1 Manki butu anya Bulusu yamanki ni Kiristi Yesu, te anya doka Mirikisi nsu sila mu nja Yesu Kiristi de mu sadishiya nja shi, 2 Manki te anya ni Timoti yaa na ni gaskye:

Aniyeri, toseyi nja selema dege Mirikisi Adaa nja Kiristi Yesu Obagizi mu e ma nja mu.

3 Nta yiride Ni ologba ke de ki sakisi Apisa de Ni te a kesa Makidoniya, de ki gye ntani kede su kokoyi doka daa ni yaruwa ba. 4 Kede su beyi nkiya su ba kokongye nja kiriga seni nsu adaatolo su. yiri da mu yaa zo ni bebele baki a sisika su, e kamata de su la ANKI Mirikisi de mani beigaskye. 5 Delili ni doka mu e shiya ma so de butu dege siki dishiya sere nja kyakyawu tunani de nana nkye mu mani lepi ba nja beigaskye ni aniyi. 6 Worosu su ntani su tari bila turiki su juyi biya mumungu beta. 7 Sua bila de su ma male ni doka Musa, sede su shina mina sua yi beta a kiya e yi ba ko mina sua sakisi nsori nkye su mani tebeshi a kiya beta asu.

8 Mu shina nkye doka Mirikisi e mani kyawu nde ntani biya yi yiride e ma. 9 Mu kwa shina nkye doka su yi sobon ntani gangasi na ba, sede ntani de sua watala doka, nja worede su ma ni Mirikisi, nja worede sua biya beta Mirikisi ba, nja nsu lepi, nja worede mani seki ba nja worede mani adini ba; nja worede su kisa adaa ko amaa asu, nja nsu kisa ntani, 10 nja nsu kwana nja mata ko menza ntani, nja menza de sua kwana nja menza ko mata de sua kwana nja mata, ko nsu la nsebeki see nja nsu yaruwa, nja nsu beyi sheeda yaruwa, nja guru mbode yaa yi geba ni beta Mirikisi de su kokoyi, 11 kokoyi gaskye ni e ma a kiya nabari kyakyawu nsu dereja ni Mirikisi nsu anabirika , de e ba ni de ni beyi manki e yi.

12 Ni gbede Kiristi Yesu Obagizi mu, e shi de ba ni sori, e yeda ni de ni ma nsu aminshi, Mirikisi zabi ni de ni yi ankie yi. 13 Kode nkye daa Ni ma nsu saba Mirikisi la, nsu takaasi, ni ma nsu dege ankeli ntani, sede Mirikisi yi ni aniyeri sobon Ni shina mbode Na yi ba nja ni beigaskye ba. 14 Mirikisi ba ni aniyeri ni Obagizi amu nyowa, nja beigaskye nja so de ma a siki Kiristi Yesu.

15 Ku zi beta de e ma gaskye ku yeda: Kiristi Yesu zo a siki durinya de sila nsu lepi, de a siki su guru e ni Bulusu ni pi su lepi. 16 Sede sobon ni delili mu Mirikisi yi aniyeri e ni Bulusu, de Ni pi lepi, Kiristi Yesu nana yowa kadishiya e yi de sani ni ma mbo kokoyi ba worede sua biya yi de su samu leyi ni gbogbo. E ma yomu. 17 Kuzukam girima, ni yobo e ma ni dindindi ba seleki nsu leyi, de yaa muntu ba, nja nsude sua geni yi ba, Mirikisi e shi de ma gbogbo. E ma yomu.

18 Timoti yaa na, Ni ba ke doka mu de ma aminshi de anebi yi a kiya ke, sobon nde ki biya doka mu ka yi yanki kyakyawu, 19 Ki keyi beigaskye ke kyakyawu ni tunani de kede ki yi lepi ba. Worosu su ki mbo mu se beigaskye asu puari wokye kankye kwanto. 20 A siki su Himeniyus nja Alezanda, Ni musi su de su pauri nani ni obiri de ba su Genbeki kede su sakye yi beta saba Mirikisi ba.