1 Beta mu e ma gaskye la: du nsude yi memeri de e ma tolense ni nsubiya Yesu, ANKI kyakyawu na e bila. 2 Kuzukam Bulusu pala nkye nsude yaama tolense ni nsubiya Yesu kede e ma nsu lepi anya ntani ba, e ma nsu mase daa, nsu ali kyakyawu, nsu dishiya din, e ma nsu ka kiya yi, nsu keleba bakwe, e ma nsude yi yaa kokoyi ntani beta Mirikisi, 3 ba nsu sha giya bugu ba, kede e ma nsu bila topula ba sede nsu kadishiya, kede e ma nsu rikishi ba, kede e ma nsu so gyolo ba. 4 Dole la ema nsu kula ngizi yi nkyawu e ma nsude yaya e yi sua beyi girima a guru turiki. 5 Nde nsude yi yaa kula ngizi yi ba, yaya na yaa yiya kula ni nsubiya Mirikisi? 6 Kede e ma nsude keleba Yesu sabuwa ba, sobon kede e ma nsu dege kiya ari e puari a siki yiri shiriya de Mirikisi yaa yi obiri. 7 yi kyawu de nsu kula ni ntani Mirikisi ema nsude man sheeda gangasi anya worede su ma nsubiya Yesu ba, sobon kede e ma mbo kumnya nja kede e puari a siki toroko ni obiri.

8 Yomuna worede sua ANKI Mirikisi, su ma worede ntani sua ba su girima, nsu gaskye, ba nsu yowa sha giya bugu ba kede su ma nsu shushe ntani anya bila gyolo ba. 9 E ma dole na su ma nsu beigaskye nja manki Mirikisi ni dishiya sere. 10 Dole na su para gwada su; sede nde su ka su nlepi daa ba, se su ma nsu anki Mirikisi.

11 Yomuna mata ni nsu anki Mirikisi su ma mata de ntani sua ba su girima, kede su ma nsu bebeta ntani seni ba sede nsu dishiya din nja worede ntani yeda nja nsu a siki guru mbo.

12 Nsu ANKI a siki nsubiya Yesu dole e ma minzi mase daa nja dole e ma nsu yi yaa kula ngizi e yi nja yaya e yi kyakyawu. 13 Worede su meyi anki kyakyawu a siki nsubiya Yesu ntani sua ba su girima nja sua man sa dishiya ni beigaskye a siki Kiristi Yesu.

14 Kode nkye Na rubuta ke doka mu, Nisa dishiya na dede ba Na zo geni ke, 15 Sede nde Ni dede, doka mu yaa sa mua shina yiride e kamata ntani su ka kiya su a gizi Mirikisi, worede su ma nsubiya Mirikisi nsu leyi, sua ka manki Mirikisi ngaskye. 16 Bulusu nkye, mma puari geba ba, asiri ni beigaskye amu e man girima:

Yesu pelesa a siki nki,

Mirikisi nana yi e ma nsu gaskye la a siki Aworo,

Meleku Mirikisi geni yi,

su beyi manki a siki ntani durinya worede su shina Mirikisi ba,

ntani durinya yeda nshi,

Su leyi ta bisi a siki dereja.