu turiki yayuwa de su mayi zunwa okyabo nja worede su ma biya mbode ku kokoyi anya mu ba. 7 Sobon oku nkiya ku ku shina nkye e kamata de ku yi yiri mbode mwa yi. Mwa yi zunwa okyabo ba kwanki de mu ma nja ku. 8 Mu si mbosi nseda mu ki biya gyolo ba. Sede mu sha Genbeki; mu yi ANKI ndederi ni nana de kede mu ja nseda loni ba. 9 Mu yi yomu, ba nkye sobon mu mani sori bila sua nto anya ku na ba, sede mwa bila de muma mbo kokoyi anya ku. 10 Ko kwanki de mu ma nja ku, mu ba ku doka nkye, <<Nsude yi ANKI ba, yaa si mbosi ba.>>

11 Mu zi nkye worosu su a siki aku su mayi zunwa okyabo su mayi mbodaa ba se yuru a beta ntani kurum. 12 Yiri ntani worosu mu mwa ologba su a siki Obagizi Yesu Kiristi de su sakisi yi ANKI de su samu mbode sua si. 13 Sede oku, yayuwa, kede ku geji a kiya yi mbo kyakyawu ba.

14 Nde nseda a siki aku ki biya doka de ma a siki takada mu, ku kula ni yiri ntani worosu mu. Kede ku yi zunwa nja su, ari de su zi kumnya. 15 Sede kede ku la su ma oboki geba ku, sede ku yi su beta kankye yayuwa.

16 Kuzukam bila de Obagizi selema, e ba ku selema a siki guru kwanki nja kowon turuki. Obagizi e ma nja ku guru.

17 E ni Bulusu, ni rubuta gesuwa mu nnani na, da mu nama sheeda de ma a siki guru takada na. Yomu na Ni ma rubuta.

18 Aniyeri ni Obagizi mu Yesu Kiristi e ma nja ku guru. E ma yomu