1 Nkayomu, tunde muma ni sheeda ntani nyowa de su gyowe mu. Bilade mu butu guru mbode tengele mu a turiki, nja lepi de yaa domuna mu, se mu yi gudu ni tatarigye de ma a geba mu. 2 Bila de mu nya ndani mu anya Yesu, e shi de beigaskye mu ma dege pari ta karishe. E yi takuwa ni Genbeki ni muntu a gidiri! sobon peri siki de yaa pekye nyi e damu ni kumnya ni muntu a gidiri ba, nja sede kuzukam e zunwa a nani dama kingbolo solota Mirikisi. 3 Ku yi tunani a kiya Genbeki de e sha; yiri ki zini de samu dege nani nsu lepi! Sobon yomu kede mu bila nkiya mu de mu butu dishiya.

4 A siki topula ku a kiya lepi ku tuku ki ari ku keyi baki muntu woba. 5 Ku musi ni kelima ni ja sori guyam de Mirikisi pala gye ku yaya yi?

<<Mirikisi nkye, Yaa na, kede ku la yi kankye wasa nde Obagizi yi ku gyala,

nja kede ku lense dishiya nde Obagizi kwabe ku.

6 Sobon Obagizi yaa gyala kowoni nsude yaa so,

nja yaa poro kowoni nsude e yeda de e ma yaa yi.>>

7 Ku kadishiya ni Genbeki de kwa sha kankye yiride Adaa yaa poro yaa yi; Mirikisi yaa yi ku yomu sobon de ku ma yaya yi la. Ko woni yaa na adaa yi yaa poro yi ba? 8 Nde e poro ku yiride yaa yi ririgye yaya yi ba, ema kankye kuma yaya yi naba, sede yaya shegye. 9 A keteri ni nsu adaa mu ni nki, nde su ma poro mu nzun yomu mwa ba su girima. Yaya na yaa pi mu kyawu nde mu beyi kiya mu te nja adaa mu ni aworo de yaa yiya ba mu leyi! 10 Nsu adaa mu ni durinya sua ba mu poro a kwanki piri, yiride su geni de Jima su; sede Mirikisi poro mu sobon de e yi mu kyawu, sobon de muma nsuseki kankye e shi. 11 Kowoni poro de su mayi mu, yaa samu beki siki, ba peri siki na ba. Sede a beyi ntani de su poro su sua kokoyi yiride sua beyi girima te anya poro de su sha, sua samu selema ni nani wuta ni leyi gangasi.

12 Sobon yomu, ku munka nani ku de geji de ku samu sori nja ja guyam ku sori. 13 Ku sigeba yi tepiya a turiki tiriri, de seni de sharuwa yaama kputuru ba, sede sua worikye.

14 Ku yi kokori de ku yi zunwa selema nja guru ntani, nja ku yi zunwa seki, sobon nseda yaa geni Obagizi ba se ni seki. 15 Ku kone kede nseda ku juyi dege aniyeri ni Mirikisi nja kede nseda ku e ma kankye ntasi nsu lasi de yaa girima de sa ngala nja de yaa ma ba ntani guru guba. 16 kede nseda ku e ma nsu lepi nungwe ko e ma mere ali ni Mirikisi kankye Isuwa, sobon gongo ni mbosi daa e lesa gado ni yaa pari. 17 A beyi yomu, ku shina yiride Isuwa bila de adaa yi sa yi anabirika; su ki yi, sobon e samu turiki de yaa shenja mbode yi ba, Kode Isuwa ologba adaa yi ni anwe. 18 Oku ku zo yiride ntani Izireyila zo ba. Ba e ma ogbo ni sina de sakisi a beyi naba de yaa suwuta, ogbo de ripe ni dopuwa beki kiri, nja totolo agaguwa; 19 wula koho, ni totolo murinya. De ntani zi murinya mu su zi womba su ologba de kede murinya mu e yi beta nja su gagaba. 20 Sobon sua yi yaa ka dishiya ni doka de nkye, <<Nde daba daa kpa totolo ogbo mu, dole na de su kutiri ndunsi de e muntu.>> 21 Mbode su geni e ma mbo womba, Musa pala nkye, <<E ni ma kakada ni womba.>>

22 Sede ku zo anya ogbo Siyona, totolo geri Mirikisi nsu leyi, de ma Wurishelima a bisi, nja anya de meleku dupu ni dupu tala yi peri siki. 23 Ku zo anya tala ni peri siki ni yaya Mirikisi ni pari de seni su rubuta a bisi. Ku zo anya ni Mirikisi, nsude yaa yi ntani guru shiriya, nja anya aworo ni ntani gangasi yaa ma dedeta. 24 Ku zo anya Yesu nsude sakisi a sisika mu nja Mirikisi de zo ni sabuwa seda, nja zini de nya de yi anikowori mbo kyakyawu, de pi zini ni Abila.

25 Ku kula, kede ku ki zi nsude meyi beta nja ku. Nde nsu adaatolo mu sila dege anwashi ni Mirikisi ba de su ki zi kelima beta e yi anya Musa, yaa ma nkye kona nja mu, nde mu ki zi nsude yaa yi beta nja ku dege bisi! 26 A kwanki ni murinya yi zizika kisi mu, sede kuzukam e yi anikowori nkye, <<Na zizika kisi na kurum ba sede nzun bisi du.>> 27 Kelima mu, <<Sen daa jaja>> Nana nkye Mirikisi yaa zizika guru mbode yi mbode yaa zizika ba na yaa rigye.

28 Nkayomu, mu gbede Mirikisi, sobon mu keleba solota de yaa taba zizika ba. Bila de mu gbede nja bowuta Mirikisi a turiki de a jima yi ni girima nja womba. 29 Sobon gaskye Mirikisi ma kankye wuta de yaa si kowoni mbo.