1 Timoti, Ni ma gye ke gaskye a geba Mirikisi nja Yesu Kiristi, de yi nsu leyi nja worede muntu shiriya, a nana de Yesu yaa zo yi solota: 2 Ki beyi manki kelima Mirikisi; ki man shiri kowon kwanki, ki ma kiya ntani, ki kobe su, nja ki ja ntani sori guyam, ni kadishiya nja kokoyi mbo kyakyawu. 3 Sobon kwanki yaa zo de ntani sua so de su zi kokoyi gaskye beta Mirikisi ba. Sede sobon su yi mbode dishiya su mma bila, sua bila male de sua kokoyi su mbode yaa jima kuni su de su ji. 4 Ntani sua ki zi gaskye beta Mirikisi sua pi bila de su zi Kokongye ni nsu adaatolo asu ni yaruwa. 5 Sede e ke Timoti, ki yi tunani soseyi a siki kowoni mbo, ki yi sori dishiya a siki Genbeki, ki yi ANKI ni nsu beyi doka beta Mirikisi, ki yi guru mbo a siki ANKI ke.

6 Sobon ni kusa de na muntu wo, muntu na yaama kankye sedeka la, kwanki na kusa de na bila durinya mu wo. 7 Ni yi anki de Kiristi sa ni nkye ni yi kyakyawu, Ni gama guru mbode Mirikisi ma bila de ni yi, Ni kuma keyi beigaskye na. 8 Kuzukam nani wuta gangasi yi na pekye ni, de Obagizi, nsu shiriya gaskye yaa ba ni a nana karishe, Mirikisi yaa ba ni e ni dandaa na ba nzun guru worede pekye ni so ari nana de Obagizi Yesu yaa zo.

9 Timoti yi kokori de ki zo anyana seberi, 10 Sobon Demasi, bila ni te mayi a kesa Tasalonika, sobon so mbo durinya mu. Kirizens te a kesa Galatiya, Taru kwa te a kesa Dalimatiya. 11 Luka na kin ma nja ni kuzukam. Bila Marikusu de ki zo nja shi, sobon yaa sua ni nto a siki ANKI. 12 Ni saka Tikikus ta Apisa. 13 Kwanki de ka zo, keyi ni riga yari de Ni bila a nani Karibusu a kesa Taruwasa, nja nsu takada na, musama nsu takada rubutu na.

14 Alezanda mikila e shushe ni soseyi. Obagizi yaa lama ni mbode e yi ni. 15 E ke ma du ki kpanku nkiya ke, sobon Obagizi mayi geba soseyi nja manki mu.

16 A pari de ni ma tele kiya na a geba nsu shiriya nseda zo sua ni nto ba, sede guru aku ku yi gudu bila ni. Ni ma ologba Mirikisi de e yape su. 17 Sede Obagizi sakisi nja ni e ba ni sori de Ni keleba manki kelima, sobon te anya na manki kyakya mu mua pala nja guru worede su ma Yawudawa ba sua zi mbode ni pala. Yomuna Mirikisi sila ni dege baki zaki. 18 Obagizi yaa sila ni dege kowoni mungu mbo, yaa tengele ni e keyi ni ta a gizi e yi a bisi de e mayi solota.Yobo te anya Mirikisi gbogbo nja gbogbo. E ma yomu.

19 Ki geshe ni Biriskila nja Akila nja ntani gizi Onesiporus. 20 Arastus e zunwa a kesa Korenti, Ni bila Turopimusu a kesa Miletus e mayi suwo. 21 Yi kokori de ki zo kapi de damina e yi. Yubulusu nja Budensi nja Lainusu, nja Kalaudiya nja guru ririgye Yayuwa su ma gesheku.

22 Ni mayi lepa de Obagizi e ja ku sori a siki aworo ku. Aniyeri ni Obagizi e ma nja ku. Ema yomu.