1 Beigaskye e shiya ma tabeshi nkye mbode mu sadishiya mua samu kode nkye mu geni yi ni ndani mu ba sede mu yeda mwa keleba. 2 Te anya beigaskye la nsu adatolomu jima Mirikisi.

3 Sobon te anya beigaskye na mu shina nkye Mirikisi yi durinya te anya kelima e yi, sobon mbode mwa geni mu su yi te anya mbode mua geni ba na.

4 Beigaskye na sa Abila beyi sedeka de jima Mirikisi pi yayiwa e yi Kayinu. Te anya beigaskye, Abila samu jima anya Mirikisi nkye e ma nse gangasi, sobon Mirikisi nkiya yi yeda nsedeka yi, te anya beigaskye Abila, kode nkye e muntu e tuku meyi beta.

5 Te anya beigaskye la Enoku muntu ba. momoko yomu, su leyi ta bisi anya Mirikisi, nseda geni yi ba, sobon Mirikisi leyi ta bisi. Beta Mirikisi pala nkye kami de su la Enoku ta bisi su beyi sheeda nkye e jima Mirikisi. 6 Ba nsude yaa jima Mirikisi nde e beigaskye ba, sobon du nsude yaa zo anya Mirikisi dole na e beigaskye nkye Mirikisi ma nja yaa ba worede sua bila e yi nani wuta.

7 Te anya beigaskye na Nuwu zi gila ni Mirikisi a kiya mbode yaa paru a geba de e geni ba. Nuwu yi biyaya nja Mirikisi e ki la kwanto totolo de e shi nja ntani gizi yi su sila. Te anya yomuna Mirikisi bebeta durinya mu, se Nuwu keleba gangasi Mirikisi te anya beigaskye.

8 Te anya beigaskye na Abireyi yi biyaya kwanki de Mirikisi sukwa yi de e te a kesa de Mirikisi yi anikowori de yaa beyi. E bila kesa e yi e shina ko angana yaa te ba. 9 Te anya beigaskye Abireyi ma bakwe a kesa de Mirikisi yi anikowori de yaa beyi. Abireyi zunwa a rugwa, nja Ishaku nja Yakubu, de su keleba anikowori yiri daa dege anya Mirikisi. 10 Sobon Abireyi zunwa ma pekye totolo geri de Mirikisi shiriya nja gina, geri totolo de kutiri kapa.

11 Te anya beigaskye e shina sa Abireyi ma adaa, kode nkye e rigye sopa soseyi nja Saratu awari mase e mani yaya ba. Yaa pekye Mirikisi de sika anikowori yi. 12 Kode Abireyi ma kankye mumuntu nse e sopa yaa yapu ba, Mirikisi beyi yaya nyowa kankye kemu bisi nja yaya kankye nyashi ndani riki.

13 Guru ntani worosu mu su yi zunwa beigaskye ari nana de su muntu, su keleba anikowori de Mirikisi yi su nshi ba, sede su geni yi nyisa nja su keleba e yi ni peri siki de su geni yi, nja su kwa yeda su ma bakwe la a siki durinya mu. 14 Worede su pala yomu, su nana a pili nkye su ma bila kesa ni kiya su. 15 Nde ntani worosu mu su yi tunani kesa de su bila e yi a beyi ba, da sua man dama de su kuma nbeyi. 16 De yaama yomu, su yi memeri kesa kyakyawu de sua bila, woto bisi. Sobon yomu Mirikisi yaa zi kumnya de su sukwa yi Mirikisi asu ba, sobon Mirikisi gyala geri totolo sobon nsu.

17 Te anya beigaskye na Abireyi, la yaa yi Ishaku beyi sedeka, a kwanki Mirikisi gwada e yi. Abireyi de e shiya ma nsu de yaa keleba anikowori mu, yaa so de e la yaa daa kin beyi sedeka, 18 kode nkye Mirikisi gye yi nkye te anya Ishaku na ka mani juriya de ni yi anikowori.

