1 Sede e ke Taru e ma dole na ki kokoyi mbode ma kyakya de yeda ni kokoyi ni gaskye ni Yesu. 2 Ki kokoyi toree menza de su ma nsu ka kiya su, su yi mbode ntani sua ba su girima, nja su ma nsu sakisi nsori a siki beigaskye, nja a siki so, nja su ma nsu yi takuwa.

3 Yomuna, ki kokoyi totolo mata de su yi zunwa kyakyawu ni mata nsu biya Yesu, kede su ma nsu pala beta mumungu a kiya ntani ko su ma bunwa sha giya bugu, sede ku kokoyi mbode e ma kyakyawu. 4 Yomuna totolo mata sua kokoyi mata amere de su so menza asu nja yaya asu, 5 de su ma nsu ka kiya su nja nsu zunwa seki, nja su ma nsu keyi gizi asu nja su ma nsu buala kiya su ba menza su, sobon de kede nseda nene kelima beta Mirikisi.

6 yomuna du, ki ba yaya sambari sori guyamu de su ka kiya su. 7 A siki kowoni mbo, ki ma mbo kokoyi anya ntani te turiki yi mbo kyakyawu. A siki kokoyi ke nana gaskye, nja sori dishiya. 8 Yi beta kyakyawu de kede nseda e yi geba ni mbode ki pala ba, sobon nsu oboki geba ke sua zi kumnya sobon su mani mbodaa mumungu de sua pala a kiya mu ba.

9 ki kokoyi bunwa de su ma nsu bwala kiya te anya nsugizi asu a kowoni mbo, su yi mbode jima nsugizi asu, kede bunwa su ma nsu yi musu nja nsugizi asu ba, 10 bunwa kede su yi nsugizi asu bolowa ba, sede su nana nkye su ma nsu aminshi la, sobon yomuna ntani sua geni manki beta Mirikisi nsu sila mu yaa ma mbo jima anya ntani.

11 Sobon aniyeri Mirikisi de keyi mu sila e pelesa te anya guru ntani. 12 Aniyeri Mirikisi kokoyi mu de mu bila zunwa de jima Mirikisi ba nja zunwa memeri ni keyi durinya, nja de mu yi zunwa ni ka kiya mu, muma nsu dishiya kyakyawu nja zunwa ni ali Mirikisi a durinya mu. 13 Mua pekye anabirika ni sa dishiya, nja zo ni dereja Mirikisi nsu girima nja Yesu Kiristi, nsu sila mu, 14 Yesu de beyi kiya e yi de e butu mu dege guru mungu nja de wonkye mu ba kiya e yi de muma ntani de muma na yi, muma ntani de sua yi mbode ma kyakyawu.

15 Mbo worosu mu, nama mbode ka kokoyi. Ba nsubiya Yesu sori guyam nja kobe ni guru yiko. Kede ki sa nseda e nene ke.