1 Mirikisi zabi kowoni totolo pirisi dege siki ntani la de e yi ANKI sobon ririgye ntani a kiya ANKI de ma ni Mirikisi, e shiya ma nsu munka kyawuta nja sedeka sobon lepi. 2 Tunde e shi tolense pirisi e mani rishi sori a turiki nyowa, e yi yaa yi ankuri ni ntani worede su shina mbode su meyi ba, su shina nkye mbode su meyi e ma mumungu. 3 E shiya sa e kamata e munka sedeka sobon lepi yi, tuku de e munka sobon lepi ni ntani.

4 Nseda yaa zabi kiya yi de yi ANKI nsu dereja mu ba; e ma te anya sukwa Mirikisi la de man totolo pirisi, kankye yiride Mirikisi sukwa Aruna. 5 Yomuna Kiristi e ba kiya e yi girima de e ma totolo pirisi ba. Sede Mirikisi gye yi nkye,

<<Ki ma Yaa na la;

yawu mu ni ma Adaa ke.>>

6 E kwa yi beta anya daa a siki beta Mirikisi nkye,

<<Ka ma pirisi ni gbogbo,

kankye yiride ANKI ni Melkizedek ma.>>

7 A kwanki de Yesu ma a durinya mu, e yi lepa nja ologba ni kuka nsori ni anwe te nja Mirikisi de yaa yi yaa sila nshi dege muntu, Mirikisi keleba lepa yi sobon beyi girima de Yesu meyi. 8 Kode nkye Yesu e ma Yaa Mirikisi la, e kokoyi beyi girima te nja Mirikisi a turiki Genbeki de e geni. 9 De Yesu ma dedeta, se e ma tutiri sila ni gbogbo te nja guru worede su ma beyi girima, 10 yomuna Mirikisi zabi yi de e ma totolo pirisi a kiya sari ni Melkizedek.

11 Mu mani mbo nyowa de mua gye ku a kiya ni mbo mu, sede mua gye ku ba sobon ku man seberi shina mbo ba. 12 Gaskye e kamata de ku ma male nsu kokoyi beta Mirikisi, sede ku kwa bila de nseda e kokoyi ku beta Mirikisi dege pari tuku. E kamata de Ku si mbosi nsu sori, sede ku tuku ma sha nono! 13 Guru nsude ma sha nono e tuku ma yaa dende la, e shina mbodaa a kiya kokoyi gangasi ba. 14 Sede mbosi nsu sori e ma ni toree ntani la, worede su ma kokoyi dishiya su de su shina sakani mumungu nja mbo kyakyawu.