1 Guru worede ma a siki bowuta ni bunwa su turunwa ni nsugizi asu de su beyi girima, sobon de seni Mirikisi nja kokoyi mu yaama wopi ba. 2 Kede bunwa de nsugizi asu ma nsubiya Yesu su ki ba su girima ba sobon su ma yayuwa na, de e kamata su bowuta su soseyi sobon su ma yayuwa la, sobon worede de su ma nsu si moriya su ma nsubiya Yesu de sua so.

Da mu e shina ma mbode kwa kokoyi su nja ologba de su yi. 3 Nde nseda kokoyi ku mbodaa mbom de ma kyakya ni kelima Obagizi mu Yesu Kiristi ba nja kokoyi de yaa sa ntani jima Mirikisi ba, 4 Yiri ntani worosu mu sua dege dolo nkye su shina sede su shina mbo daa ba. Su mani ali musu nja rikishi a kiya kelima de yaa sa. Kishi, nja anwashi, nja beta seni ntani, nja mungu tunani a kiya ntani, 5 nja yowa ni musu a sisika worede dishiya su muntu, sua pala gaskye ba tunani su ma kankye biya Mirikisi ma turiki ni samu mbo nani la.

6 Sede ali Mirikisi nja dedeta ni mbode mu manshi e ma totolo nani wuta la. 7 Sobon ku shina nkye mu zo mbodaa a durinya mu ba, yomuna mua bila durinya mu ba mbodaa ba. 8 Sede nde mu mani mbosi nja keikei sa nki, e gbegila mu. 9 Ntani de sua bila de su mani mbo nani nyowa sua puari a siki gwada nja toroko ni mungu memeri yiri yiri de yaa bebeta su nja so gyolo de pi sori su yaa keyi su beki siki nja alaka. 10 Sobon yowa so gyolo e ma turiki ni kowoni yiri mumungu mbo. Worosu su ntani, sobon memeri de su mani gyolo seberi, su bila beigaskye se su sa nkisu beki siki nja yowa Genbeki.

11 Sede e ke Timoti, nse ni Mirikisi, ki yi gudu dege guru mbo mu, ki biya turiki gangasi ni Mirikisi, ki mani ali Mirikisi, beigaskye, so, ki kadishiya nja ki man dishiya din. 12 Ki yi topula, topula kyakyawu de ki keyi beigaskye ake. Ki keyi leyi ni dindindin de Yesu sukwa ke a kiya e yi, de ki pala gangasi ni yeda kyakyawu a geba ntani nyowa. 13 Mma ologba ke a geba Mirikisi, de beyi leyi ba guru mbo, nja Kiristi Yesu, de beyi sheeda kyakyawu a geba Buntu Bilatu, 14 ki biya doka mu, kede ki ma mbo basi nja lepi ari nana de Obagizi mu Yesu Kiristi yaa zo, 15 pelesa Yesu mu Mirikisi yaa sa e paru a kyakya kwanki, Mirikisi nsu anabirika nja Nsu solota, Seleki ni nsu seleki nja Obagizi nsu obagizi, 16 E shi ndandaa yi de yaa muntu ba, yaa zunwa a siki asikye de nseda yaa zo kusa nshi ba, de nseda yaa geni ko e kone ba. Girima ni yobo e ma nja e shi gbogbo. E ma yomu.

17 Ki gila nsu mbo nani ni durinya mu. Kede su dege dolo nja mbo nani de su manshi ko su sa dishiya su a kiya keikei durinya mu de e ma yaa. Sede su sa dishiya nja Mirikisi e shi de yaa ba mu guru mbo sobon zi dadi amu. 18 Ki gila su de su yi mbo kyakyawu, su mani mbo nani te anya yi ali kyakyawu, su ma nsu beyi ni dishiya daa, su man memeri ni sua worosu su nto. 19 Anya yi yomu la sua tala mbo nani su de yaa ma a turiki sigeba a kwanki nsu zo, sobon de su mani leyi de ma gaskye ni leyi. 20 Timoti, kpanku ni mbode su ba ke a nani ke. Ki butu kiya ke bila mungu beta de mani womba Mirikisi ba, de kede ki yi musu nja worede su meyi geba nshi ba, worede sua la turiki su kankye e mani shina, 21 te anya kokoyi mu na worosu su su juyi bila turiki beigaskye.

Aniyeri Mirikisi e ma nja ku. E ma yomu.