1 Ku shina, Yayuwa, zo amu anya aku e ma wopi abo. 2 Yiri de ku shina mu rigye Genbeki nja basi a pilibi, sede mu yeda Mirikisi amu de samu mua beyi manki ko de ntani nyowa sua yi geba nja mu. 3 Yayuwa manki Mirikisi de mu keyi ku e ma kusukuri ko mumungu na ba, ko kwa mua yi kokori de mu shirigye ku naba. 4 Sede mua keleba manki ba ku yiri de Mirikisi yeda de mu yi. Ba mua so de mu bwala ku dishiya naba sede Mirikisi de ba mu, E shi de yaa gwada dishiya amu. 5 Ku shina mua yi zanki baki na ba, ko mua sa mbode mu ripe baki de mu boyi opu na ba, Mirikisi e shiya ma sheeda amu. 6 Mua bila yobo anya ntani, ko anya nseda aku na ba.

Ko de nkye muma yayamanki ni Kiristi mua ma ku loni ba, 7 sede nzun yomu muma nsu soki kiya nja ku, yiride amaa yaa goyi yaa e yi dende. 8 Sobon de mua so ku soseyi na sa mu zi dadi keyi ku manki nabari Mirikisi, ba manki Mirikisi kin ba sede ku jima mu a dishiya nja mbo kyakyawu de kwa yi. 9 Yomu na, yayuwa ku turunwa, pama mu nja Genbeki de mu geni; mbode sa mu yi ANKI ndederi ni nana de kede mu ma ku loni ba, kwanki de mua keyi ku kelima ni manki Mirikisi.

10 Ku ma sheeda la, yomu na Mirikisi ma sheeda mu du, yiride mu yi zunwa seki, nja zunwa Gangasi nja zunwa mere lepi de mu yi a sisika ku oku guru de ku yeda ni Mirikisi. 11 Nta yiride ku shina mu biya ku yiride adaa yaa yi nja yaya yi. 12 Mua ja ku sori guyam, nja kadishiya nja mua yi ologba ku de ku yi zunwa yiride Mirikisi yaa so, e shi de sukwa ku a gizi solota nja girima e yi.

13 Mu sakye sigeba gbede Mirikisi, sobon de ku keleba kelima ni Mirikisi, de ku zi anya mu, ku yeda e ma kelima nsebeki na ba, sede yiride e ma, kelima Mirikisi, de yaa yi ANKI a siki ku oku de ku beigaskye. 14 Oku, yayuwa, ku ma nsu kokoyi anya nsubiya Yesu Kiristi, de su ma a Yawudiya: Ku Genbeki nja ntani kesa aku yiri de nsubiya Yesu su Genbeki nja Yawudawa. 15 Yawudawa osu na su kisa Obagizi Yesu: nja anebi se su kula mu ta woze. Su dege Mirikisi la yi sua yi geba nja guru ntani 16 sua yi kokori de su nana mu beyi manki ba worede su ma Yawudawa ba, sobon de kede su samu sila. Yomu na kowon nana sua shika yi lepi. A karishe anwashi Mirikisi zo a kiya asu.

17 Sede, yayuwa, de mu juyi bila ku kwanki piri, a siki nki ba a dishiya ba, mua yi kokori de mu geni ku ndani nja ndani, 18 Mua so de mu zo anya ku, ni gaskye e ni Bulusu, kwanki ni kwanki, sede obiri tele mu. 19 Mina ma sa dishiya amu, ni peri siki, ko lende de mua yi dolo a geba ni Obagizi amu Yesu nana de yaa zo, mba oku na ba? 20 Gaskye, ku ma mbo dege dolo amu nja peri siki amu.