1 Sede Timoti mma so ki shina mbo mu a dishiya ke: Ntani sua Genbeki a kwanki karishe. 2 Ntani sua ma nsu so kiya asu, nsu so gyolo, nsu dege dolo, nsu dege kiya, nsu basi kyakyaka, worede sua zi beta nsu adaasu ba, sua ma ntani de sua gbede worede sua su nto ba, worede su ma so yi mbo kyakyawu ba, 3 Ntani de su ma so yayuwa su ba, nsu keyi yayuwa su a dishiya, nsu pala yaruwa de su bebeta yayuwa ANKI, ntani de su ma ka kiya asu ba, ntani de su ma nsu zapi leyi nja yayuwa su, nsu ki mbode e ma kyakyawu, 4 ntani sua ma nsu butu yayuwa su a beyi, nsu lesa ankeli, nsu dege kiya, nsu so jima kiya su pi de sua jima Mirikisi, 5 su mani alama ni nsubiya Yesu sede a siki dishiya su su ki sori Mirikisi. Kede ki zunwa nja yiri ntani mu.

6 A siki yiri ntani mu worosu su asu su ma bila turiki de sua yuru a gizi ntani de su ja mata mere wayo, de mungu mbo rigye sika dishiya su nja worede memeri ni mungu mbo yiri yiri la ankeli su, 7 yiri mata mu a kowon kwanki su ma so su kokoyi sabuwa mbo sede su gane gaskye manki Mirikisi ba. 8 Kankye yiride Yanisu nja Yanberesu su yi geba nja Musa, yomuna ntani mu su ma yi geba nja gaskye beta Mirikisi, dishiya su rikishe su shina mbode su ma yi ba, beigaskyesu e ma wopi la. 9 Sede sua te nyisa ba, sobon ntani sua shina nsu seseberi kankye yiride ntani shina nsu Yanisu nja Yanberesu.

10 Sede e ke, Timoti, ki rigye shina mbode ni kokoyi guru, ni yiri zunwa na de ni yi, nja mbode ni ma so de ni yi, ki beigaskye yiride eni ma ni beigaskye, ki ma ni kadishiya kankye yiride ni mani kadishiya, ki ma nsu so ntani kankye yiride eni ma ni so ntani, ki yi dishiya a siki Genbeki kankye yiride eni ma ni ka dishiya du, 11 ki shina ni takaasi, nja Genbeki yiri, yiri de ni geni a siki kesa Antakiya, nja Ikoniya nja Listira, takaasi de ni yi dishiya nsu. Nzun yomu Mirikisi sila ni butu dege siki su. 12 Gaskye na ni ma pala gye ku, guru nsude e ma so e yi zunwa de jima Mirikisi asiki Kiristi se e geni takaasi, 13 sede mungu ntani nja nsu shirigye ntani nja ali ni mungu sua jaja nyowa, sua shirigye ntani, osu nkiasu ma sua shirigye nkisu. 14 Sede e ke Timoti, ki sigeba ni beigaskye ni mbode ki kokoyi nja ki kwa shina ni gaskye kokoyi de ki yi, sobon ki shina worede su kokoyi ke, 15 Ki turunwa yiride tunde ki ma yaa dende ki rigye shina beta Mirikisi nsuseki, de sakye ki ma nsu simi sobon sila te anya beigaskye a siki Yesu Kiristi. 16 Guru beta Mirikisi e ma amusi Mirikisi la, de e sa a siki dishiya ntani de su rubuta e yi e mani kyawu anya ni kokoyi mu mbode e ma kyakyawu, kobe mu nde mu yi mbo mumungu, gyala mu a kwanki de mu yi mumungu mbo nja kokoyi mu mbo de ma gangasi, 17 sobon du nsu de e ma nsubiya Mirikisi dedeta de yaa yi guru mbode e man kyawu.