1 Kuzukam, yayuwa, a kiya kwanki nja nana mu e kamata de mu rubuta ku nshi ba, 2 sobon ku rigye shina guru nkye nana ni Obagizi yaa zo kankye bolowa ndederi. 3 Kwanki de ntani su ma pala nkye, <<mwa yi zunwa selema nja mwa yi zunwa lapiya>> dandani alaka yaa zo a kiya su, yiride zapi yapu yaa ka mase nsu siki, sua taba sila ba.

4 Sede oku, yayuwa, kuma a siki dopuwa naba, de nana mu yaa san ku kankye bolowa. 5 Guru ku kuma yaya ni asikye nja nana la, Mu ma ni dederi ko ni dopuwa naba. 6 Sobon yomu, kede mu ma kankye worede su ma nsubiya Yesu ba, de su mayi kwana, sede mu yi zunwa ni kpanku nja ka nkimu. 7 Sobon worede ma yi kwana, su mayi kwana ndederi la, nja worede su ma bugu, su ma bugu ndederi la. 8 Sede tunde mu ma ntani nana na, se mu yi zunwa ni kpanku. Mu sa riga keripi ni beigaskye nja so, nja gongo ni sadishiya ni sila e ma kankye golonka ni tele kiya. 9 Mirikisi zabi mu de mu Genbeki yi ba sede mu samu sila anya Obagizi mu Yesu kiristi. 10 E shi de muntu sobon ni omu de ko mu man leyi ko mu muntu, mu zunwa nja nshi. 11 Sobon yomu ku sigeba ni ja nkiya ku sori guyam nja ku sua nkiya ku nto, yiride ku kuma yi.

12 Sede muma ologba ku, yayuwa, ku beyi girima te nja worede su ma yi pama ni ANKI a siki ku, worede su ma yi ANKI Obagizi nja worede su ma gila ku. 13 Ku geni su ni girima soseyi ni so sobon ANKI su. ku yi zunwa selema nja nkiya ku. 14 Mwa ologba ku, yayuwa, ku gila worede su ma okyabo, ku ja worede dishiya asu muntu sori guyam, ku sa worede man sori ba nto , ku kadishiya nja nkiya ku. 15 Ku kone kede nseda e lama mungu mbo nja mungu mbo, sede kowon kwanki ku yi kokori de ku yi mbo kyakyawu nja nkiya ku ni kuma konwawa du.

16 Ku yi peri siki a kowoni kwanki, 17 ku yi lepa a kowoni kwanki, 18 A siki kowoni ali guru ku gbede Mirikisi. da mu nama mbode Mirikisi yaa bila de ku yi a siki Kiristi Yesu.

19 Kede ku nana beta ni Aworo Nsuseki; 20 kede ku nene manki Mirikisi de butu anya ni anebi. 21 Ku gonta kowoni mbo: ku ka mbode ma kyakyawu 22 Ku kiyaye nkiya ku dege guru mbo mumungu.

23 Bila de Mirikisi de ma beyi selema e wonkye ku guru e kwa kiyaye aworo ku, nja dishiya ku, nja nki ku e ma mere dola ari nana de Obagizi Yesu Kiristi yaa zo. 24 Mirikisi de sukwa ku e ma nsu aminshi la yaa yi mbode e pala.

25 Yayuwa, ku yi mu lepa. 26 Ku geshe guru yayuwa ni runguma so nsuseki. 27 Mma ologba ku a siki seni Obagizi de ku karanta takada mu te nja yayuwa guru.

28 Aniyeri ni Obagizi mu Yesu Kiristi e ma nja ku. E ma yomu.