1 Mbode mua pala e shiya ma mu mani Tolense Pirisi, de e zunwa a nani dama ni solota Nsu Girima a siki bisi. 2 Yaa yi anki kankye totolo Pirisi anya Nsuseki, anya bowuta ni gaskye de Obagizi shiriya, ba nsebeki ba.

3 Kowoni totolo pirisi sua sayi de e munka kyawuta nja sedeka te nja Mirikisi, yomuna Kiristi du yaa mani mbode yaa munka. 4 Nde yaa ma siki durinya mu, yaa ma pirisi ba, sobon worosu su pirisi ma de sua munka kyawuta de doka Yawudawa yeda nshi. 5 Anki de pirisi sua yi a laki Mirikisi e ma kankye kamani nja kuruma ni gaskye mbode ma bisi na. Sobon yomu na e paru nja Musa. A kwanki de yaa bila gina rugwa Nsuseki, Mirikisi gye yi nkye, <<Ki man tebeshi de ki yi kowon mbo yiride su nana ke nshi a kiya dunsi.>> 6 Sede kuzukam, Mirikisi ba Yesu anki pirisi de pi na su kyawu, kankye yiride seda mu pi kyawu, de Yesu na ma nsu sakisi a sisika Mirikisi nja ntani, sobon seda mu e ma a kiya anikowori de su pi kyawu na.

7 Nde seda ni pari yi mungu ba, ba delili ni seda ni bi. 8 Sede Mirikisi geni lepi ntani yi de nkye,

<<Nzi Obagizi nkye, Nana yaa zo,

De Na shiriya sabuwa seda nja ntani ni Izireyila nja ntani ni Yawuda.

9 Yaa taba ma kankye seda de Ni yi nja nsu adaatolo asu ba

A nana de Ni la su a nani butu bila kesa ni masa.

Su yi aminshi ni seda de Ni yi nja su ba,

de ni butu su a siki kesa ni Masa,

sobon yomu Mirikisi nkye Na zi su ba.

10 Mirikisi nkye, Kuzukam, nsum na yaa ma seda de Na yi nja ntani Izireyila,

Obagizi nkye, a kwanki nsu zo:

Na sa doka na a tunani asu

nja Na rubuta yi a dishiya asu

Na ma Mirikisi asu

nja osu sua ma ntani na.

11 Ba nseda su de yaa kokoyi yayuwa e yi ba

ko e gye dengeri su, nkye, <Ki shina Obagizi.>

Sobon guru asu sua shina ni,

dege dende ari totolo.

12 Na yape lepi su

Na kwa turunwa lepi su gagaba.>>

13 A kiya beta ni sabuwa seda mu, Mirikisi sa seda ni pari sopa; guru mbode sopa nja bebeta yaa dede ba de yaa beeta.