1 Sobon yomu, Timoti ki ma kankye yaa na la, ki yi sori dishiya a siki aniyeri de ema a siki Yesu Kiristi. 2 Guru kokoyi de ki zi dege anya na a geba ntani nyowa, yomuna eke ma du ki kokoyi worosu ntani nsu aminshi de osu ma su kokoyi worosu du. 3 Ki yi dishiya nja mu a siki Genbeki kankye kyakyawu shoja ni Yesu Kiristi. 4 Guru shoja de e ma a geba yanki yaa sa kiya e yi a siki mbodaa mbom gagaba, kokori e yi e shiya ma de e yi yanki kyakyawu de e jima tolense e yi. 5 Yomuna guru nsude yaa yi tatarigye ni gudu, yaa taba keleba lende ni shakiya ba se e biya doka ni tatarigye ni. 6 Nsu ANKI bikiya de sakisi yi ANKI bikiya e yi soseyi e shiya yaa para more mbosi bikiya. 7 Ki yi tunani a kiya mbode Ni ma pala gye ke, sobon Obagizi yaa ba ke shina a kiya su guru.

8 Ki turunwa ni Yesu Kiristi de dege a kumsha, e shi de ema juriya Dowuda. Da mu nama manki na, 9 sobon pala manki kyakyawu mu na ni ma Genbeki ari su domuna ni kankye nsu lepi. Sede su domuna kelima Mirikisi ba. 10 Sobon yomu la Ni yi dishiya a siki guru Genbeki de ni ma sha sobon worede Mirikisi zabi su, de osu ma du su samu sila de e ma a siki Yesu Kiristi, nja girima ni dindindin.

11 Beta mu e ma gaskye la de nkye:

Nde mu muntu nja Yesu a siki Genbeki,

mua kwa zunwa nja shi;

12 nde mu yi dishiya a siki Genbeki,

mua yi solota nja shi a bisi.

nde mu nkye mu shina Yesu ba,

Yesu ma yaa nkye e shi e shina mu ba;

13 nde muma nsu reshi aminshi la,

Yesu e ma nsu aminshi la,

sobon Yesu yaa taba ki nki yi ba.

14 Ki kuku turunwa su ni mbo worosu mu. Ki kuma gila su a geba Mirikisi a kiya ni bebele baki de su meyi a kiya ni worosu su kelima; e mani kyawu ba, sede yaa bebeta worede su ma zi na kin. 15 Ki yi guru kokori ke de Mirikisi e yi peri siki nja ke, Ki ma kankye nsu ANKI kyakyawu de e ma zi kumnya ANKI e yi ba de e ma kokoyi beta ni gaskye kyakya. 16 Kede ki yi zunwa nja ntani de su meyi beta kyaka de man kyawu a geba Mirikisi ba, sobon worede su meyi yiri beta ni su ma sa ntani meyi zunwa de yi kyawu a geba Mirikisi ba. 17 Beta su ema gyowe kankye okpoto de ema suku nama nki. A siki su ma Himeniyus nja Piletus, 18 worede su bila gaskye. Su nkye dege a kumsha rigye bise wo, su ma rikishe beigaskye worosu su ntani. 19 Sede worede su ma nsubiya Mirikisi ni gaskye su sakisi nsori, kankye kutiri gizi de Mirikisi kapa, Ema rubuta asiki beta Mirikisi nkye: <Obagizi shina worede su ma na yi,>> Yomuna <<Guru worede su nkye su ma ni Obagizi na su bila mumungu mbo.>>

20 A siki totolo gizi muman gongo zinari nja aziripa na kede ba, sede ni ntasi nja tuni kesa du ma a siki gizi ni; worosu anki su mani dereja worosu anki su mani dereja ba. 21 Guru nsude wonkye kiya yi dege mbo mumungu, yaama nsu ni dereja anya Nsugizi, e ma nsuseki, yaman shiri sobon kowoni kyakyawu ANKI.

22 Sobon yomu ki yi gudu dege memeri ni mungu mbo yaa sambari nja yaa mata, ki sigeba ni yi gangasi, ki beigaskye, ni so nja selema, nja worede sua sukwa seni Obagizi ni dishiya kyakyawu. 23 Kede ki yi zunwa nja ntani de su ma so su yi musu a kiya ni beta de man kiya ba, sobon e ke ma ki shina guru worede su meyi musu su ma karikye ni topula. 24 Sede nsude ema bunwa Obagizi e mayi topula ba. E kamata, e nana ali kyakyawu nja guru ntani, ema nsu kokoyi ntani beta Mirikisi, nja nsu kadishiya. 25 Worede sua yi geba nshi dole e sa su a kiya turiki ni kadishiya, ko Mirikisi yaa sa su juyi de su shina gaskye, 26 de su kuma zo a siki ankeli su kuma shuburi dege toroko obiri, de e sa su su ma bunwa de su yi mbode e ma so.