1 Sobon kwana bi de mu geni ku ba mu yi yaa ka dishiya ba, mu geni e yi kyawu de su bila mu atotolo geri ni Atina. 2 Sobon yomu na, E ni Bulusu nja Selasi mu saka Timoti, yayiwa nja oboki ANKI mu a siki ni anya ni beyi manki gangasi ni Kiristi, de ja ku sori nki nja ja ku sori guyam a siki ni beigaskye ku, 3 sobon de kede takaasi mu e sa nseda e butu ni dishiya e yi anya Mirikisi. Oku nkiya ku ku shina nkye Genbeki su yi mu sobon nshina la. 4 Gaskye, a kwanki de muma nja ku, mu pala gye ku nkye mua sha takaasi. Yomu na e ma, yiri de ku shina. 5 Sobon yomu na, ni yaa ka dishiya ba, beyi manki de ni zi nabari ni beigaskye ku. Ni puari geba sobon kede obiri nsu gwada e yuru a siki dishiya ku de takaasi mu e ma wopi.

6 Sede kuzukam de Timoti zo dege anya ku e keyi mu manki nabari kyakyawu a kiya ni beigaskye ku nja so aku. E pala gye mu nkye kuma turunwa mu kuma so de ku geni mu, yiri de omu ma mua so de mu geni ku. 7 Nkayomu, yayuwa, a siki ni guru beki siki nja takaasi muma ni sori guyam a kiya ku sobon beigaskye ku. 8 Kuzukam dishiya mu bwala, tunde ku sakisi nsori a siki ni Obagizi. 9 Woni yiri gbede na mua yi Mirikisi soseyi sobon ku, a kiya ni peri siki de muma nshi a geba Mirikisi sobon oku? 10 Ndederi nja nana mua yi lepa soseyi sobon de mu geni ku ndani ni ndani de mu ba ku mbode ku lesa nshi a siki beigaskye ku.

11 Kuzukam Mirikisi mu nja Adaa mu nkiya yi nja Obagizi mu Yesu e gyala mu turiki de mu zo anya ku. 12 Obagizi e sa so aku de kuma nshi e ja yowa nja konse nja guru ntani, yiri de omu ma muma yi ku nshi. 13 Mua yi lepa de Obagizi ja ku sori dishiya de kuma ntani de kuma mere lepi nja nsuseki a geba ni Mirikisi amu nja Adaa a nana de Obagizi mu Yesu yaa zo nja ntani e yi nsuseki.