1 Mpari, Ni meyi ologba ku, ku pata Mirikisi mbode kwa bila, ku yi lepa sobon ntani Mirikisi, ku sigeba ni yi ntani lepa nja ku gbede Mirikisi sobon guru ntani, 2 ku yi nsu seleki lepa nja guru worede su mani solota a kiya asu, de mu zunwa lapiya ndishiya daa nja su, a siki ali Mirikisi nja zunwa seki. 3 E ma kyakyawu mbo na, e kwa jima Mirikisi nsu sila mu, 4 Mirikisi de yaa so guru ntani su sila nja de keyi su te shina gaskye. 5 Sobon Mirikisi ma daa nja nsude ma sisika Mirikisi nja nsebeki e shiya ma nsebeki Kiristi Yesu, 6 e shi de beyi nki yi de e sila guru ntani. Ntani sheeda manki e yi a kwanki de ma kyakya. 7 Sobon delili mu na Mirikisi zabi ni ma yamanki nja nsu beyi manki, Mma pala gaskye gye ntani, Mma pala yaruwa na ba, nja ni ma male ni beigaskye te nja worede su ma Yawudawa ba.

8 Na bila de menza guru su dege nani su nsuseki a siki lepa, ba ni anwashi ko yi geba ba.

9 Na kwa bila de mata su yi gyaga kyakya nsude man kyawu, su sa keikei de man kyawu, ba yowa gyala gesa kiya ba ko sa zinari ko aziripa ko keikei nsu gyolo nyowa ba, 10 sede ni ni ali kyakyawu, de yi kyawu ni mata worede sua bowuta Mirikisi.

11 Bila de mata su kokoyi a siki bwala kiya. 12 Ni ba mase dama de e kokoyi ko e mani yiko a kiya ni nseminji ba; dole na mase e zunwa shuru. 13 Adomu na Mirikisi para yi, kapi Awawu. 14 Ba Adomu na obiri shishirigye yi ba; sede mase na obiri shishirigye yi ari e ma nsu lepi. 15 Sede mase yaa samu sila te anya yapu yaa, nde e sigeba ni beigaskye, ni so nja zunwa seki nja ka kiya.