1 Nkayomu tunde Mirikisi yi mu anikowori yuru a siki pushe, se mu yi ankeli kede nseda a siki amu e lesa yuru a siki gizi pushe ni. 2 Sobon mu zi manki nabari kyakyawu ni Yesu kankye yiride ntani Izireyila su zi du; sede manki nabari kyakyawu de su zi e ma ni moriya anya su ba, sobon su keleba yi ni beigaskye ba. 3 Sede omu de mu beigaskye la mua yuru a siki kesa pushe ni Mirikisi mu, yiride e pala nkye,

<<Sobon de ni yi anwashi ni melese nkye,

<Sua taba yuru a siki kesa pushe na ba.> >>

Mirikisi pala yomu ko de e rigye gama ankiyi tun a kwanki de su yi durinya. 4 Sobon anya daa a siki beta Mirikisi yi beta a kiya nana ni bokwe nkye: <<A nana ni bokwe Mirikisi pushe a siki guru ankiyi de yi.>> 5 Yomuna Mirikisi yi beta anya daa a siki beta e yi nkye, <<Sua taba yuru a siki kesa pushe naba.>>

6 Worede para zi manki nabari kyakyawu mu su yuru a kesa pushe mu ba sobon su yi lesa zi. Nzun yomu worede su beigaskye su yeda su de su yuru a siki pushe mu 7 Nkayomua Mirikisi kwa shiriya nana daa, de e ma yawu, de Mirikisi yi beta a kiya nana mu a beyi shekera nyowa de su bise a baki Dowuda a siki beta Mirikisi nkye:

<<Yawu nde ku zi murinya Mirikisi,

kede ku yi tori kiya.>>

8 Nde Yoshuwa ba ntani Mirikisi pushe mu, Mirikisi yaa kua yi beta a beyi a kiya nana pushe daa mbom ba. 9 Nkayomu e nana nkye nana Pushe de ma kankye nana pushe ni Asibi sobon ntani Mirikisi; 10 guru worede su yuru a siki pushe ni Mirikisi de e yi anikowori sua pushe a siki ANKI asu kankye yiride Mirikisi pushe de e gama ANKI yi. 11 Nkayomu, mu yi kokori amu de mu yuru a siki pushe mu, sobon kede nseda e yi yaa yuru ba yiride nsu adaatolo mu su yi sobon rishi beigaskye.

12 Kelima Mirikisi e man leyi nja sori anki. E mani shapi pi kowoni obalaba nsu baki bi, e ma laba leyi nja aworo, e ma laba gaba nki nja romo keshi; e pelesa tunani nsebeki nja guru mbode ma a siki dishiya. 13 Ba mbode ma boyi Mirikisi ba. Guru mbode e yi ma a bure a geba yi. Konwawa yaa sakisi a geba e yi yaa pala guru mbode e yi a siki zunwa yi ni durinya mu.

14 Nkayomu, tunde mu mani totolo pirisi de e nyunwa te a bisi a geba Mirikisi, e shiya ma Yesu Yaa ni Mirikisi, se mu sakisi nsori a siki beigaskye de mu yeda nshi. 15 Totolo Pirisi amu e ma nsude shina rishi sori amu la. E shiya su gwade yi a turiki mbombom, kankye yiride su gwada mu, nzun yomu e yi lepi ba. 16 Nkayom, bila de mu yi sori dishiya de mu zo a geba kingbolo solota Mirikisi, anya de mua keleba toseyi nja aniyeri de yaa sua mu nto a kwanki de mwa bila e yi.