1 Aworo Mirikisi pala a pili nkye kwanki yaa zo de worosu su ntani sua bila beigaskye asu sua biya worosu su aworo nsu shishirigye ntani nja kokoyi ni arizeni yaruwa. 2 Yiri kokoyi mu butu anya nsu nana buki yaruwa la, de dishiya asu muntu, kankye keripi de yi zapi. 3 Sua nana ntani nkye kede su yi amere ba nja gye su nkye su bila si mbosi yiri yiri worosu su, de Mirikisi na yi su ni peri siki ba worede yeda nja worede beigaskye. 4 Sobon guru mbode Mirikisi yi e ma kyakyawu la, mbodaa ma ki ba nde mu keleba ni peri siki anya Mirikisi,

5 sobon guru mbo e ma sere te anya kelima Mirikisi nja lepa.

6 Nde ki kokoyi yayuwa nsubiya Yesu mbo mu, kama nsu yi anki Kiristi Yesu kyakyawu, de yi girima a siki kelima ni beigaskye mu nja ni kokoyi gaskye de ku biya. 7 Laba kiya ke ni kokongye ni yaruwa de mani Mirikisi ba nja worosu su mbode sua pala; sede ki kokoyi kiya ke a siki ali yiri ni Mirikisi. 8 Kode poro nki e mani ampani, sede nde ki mani ali yiri ni Mirikisi e mani ampani pi mbo guru, e ma keyi anabirika te nja zunwa ni kuzukam nja leyi nsu zo.

9 Beta mu e ma gaskye la e yi kyawu de mu yeda nshi guru. 10 Mbode sa mu meyi anki nsori amu mu meyi Genbeki, Mu sa dishiya mu te nja Mirikisi, de yaa sila ni guru ntani, musama worede su yeda nja nshi.

11 Beyi doka mu nja ki sigeba ni kokoyi mbo mu. 12 Kede ki sa nseda e nene ke sobon ki ma yaa sambari, sede ki ma mbo kokoyi ba nsubiya Yesu a siki beta de kwa yi, nja zunwa, nja so, nja beigaskye nja zunwa seki. 13 Karanta takada beta Mirikisi ba ntani a pili, kapi de na zo nja beyi manki nja kokoyi. 14 Kede ki kyawuta ni aworo mu, de su ba ke te anya anebi a kwanki de toree nsubiya Yesu jaa ke nani a kiya.

15 Ki yi mbo mu a siki ANKI ake; ki beyi nkiya ke guru ba su, sobon de guru ntani su geni sigeba ake. 16 Ki kula ni kiya ke soseyi nja kokoyi ke. Ki yi dishiya de ki yi mbo worosu mu, sobon nde ki yi, ka sila nkiya ke nja nsu zi ke.