1 Takada mu butu anya Bulusu bunwa ni Mirikisi nja yaa manki ni Yesu Kiristi sobon beigaskye ni worede Mirikisi zabi nja shina ni gaskye de sa su mani yiri ali kyakyawu ni Mirikisi, 2 beigaskye nja shina zunwa a siki sa dishiya ni leyi gbogbo, sobon Mirikisi de yaa taba yi yaruwa ba, e yi anikowori kapi de kwanki ni karishe, 3 a dede kwanki mu Mirikisi sa kelima e yi zo anya na de ni beyi manki doka ni Mirikisi nsu sila mu,

4 Manki te anya Taru, yaa na ni gaskye a siki beigaskye de muma gabada:

Mma yi ke lepa de aniyeri nja selema yiri anya Mirikisi adaa nja Kiristi Yesu nsude sila mu.

5 Mbode sa de Ni bila ke a kesa Kirit e shina de ki karikye mbode ni gama ba nja de ki zabi toree a kowoni geri, yiri de ni gye ke de ki yi. 6 Tolense mu e ma nsu mere lepi a geba ntani, nseminji nsu mase ndandaa, nsude yaya e yi su ma nsu beigaskye nja Mirikisi nja su ma nsu zi kuni adaa su nja kede su ma nsu tori kiya ba. 7 Tunde nsu kpanku nsubiya Yesu e ma nsu keyi amana Mirikisi la, dole e ma nsu mere lepi anya ntani, kede e ma nsu nana sori, kede e ma nsu seberi anwashi, kede e ma nsu sha giya, ko nsu seberi dukwa, ko nsu so yi opu riba. 8 Dole na ema nsu keleba bakwe, nsu so mbo kyakyawu, nsude ka kiya e yi, nsu dishiya kyakyawu, ema nsuseki, nsude poro kiya e yi. 9 Ema nsude keyi manki ni Mirikisi nnani bi bi yiri de su kokoyi, sobon de e ja worosu sori guyamu te anya kokoyi gaskye kelima Mirikisi, de su shakiya nsu geba nja mbode yaa kokoyi.

10 Sobon nsu gabo nyowa, de su ma yi beta kyakyaka nja nsu shirigye ntani, worede su bila adini Yawudawa de su ma dama ku a kiya yanka. 11 Dole na su zunwa shuru, sobon sua dege dishiya ntani a gizi asu ni kokoyi mbode e kamata de su kokoyi ba, sobon bila mumungu riba. 12 Anebi daa dege Kiritawa pala nkye, <<Ntani Kiritawa nsu yaruwa, su ma kankye mumungu nama bikiya, su ma okyabo la, nsu mungu si.>> 13 Sheeda e yi ma gaskye la, sobon yomu, ku gila su dandani, de su sakisi nsori a siki ni beigaskye 14 sobon de su bila zi kokongye Yawudawa nja biya doka ntani worede su ki zi gaskye. 15 Te anya nsu dishiya sere, guru mbo ma sere la, sede te anya nsu dishiya mumungu nja worede su ma ni gaskye ba, ba mbode ma sere anya su ba. Gaskye, guru dishiya su nja tunani su sika ni mungu mbo. 16 Sua pala mbaki nkye su shina Mirikisi, sede te ANKI asu su yi musu shina Mirikisi, su ma mbo kazanta, nsu ki zi beta, su deta de sua yi ANKI kyakyawu ba.