1 Nkayomu bila de mu sigeba a kiya kokoyi ni pari de mu keleba a kiya ni Kiristi de muma dedeta ntani, kede e ma nkye mu kwa kapa kutiri kokoyi a kiya beigaskye ni Mirikisi nja juyi bila mbo mumungu de yaa keyi mu te amuntu; 2 nja kokoyi a kiya tunkwasa nja ja nani anabirika, nja a kiya dege a kumsha, nja shiriya nana karishe. 3 Sigeba na mwa yi! Nde Mirikisi yeda.

4 Sobon worede su juyi bila beigaskye su, yaa yi kyawu de akwa juyi su zo a beigaskye jaja? Worede su taba ma a siki asikye Mirikisi, su kwa kpa kyawuta ni bisi worede su samu lobo asu a siki Aworo Nsuseki, 5 worede su zi zanki beta Mirikisi nja sori ni sana nsu zo. 6 Nde su juyi bila beigaskye asu! e yi kyawu de akwa kuma nsu mbayi ba, sobon su kwa gidiri Yaa Mirikisi ni bi aka a siki juyi mbayi asu de su yi nja su beyi kumnya a geba ntani.

7 Mirikisi yi kesa de riki ma sonka a kiya e yi kowoni kwanki, de ma butu ni sanwa mbombom nsu anpani ba nsu bikiya ayan, kesa mu na ma keleba anabirika Mirikisi. 8 Sede kesa de ma butu ni ankwanya nja mumungu sanwa e ma ni ampani ba Mirikisi yaa yi kesa ni gbotuma. A karishe yaa suwuta e yi.

9 Sede yayuwa mu kode muma gye ku yiri beta mu, muma ni shaka a kiya ku ba, de mu nkye ku la turiki de pi kyawu de yaa sila nku. 10 Mirikisi ma gangasi la; yaa mosi ni anki ku de ku yi ba ko so aku de ku ma nana nsubiya Yesu kwanki de kuma sua su nto ba ku sigeba ni sua su nto. 11 Mwa so kowoni nse a siki ku e sigeba ni yi anki ni sori dishiya ari karishe, de ku samu sika ni mbo worede ku sadishiya a kiya su. 12 Mwa bila de kuma okyabo ba, sede ku kokoyi mbode worede su beigaskye su meyi, suuuuuui

13 Kwanki de Mirikisi yi Abireyi anikowori, Mirikisi yi anikowori ni melese. Tunde nseda ma de pi yi girima ba e melese ni nkiya e yi, 14 Mirikisi nkye, <<Ni gaskye na sa ke anabirika nja Na sa juriya ke e ma nyowa.>> 15 A beyi de Abireyi yi takuwa nja kadishiya, e keleba mbode Mirikisi yi anikowori. 16 Ntani su ma melese ni worede su pi su girima, yomuna melese asu yaama gaskye de kede su yi musu. 17 De Mirikisi bila de e nana mu anikowori yi a pili nkye yaa taba shenja anikowori yi ni anabirika de yi mu nshi ba; se e yi anikowori ni melese. 18 Mbo guda bi ma, de sua shenja ba Mirikisi yaa taba pala yaruwa ba. Tunde nsum ma mbo ja sori guyam na soseyi anya mu, omu de mu samu sila e kamata de mu ka mbomu de mu sadishiya a kiya e yi nsori. 19 Sadishiya mu e ma gaskye la de ma kankye mbode ka dishiya mu, mua yi womba ko shaka ba. E shiya yaa yuru ari siki beyi totolo labile mu ni anya Nsuseki ni gizi Mirikisi. 20 Yesu de e shiya ma ni pari de yuru anya ni. E yuru sobon nja mu la e shi de e ma Totolo Pirisi ni ari gbogbogbo kankye yiride Melkizedek ma pirisi ni Mirikisi.