1 Manki butu anya Bulusu, yaamanki Yesu Kiristi ni yeda Mirikisi, de ni pala gye ntani anikowori leyi de Mirikisi yi worede ma a siki Yesu Kiristi,

2 Ni ma rubuta te nja ke Timoti, de ma kankye yaa na de mma so:

Aniyeri, ni toseyi nja selema dege Adaa mu Mirikisi nja Yesu Kiristi Obagizi mu.

3 Ni ma gbede Mirikisi, de Ni ma bowuta yi, yiride nsu adaatolo na su bowuta yi, ni dishiya kyakyawu, ndederi nja nnana a kowon kwanki Ni ma turunwa ke a siki lepa na. 4 Nde Ni turunwa ni anwe de butu a ndani ke, kwanki de mu robu nja ke, na so de ngen ke de perisiki na e sika. 5 Ni kuma turunwa ni beigaskye ke a siki Yesu Kiristi, de ema a siki amaa ni amaa ke Loyis nja amaa ke Apiniki, Ni shina e ke ma ki beigaskye nshi. 6 Sobon yomu Ni ma turunwa ke de ki kula kyawuta de Mirikisi ba ke, a kwanki de Ni jaa ke nani anabirika a kiya. 7 Aworo de Mirikisi ba mu ema ni womba aba, sede e ba mu Aworo ni sori dishiya, nja ni so nja ni ka kiya.

8 Sobon yomu kede ki zi kumnya ni pala gye ntani manki Obagizi mu, ko ki yi kumnya na de ni ma yaa jaru sobon Yesu Kiristi ba. Sede ki gama kiya nja ni a siki Genbeki ni manki kyakyawu mu, a siki sori Mirikisi. 9 Yesu sila mu e kwa sukwa mu de muma nsuseki, ba sobon mbo kyakyawu de mu yi naba sede sobon nupi yi nja aniyeri yi la. Aniyeri mu su ba mu a siki ni Yesu Kiristi tun kapi Mirikisi yi durinya, 10 Sede kuzukam Mirikisi pelesa mu nshi te anya ni zo ni nsu Sila mu, Yesu Kiristi, de e bebeta sori ni muntu akyiyamu e kwa nana mu asikye leyi nja leyi de ema ya kuma ba te anya zi manki kyakyawu mu. 11 Sobon yomu anabari kyakyawu mu la Mirikisi zabi Ni e sani ni ma nsu keyi manki nja yaamanki nja male nsu kokoyi ntani beta Mirikisi. 12 Da mu nama mbode sa Ni ma Genbeki. Nzun yomu Ni ma yi kumnya de Ni ma yaa jaru ba, sobon Ni shina nsude ni beigaskye nja shi, yomu la kuma ni shina Mirikisi yaa kula ni mbode ni sa dishiya a nana ni.

13 Ki keyi Mbode ni kokoyi ke soseyi, e kuma ma ke mbo kokoyi, de eke ma ki kokoyi ntani mbode ki beigaskye nshi, a siki beigaskye nja so a siki Yesu Kiristi. 14 Ki kpanku kokoyi ni gaskye de Mirikisi ba ke, te anya ni sua nto ni Aworo nsuseki de e zunwa asikimu.

15 Ki shina nkye guru ntani kesa Asiya su juyi beyi ba ni, nzun Paijelus nja Hamojenisi.

16 Sede Ni mayi lepa te nja Mirikisi de e nana aniyeri yi te nja zuriya gizi ni Onesiporus, sobon a kowon kwanki e ma ja ni sori guyam e kuma zi kumnya de ni ma yaa jaru ba. 17 Yomu la, guru kwanki de Onesiporus zo a kesa Roma, e bila ni soseyi ari e geni. 18 Ni mayi lepa de Onesiporus e samu aniyeri ni Mirikisi a nana de Mirikisi ya yi ntani shiriya! Eke ma ki shina yiride Onesiporus sua ni nto a kesa ni Apisa.