19 Sobon Abireyi shina nkye Mirikisi yaa yiya dege Ishaku a kumsha, Abireyi keleba Ishaku nleyi dege muntu.

20 Te anya beigaskye na Ishaku sa yaya ni Yakubu nja Isuwa anabirika a kiya mbode paru nsu a geba.

21 Te anya beigaskye na Yakubu sa kowoni yaa ni Yusupu anabirika kapi de e muntu, nja e yi Mirikisi bowuta de kwana a kiya gwala e yi.

22 Te anya beigaskye na Yusupu, a kwanki de e kusa muntu, Yusupu yi beta a kiya butu ni yaya ni Izireyila dege kesa ni Masa nja e kwa ja su de su la keshi nde su te bila Masa.

23 Te anya beigaskye na Adaa nja Amaa ni Musa la yi boyi wonta wuku a beyi de su yapu yi. Sobon su geni ema yaa kyakyawu la, sua zi womba ni ki biya doka ni seleki ba.

24 Te anya beigaskye na Musa, de yi girima, e ki de su shina nkye e ma yaa ni yaa Piriyona ni mase. 25 Musa yeda de Genbeki nja ntani Mirikisi momoko de e yi zunwa ni zi dadi ni lepi ni kwanki piri. 26 Musa yeda de Genbeki nja ntani Mirikisi sobon ni Kiristi de pi dereja guru mbo nani de ma a kesa ni Masa, sobon ndani yi yaa geni nani wuta de yaa samu a geba. 27 Te anya beigaskye na Musa bila kesa Masa ba womba ni anwashi ni seleki. sobon e geni Mirikisi de ndani nsebeki yaa geni ba e ki de e kuma nbeyi. 28 Te anya beigaskye na Musa shiriya buki ni nyenteri e gye su nkye su shapa zini a kopa, sobon kede Meleku ni muntu e kisa yaya pari ni Izireyila ba.

29 Te anya beigaskye na ntani ni Izireyila nyenteri totolo riki a kyekeri kesa; de ntani Masa sua yi kokori de osu ma su nyenteri du, riki alaka su.

30 Te anya beigaskye na golonwa ni Yeriko puari a kisi a beyi de yaya Izireyila gyowe yi a nana bokwe.

31 Te anya beigaskye na su kisa Rahab mase kilaki nja worede su ki zi Mirikisi, sobon e la nsu leka kesa Izireyila boyi.

32 Ni sigeba? sobon Ni man kwanki nyowa de na yi beta a kiya ni Gidiyon nja Barak, nja Samsi, nja Yepta, nja Dowuda, nja Samela nja nsu anebi ba. 33 Te anya beigaskye su yi yanki nja kesa nyowa su yi nasara. Su yi mbode ma kyakyawu se su keleba mbode Mirikisi yi su anikowori. Su ripe baki zaki, 34 su bita sori wuta, su sila ntani worede sua bila kisa su ni obalaba. Su ma mere sori, sede su zo ma nsori; su man sori anya yanki nja su shi shoja ni kesa bombom ni yanki. 35 Te anya beigaskye mata keleba dengi asu de muntu kuma ma nleyi.

Worosu, ki yeda ni pushe, su muntu a siki takaasi de su dege nleyi de yaa pi kyawu. 36 Su yi worosu dala nja dukwa, worosu su su domuna su ni serika kutiri a jaru. 37 Su kutiri su ndunsi, su laba su keshi bi, su kisa su ni obalaba. Su mayi kukyani gyewe ni keikei ni pata akuya, su mayi zunwa potoruwa, nja takaasi nja Genbeki. 38 Durinya ma kyawu ba e yi su memeri ni zunwa ba. Sua kukyani a denka nja a kiya dunsi totolo, nja a siki koga dunsi nja romu a kisi.

39 Guru ntani mu jima Mirikisi sobon beigaskye su, nzun yomu guru asu muntu ba nsude keleba mbode Mirikisi yi su anikowori. 40 Sobon Mirikisi shiriya mbo kyakyawu ba mu. Nupi ni Mirikisi e shiya ma de omu nja su gabada mwa dedeta.