1 Ki turunwa ntani ake de su munka kiya su ba nsu toree kesa nja nsu solota, su ma nsu zi beta toree, su zunwa ni shiri de su yi kowoni yiri kyakyawu anki a kowoni kwanki. 2 Kede su gye nseda beta mumungu, su ma nsu zunwa selema nja soki kiya, su bwala kiya te nja guru ntani.

3 Kwanki de bishe omu ma du muma Odundu na, nsu rishi zi beta Mirikisi la, su shirigye mu nja muma bunwa ni kowoni yiri memeri nja kode yi. Mu yi zunwa ni kishi nja keyi ntani a dishiya, mu yi zunwa geba nja ntani nja ntani sua yi zunwa geba nja mu du. 4 Sede so nja aniyeri ni Mirikisi amu nsu sila amu pelesa, 5 Mirikisi sila mu. Ba sobon ni gangasi amu anya Mirikisi de mu yi naba, sede sobon ni toseyi e yi na. Mirikisi sila mu, e sila mu te anya ni sabuwa yapu nja e wonkye lepi amu muma sabuwa te anya Aworo nsuseki, 6 de Mirikisi ba mu nyowa te turiki Yesu Kiristi nsu Sila mu, 7 Mirikisi yi yomuna sobon de muma mere lepi te turiki aniyeri e yi, de muma nsu si gado te anya sa dishiya leyi ni gbogbo. 8 Beta mu e ma gaskye la, mma bila de ku kokoyi ntani mbo mu de ni rubuta ku e shi a siki takada na, ku tabata ntani shina su soseyi. De worede su sa dishiya su anya ni Mirikisi sua beyi kiya su de su yi mbo kyakyawu. Kokoyi mu yaman kyawu anya kowoni nse.

9 Sede ku yi gudu ni ntani de sua yi musu ni wopi, nsu bayi tayiri nabari nsu adaatolo asu, kede ku yi rikishi nja ntani yiri asu, kede ku yi musu a kiya doka ni Mirikisi sobon su man ampani ba kuma su ma wopi la. 10 Nde nseda te kokoyi manki daa mbom de zo ni rikishi, ku ja yi kuni, ku ja yi kuni sen bi, nde e bila ba, ku yi gudu anya e yi. 11 Ku shina nkye yiri nse mu e ki de e biya manki Mirikisi, e shina nkye mumungu mbo de yaa yi e ma kyakyawu ba, sede e sigeba ni yi su.

12 Nde ni saka Atemas ko Tikikus te anya ake, yi kokori de ki yi seberi de ki zo anyana a kesa Nikapoli, sobon ni ma so de ni yi meka anya ni. 13 Ki yi guru mbode ka yi de ki sua Zenas nsu shiriya nja Apolos nto a turiki asu de sua zo nja ku tabata su mani guru mbode sua bila. 14 E ma dole la de ntani amu su beyi kiya su de su yi mbo kyakyawu, sobon de su sua nto worede su mani mbodaa ba, kede su yi zunwa wopi.

15 Guru worede su ma nja ni sua gesheku. Geshe worede sua so mu a siki beigaskye.

Aniyeri Mirikisi e ma nja ku guru.