1 Manki butu anya Bulusu, nja Selasi nja Timoti

Te anya nsubiya Yesu de su ma a siki Tasalonika worede su ma ni Mirikisi Adaa mu nja Obagizi Yesu Kiristi:

2 Aniyeri nja selema dege anya Mirikisi Adaa mu nja Obagizi Yesu Kiristi.

3 E ma dole na kowon kwanki mu gbede Mirikisi sobon ku, yayuwa, e yi kyawu yomu, sobon beigaskye ku yaa ja yowa soseyi, nja yiri so de ku ma nshi nja nkiyaku yaa ja yowa. 4 Sobon yomu, a siki ntani Mirikisi mua yi dege dolo a kiya ku ni sori dishiya nja beigaskye ku a siki guru takaasi nja gwada de ku geni.

5 Guru worosu mu ma alama de nana nkye shiriya Mirikisi ma kyakya, yomu na kwana ntani de deta zunwa a siki solota Mirikisi, sobon nshi na kuma Genbeki. 6 Mirikisi ma nsu gaskye la: Sobon yomu Mirikisi yaa sa worede sua sa ku Genbeki osu ma sua Genbeki, 7 Mirikisi yaa ba ku pushe, oku de kuma a siki Genbeki, nja mu du, da mu yaa paru a nana de Obagizi Yesu butu a bisi ni arishiya wuta nja meleku Mirikisi. 8 Yaa ba worede shina Mirikisi ba poro nja worede su ki biya nabari kyakyawu ni Obagizi Yesu. 9 Mirikisi yaa ba su poro nja bebeta ni gbogbo, sua laba su a geba Obagizi nja girima ni yiko e yi. 10 A nana de Yesu yaa zo a siki dereja e yi ntani e yi nsuseki sua bowuta e yi nja guru worede su beigaskye. Da mu ma nzun oku, sobon de ku beigaskye ni sheeda amu.

11 Sobon yomu a siki dishiya mu, mua sigeba ni yi ku lepa, de Mirikisi e sa ku a siki worede su deta sukwa ni Yesu, te anya ni yiko e yi e shiya asika kowoni mbo kyakyawu de kwa yi nja kowoni anki de butu te turiki beigaskye ku. 12 Yomuna mua yi ku lepa de seni Obagizi mu Yesu sua la yi ni girima a siki ku, nja oku ma sua la ku ni girima a siki yi, te anya aniyeri Mirikisi nja Obagizi Yesu Kiristi.