1 Mina yaa zoni rikishi nja topula a siki aku? Sobon mumungu mbo de sua yi yanki a dishiya ku bo? 2 Kwa bila mbo ku samu ba. ku kisa nse nja yi kyashi, sede ku samu mbode kwa bila ba, se kwa yi topula nja rikishi nzun yomu ku samu ba, sobon ku ologba Mirikisi ba. 3 Se ku minya Mirikisi, e ba ku ba, sobon ku minya ni mungu nupi, kwa bila de ku yi anpani nshi a turiki de ma kyakyawu ba.

4 Oku ntani mere aminshi, ku shina nkye yi oboki nja ntani durinya yaa sa geba nja Mirikisi na bo? Du nsu de e zabi de yi oboki nja durinya e ma oboki geba ni Mirikisi naka. 5 Ko kwa yi tunani e ma kokowe la de takada Mirikisi pala nkye, aworo de ma a siki mu yaa samu de mu so Mirikisi na kin? 6 Sede Mirikisi ba mu aniyeri e yi nyowa. E shina sa takada Mirikisi pala nkye:

<<Mirikisi yaa yi geba nja nsu dege dolo

Sede yaa beyi aniyeri e yi ba worede su ma bwala kiya su.>>

7 Sobon yomu ku beyi kiya ku, te nja Mirikisi. Ku yi geba nja obiri, se obiri yaa yi gudu bila ku. 8 Ku zo mala Mirikisi, e shi ma du yaa zo mala nku. Oku nsu lepi, ku bila yi lepi, de ku yi mbo kyakyawu, oku nsu dishiya bi. 9 Ku yi kuka, ku yi beki siki nja anwe. Dala ku e ma kuka nja peri siki ku e ma beki siki. 10 Ku bwala kiya ku a geba Obagizi, se Mirikisi yaa la ku a bisi.

11 Yayuwa, kede ku ma nsu pala beta mumungu a kiya yayiwa a beyi e yi ba. Du nsude e yi beta mumungu a kiya yayiwa yi e yi lepi. Nde ki ki biya mbode Mirikisi pala ki ki biya doka e yi naka, a kiya yomu ka nana nkye ka yi doka shiriya naka. 12 Mirikisi na kin e ma nsu bayi doka nja nsu shiriya, waa ma e ke de ka yi dengeri ake shiriya?

13 Kuzukam ku zi ni, oku de kwa nkye, <<Yawu ko gobe mua te anya mu ko geri nsuni, mua yi shekera anya ni de mu yi bije mu samu riba gyolo nyowa.>> 14 Mina sa kwa pala yomu, ku taba shina mbo de yaa paru gobe ba. Ki shina ko yaya na leyi ke yaa ma? ki ma kankye gidagida na de yaa butu kwanki piri se e beta. 15 E yi kyawu de ku pala nkye, <<Nde Obagizi yeda ko nde muma ni leyi mua yi nsu mu ko nsuni.>> 16 Sede, kwa dege dolo nja dukwa geba. Guru dukwa geba aku e ma mungu mbo la 17 Sobon yomu du nsude shina mbo kyakyawu de e kamata de yi se e yi ba, e yi lepi naka.