1 Yayuwa na, nsubiya Yesu Obagizi nsu dereja a siki Yesu Kiristi, kede ku nana bombom. 2 A siki tala ku nde nseda zo ni keikei nsu gyolo nyowa ni arika ni zinari, se potoruwa nse sa kukukyo keikei e shi ma du zo a siki tala ku. 3 Nde ku beyi ankeli ku anya nseminji de sa keikei kyakyawu ku nkye, <<Zo de ki zunwa a kingbolo kyakyawu mu,>> Sede ku gye potoruwa nseminji nkye, <<Ki sakisi anya ni>> ko <<Ku nkye zo de ki zunwa a kisi,>> 4 Nde ku yi yomu, ku nana bombom nja nkyaku naka nja ku yi shiriya ni mumungu tunani a dishiya ku naka bo?

5 Ku zi, yayuwa na de mma so: Mirikisi zabi worede su ma potoruwa a siki durinya mu de su ma nsu mbo nani a siki beigaskye nja de su si gado solota de Mirikisi yi anikowori ba worede su so yi. 6 Sede ku nene potoruwa ntani. Ba nsu mbo nani la su sa ku Genbeki bo? Ba osu na su ma keyi ku ta anya anikari a laki shiriya bo? 7 nsu mbo nani osu na su ma worede su ma pala beta saba a kiya seni Yesu Kiristi nja du oku de kuma na yi bo?

8 Nde kuma nsubiya doka de ma a siki takada Mirikisi amu: de pala nkye <<Ku so dengeri ku yiride kwa so kiya ku,>> nde ku yi yomu, ku yi kyakya. 9 Sede nde ku nana bombom nja nkyaku ku shina nkye e ma lepi nja kuma nsu watala doka Mirikisi naka. 10 Du nsude biya guru doka mu se keriya ndandaa e ma kankye keriya guru doka naka. 11 Mirikisi de pala nkye, <<Kede ki kwana nja mata nseda,>> e kwa pala nkye, <<Kede ki kisa nse.>> Nde ki kwana nja mata nseda ba sede ki kisa nseda, e ke ki ma nsu watala doka naka.

12 Sobon yomu beta ku nja zunwa ku e ma kankye worede sua yi su shiriya a siki doka de yaa ba ku yenshi, 13 sobon Mirikisi yaa taba zi toseyi worede su ma zi toseyi nse ba. sede toseyi yaa shakiya ni shiriya.

14 Yayuwa na, mina ma kyawu e yi de nsebeki nkye e mani beigaskye sede beigaskye e yi nana anki e yi ba. Beigaskye e yi yaa sila nshi? 15 Kuzukam, nde yayiwa ni minzi ko ni mase de mani keikei sa ba ko mbosi ni si kowoni nana ba. 16 Nde nseda ku gye su nkye, <<Ku sonka lapiya! Mirikisi e ba ku mbosi nja keikei de kwa sa!>> sede e ba su mbode sua bila ba, mina ma kyawu yi? 17 Yomu na, nde beigaskye e te mani ANKI ba, e ma mumuntu.

18 Sede nseda yi yaa pala nkye, <<E ke ki ma ni beigaskye; E ni Ni mani ANKI.>>

Nana ni beigaskye ake de mani ANKI ba, e ni Na nana ke beigaskye te anya ANKI de mma yi. 19 Ku yeda nkye Mirikisi ma daa la? e man kyawu! Ko arizeni osu ma su yeda yomu, ari sua yi womba.

20 Eke Odundu nsebeki ko ka bila de nnana ke beigaskye de mani ANKI ba e man wopi la? 21 De adaatolo mu Abireyi la yaa e yi Ishaku beyi sedeka anya ni beyi sedeka, ba te anya yi na Mirikisi nkye e ma nse gangasi bo? 22 Ku geni de beigaskye nja anki ni Abireyi su meyi tepiya gabada, sobon yomu beigaskye e yi sika te anya anki yi. 23 Yomu na takada Mirikisi sika de pala nkye, <<Abireyi yeda ni Mirikisi, sobon yomu Mirikisi sa e yi a siki ntani de su ma gangasi,>> Mirikisi sukwa e yi nkye oboki e yi. 24 Ku geni, nsebeki yaama mere lepi te anya beigaskye kin naba sede te anki kyakyawu de e mayi du.

25 Yomu na du, Rahab de ma mase kilaki Obagizi la e yi ma nse gangasi sobon de e yi mbo kyakyawu na bo? de e boyi Izireyila de su zo kone nja de e sa su biya turiki daa mbom na bo? 26 Yiri de nki de mani aworo ba e ma kankye gan, yomuna beigaskye de mani ANKI ba e ma kankye gan.