1 Takada mu butu dege anyana Yakubu, bunwa ni Mirikisi nja Obagizi Yesu Kiristi,

Manki ta anya juriya gom sha bi de su yaapi a siki durinya:

Mma yi ku gesuwa.

2 Yayuwa na, Ema ku mbo peri siki nde ku geni kiya ku a siki gwada a kowoni turiki, 3 sobon ku shina nkye gwada ni beigaskye ku a siki Obagizi yaa zo ku takuwa. 4 Se takuwa ku a siki Obagizi gama ANKI yi na kwa ma dedeta ntani a siki Yesu Kiristi, de kwa lesa mbodaa ba. 5 Nde nseda ku lesa simi, bilade e minya Mirikisi de ma ba konwawa simi teke ba nonwa; yomu na Mirikisi yaa beyi simi. 6 Sede nde ka yi lepa, dole na ki beigaskye kede ki ma nsu dishiya bi, sobon nsude mani dishiya bi ema kankye nyanye de angwe ruwa, pula yi ma ta kowoni anga. 7 Nde ki te ma yomu, kede ki sa dishiya nkye ka samu mbode ka bila anya Mirikisi, 8 sobon ema nsu dishiya bi la, e sa ankeli yi anya daakaka ba a siki guru mbode ema yi.

9 Yayuwa de su ma potoruwa a siki nsubiya Yesu su yi peri siki nde Mirikisi dege su a bisi. 10 Sede Yayiwa de mani mbo nani kede e la kiya yi ema mbodaa na, sobon mbo nani yaa bise kankye pure sanwa. 11 Sobon nde nana butu yi dimi yaa sa sanwa kyekeri, pure yi yaa puari a kisi. kyawu yi yaa bebeta. Yomu na, nsu mbo nani sua muntu bila mbo nani su, a siki yuru nja butu ni ANKI yi.

12 Anabirika ma nja nseminji de yi dishiya a siki gwada, sobon nde e yi dishiya a siki gwada mu, e shiya yaa keleba nani wuta nleyi ni gbogbo de Mirikisi yi anikowori de yaa ba worede sua so yi.

13 Dun nsude samu gwada, kede nkye, <<Mirikisi na ma gwada ni.>> Sobon Mirikisi yaa taba gwada nsebeki ni mbo mumungu ba, Mirikisi nkiya yi yaa gwada nseda ba; 14 Sede kowoni nsebeki, te anya mumungu memeri dishiya e yi de shirigye yi, yaa sa nki yi a siki mumungu mbo. 15 Anya ni, mungu tunani de ki boyi a siki ke, yaa yapu lepi; nde ki te sigeba nlepi, yaa keyi ke ta muntu.

16 yayuwa na de ma so, Kede nseda shirigye ku. 17 Kowoni mbo kyakyawu nja dedeta kyawuta butu dege anya Mirikisi Adaa mu ni bisi, e shi de ki la asikye ni bisi, guru mbo worosu mu sua juyi, sede Mirikisi yaa juyi ba. 18 Mirikisi zabi mu de muma yaya yi de su yapu te anya kelima beta yi ni gaskye, de muma yaya yi ni pari ni kowoni mbode yi.

19 Yayuwa na, worede mma so, ku shina ni mbo mu: Konse ema ni seberi zi, sede kede ema nsu seberi beta nja seberi anwashi ba, 20 sobon anwashi ni nsebeki yaa taba sayi zunwa gangasi anya Mirikisi ba. 21 Nkayomu, ku bila guru mbo rebi, nja mungu ali de gyewe ku, ku bwala kiya ku de ku keleba kelima beta ni Mirikisi a dishiya ku, de e sila ku.

22 Sede kede ku ma nsu zi kelima beta Mirikisi kin ba, nde ku yi yomu kuma shirigye kiya ku naka. Sede ku yi mbode Mirikisi pala. 23 Dun nseda de zi kelima beta Mirikisi, sede nde e yi mbode yaa pala ba ema kankye nsude kone pusika yi a mudubi 24 se a beyi de e kone kiya yi, de e te mayi dandani e mosi yiride kamani e yi ma. 25 Sede nsude beyi ankeli anya karanta beta Mirikisi mu de e shina ma nsu zon yenshi, Mirikisi yaa sa yi anabirika a siki guru mbode ema yi, nde ema nsu zi na kin e kwa mosi ba, sede ema nsu yi anki nshi.

26 Nde nseda yaa kone nki yi kankye ema nsubiya Yesu na, sede nde yaa ka baki yi ba ema shishirigye kiya yi nja biya Yesu yi ma wopi na ka. 27 nsude yaa so biya Mirikisi Adaa mu ni gaskye ema dole na e kula nja yaya male yi nja mata makeyi a siki ni beki siki asu nja e tele kiya yi de kede mbo mumungu durinya mu e bebeta yi.