1 Kede ki kwabe susupe nseminji ni zapi murinya, sede ki ba su showura kankye e ma adaa na anya ake. Yaya sambari kankye yayuwa ake. 2 Ki ba susupe mata girima kankye su ma amaa ke, yaya mata kankye yayuwa ke, ni dishiya sere.

3 Ku beyi girima te nja mata makeyi worede su mani nseda de yaa sua su nto ba. 4 Sede nde mase makeyi man yaya ko yaya yaya, dole na su para kokoyi ali yiri ni Mirikisi te nja ntani gizi asu yomuna sua biya nsu adaa asu nja nsu adaatolo asu mbode su yi su nshi, yomuna yaa jima Mirikisi. 5 Mase makeyi de mani nseda de yaa sua yi nto ba e ma sa dishiya e yi te nja Mirikisi ni lepa ndederi nja nnana yaa ologba Mirikisi de sua yi nto. 6 Sede mase makeyi de meyi zunwa bila zi dadi ni durinya mu e ma mumuntu la kode e mani leyi. 7 Ki gye ntani beta mu, dun, sobon kede nseda e ma mbo basi anya ntani ba. 8 Guru nsude ma kula nja ntani gizi e yi ba, musama ntani ni siki gizi e yi, e ki beigaskye aka, e pi worede beigaskye ni Mirikisi ba mungu.

9 Ba mase makeyi de sua rubuta seni e yi a siki mata makeyi ba se mase de keyi shekera sitin, kuma kwanki de minjiyi man leyi e yi zunwa aminshi nja minzi e yi, 10 Konse shina yi kyakyawu nja yi mbo gangasi, ni kokoyi yaya e yi, nja keleba bakwe, wonkye seni ntani Mirikisi, yaa yi mbosi ba nsu yi anki Mirikisi, worede sua Genbeki yaa sua su nto nja beyi kiya yi ba guru anki gangasi.

11 Sede mata makeyi de su ma yaa mata kede su sa seni asu a siki kiriga ba. sobon nde memeri nkisu ka su de pi so ni Yesu a dishiya asu, sua so de su yi amere. 12 Yomuna sua keyi shiriya zo ba nkiya su, sobon su watala anikowori asu ni pari. 13 Mbo mu yomu, sua yi zunwa wopi sua biya gizi gizi ntani. Sua yi zunwa wopi kin naba, sede ari guluma nja zunwa so nkisu pala mbo de e kamata su pala ba. 14 Sobon yomu Ni so mata makeyi de su ma yaa mata su yi amere, de su mani yaya, de su kula ni gizi su nja de kede su ba oboki geba mu yaa dama de su bebeta mu seni anya ntani ba. 15 Woron su su rigye juyi biya obiri wo.

16 Nde mase nsubiya Yesu mani mata makeyi a juriya su, se e sua su nto, kede e dama ririgye nsubiya Yesu ba, sobon ririgye nsubiya Yesu su ma sua mata makeyi de su mani nseda ba nto.

17 Toree nsubiya Yesu de sua yi anki asu kyakya e kamata de ntani su ba su girima, musama worede anki asu mani beyi manki Mirikisi nja kokoyi. 18 Sobon Takada beta Mirikisi pala nkye, <<Kede ki ripe baki binjimi nde ema yi anki keikei bikiya a pita,>> nja <<Nsude yi anki e deta de su beyi nani wuta yi.>> 19 Kede ki yeda ni kara a kiya tolense ni nsubiya Yesu daa sede ni sheeda ntani bi ko wuku. 20 Worede su yi lepi su ba su poro a pili, sobon de ririgye ntani su yi womba.

21 Na ologba ku, sobon Mirikisi nja Yesu Kiristi nja Meleku Mirikisi Nsuseki, ku keyi doka mu bon nana bombom, nja kede ki so nseda pi nseda.

22 Kede ki yi seberi ni sa ntani nani anabirika, kede kwa ki sa kiya ke a siki ni lepi ni worosu . se ki tele nkiya ke de ki ma sere.

23 Bila sha riki nyowa, sede ki sha riki inebi piri sobon suwo siki nja yowa suwo.

24 Lepi ni worosu su ntani ma a pili, yaa pelesa su kapi de su yi su shiriya; Sede worosu su lepi asu e ma a boyi yaa pelesa a beyi shiriya. 25 Yomuna ANKI kyakyawu e ma pili, nja ko e ma pili ba yaa boyi ba.