1 Ku sigeba nso nkiyaku kankye nsu biya Yesu. 2 Kede ku bila yi bakwe nnaba a gizi ku. Sobon yomuna worosu su keleba meleku a gizi asu ba nshina su ba. 3 Ku turunwa ni worede su ma a jaru, kankye oku ma kuma a jaru nja su. Turunwa ni worede su ma Genbeki, kankye oku ma kuma Genbeki du.

4 Amere e ma mbo dereja anya ku guru, nseminji amere nja mase amere su yi aminshi nja nkiya su. Sobon Mirikisi yaa yi guru worede su meyi nungwe nja worede su ma kwana nja mata nseda shiriya. 5 Ku laba kiya ku dege so ni gyolo nja ku yi gbogila ni mbode ku manshi. Sobon Mirikisi pala nkye, <<Na taba bila ku ba; Na taba mosi nku ba.>> 6 Bila de mu ma nsori dishiya, de mu nkye,

<<Obagizi e shiya ma nsu sua mu nto, Na taba zi womba ba

Mina nsebeki yaa yi ni?>>

7 Ku turunwa ni toree ku ni da, worede su kokoyi ku kelima beta Mirikisi. Ku kone yiri zunwa de su yi kapi su muntu, ku biya seni beigaskyesu. 8 Yesu Kiristi e ma yiri daa jiya, yawu nja gbogbo.

9 Kede ku bila kokoyi sabuwa de la ankeli ku bila kyakyawu turiki. Aniyeri Mirikisi yaa sa dishiya ku de ma nsori, ba biya alada a kiya ni mbosi ba; worede su biya doka mu e mani moriya anya su ba. 10 Pirisi worede sua yi anki anya bowuta ntani Yawudawa su mani yenshi ni si mbosi anya munka sedeka mu ba. 11 Tolense ni pirisi ni Yawudawa keyi zini ni daba zo atotolo anya Nsuseki te munka kankye sedeka ni wonkye lepi; sede nki ni daba sua gesa yi a woze ni anya tala. 12 Sobon delili mu Yesu muntu a beyi totolo geri, sobon de e wonkye ntani dege lepi ni zini e yi. 13 Nkayomu, bila de mu te a beyi geri de mu zi kumnya nja shi. 14 Sobon mu man totolo geri de ma namu ni kiya mu a durinya mu ba, sede mwa sa ndani pekye totolo geri de yaa zo.

15 Nkayomu, bila de mu sigeba ni yobo Mirikisi de ma kankye sedeka mu te anya Yesu, de ma beiko de beyi te arishiya de pala nkye e ma Obagizi. 16 Kede ku bilayi kyakyawu nja sua nkiyaku nto nkiku de mu yi mbo kyakyawu nja de mu laba mbode mu manshi nja worosu su, sobon yiri sedeka mu yaa jima Mirikisi

17 Ku yi biyaya ni kowoni toree ku nja ku yi mbode su gye ku. Sobon osu na sua kpanku dishiya ku, osu na ma ntani de dole sua beyi kikiriga a kiya ku. Ku yi mbode sua bila de su yi ANKI su ni peri siki; nde e ma yomu ba sua yi ni basi leyi, yomu taba sua ku nto ba.

18 Ku sigeba nlepa sobon omu. Sobon dishiya mu e ma sere, sobon mwa bila de mu yi mbo kyakya kowoni kwanki. 19 Mma ologba ku soseyi de ku yi lepa de Mirikisi kuma ni mbayi zo anya ku.

20 Bila Mirikisi de beyi selema, de te anya zini seda e dege Obagizi mu Yesu dege kumsha, Yesu de ma kankye totolo nsu kpanku timshiya, 21 Na yi ku lepa de Mirikisi sika ku ni kowoni mbo kyakyawu de ku yi mbo de jima Mirikisi. Te anya Kiristi, nsude guru dereja ma na yi gbogbo! E ma yomu.

22 Mma ologba ku, yayuwa de ku yi ankuri ni manki ni ja sori guyam; takada de Ni rubuta ku nshi nyowa ba.

23 Mma bila de ku shina nkye yayiwa mu Timoti su butu yi jaru. Nde e zo seberi, E ni nja shi mwa zo anya ku de e geni ku.

24 Geshe ni guru toree ku nja guru ntani Mirikisi. Nsubiya Yesu de ma kesa Italiya su ma gesheku.

25 Bila de aniyeri Mirikisi e ma nja ku guru.