1 Seda ni pari ma ni doka ni bowuta nja anya bowuta nsuseki de ntani shiriya a durinya mu. 2 Ntani Izireyila gina rugwa ba Mirikisi, a siki yi e ma ni gwala lete pitila, teburu nja buredi de su beyi ba Mirikisi. Woze yi sua sukwa e yi Anya Nsuseki. 3 A beyi labile ni bi, rugwa daa ma de sua sukwa yi anya de pi Seki. 4 A siki anya de pi seki mu begedi aziripa daa ma de sua suwuta tularee nsu kemeshi nja Akpati Anikowori mani zinari a keteri yi guru. Akpati Anikowori mu su ripe yi ni aziripa a siki yi gongo ni aziripa nja maana ma, nja gwala tepiya ni Aruna de tompa ni genya, nja dunsi bi palapa de su rubuta doka a siki yi. 5 A bisi Akpati seda meleku bi ma a kiya e yi de su ma nana dereja Mirikisi, meleku woromu su bure kelebeta asu ripe anya de Mirikisi yaa nana toseyi nja yape lepi. Sede kuzukam e ma kwanki de Na gye ku guru mbo naba.

6 Yomuna de su gyala guru mbo woroni. Pirisi su ma a woze ni rugwa kowon nana su ma yi anki su, 7 sede tolense pirisi e shi dandaa e yi na e ma yuru a sikisiki rugwa de yi lepa, son daa a shekera, e ma yuru ni zini, de yaa munka Mirikisi sobon kiya yi nja lepi de ntani yi de su shina nkye e ma lepi ba. 8 Yomuna Aworo Nsuseki ma nana nkye turiki ni yuru anya Nsuseki mu tuku bure woba tunde rugwa ni pari tuku sakisi ayan. 9 Da mu e shiya ma alama ni kwanki mu, E ma nana nkye kyawuta nja sedeka de Pirisi munka te nja Mirikisi yaa sa dishiya nsebeki de mayi bowuta e ma sere ba. 10 Tunde e ma a kiya mbosi, riki ni sha, nja worosu buki ni wonkye nki. Woromu guru ma doka ni geni ndani la, kapi de Mirikisi kapa sabuwa doka. 11 Sede Kiristi rigye zo ma tolense pirisi ni mbo kyakyawu de rigye ma kuzukam. E yuru a Rugwa de pi girima nja kyawu soseyi; ba rugwa de nsebeki na gini ba, woto, yiri rugwa ni ma durinya mu ba. 12 Kiristi yuru anya de Pi Seki son daa na, e la zini ni nsu akuya nja nsu saa de e munka sedeka ba; sede, e yi anpani ni zini yi de mu samu sila ni gbogbo. 13 Zini nsu akuya nja saa nja busi yaa saa su yaapi a nki ntani worede su man seki ba, nsum ma sa nsu dola ema mere dola a nki. 14 Tunde nsum ma gaskye la, mina mua pala a kiya zini Kiristi! de e beyi kiya e yi te nja Mirikisi te anya Aworo ni gbogbo e munka nki yi sedeka dedeta ba Mirikisi. Zini Yesu yaa shire tunani dishiya mu sere de mu juyi bila mbo mumungu, sobon de mu bowuta Mirikisi Nsu Leyi!

15 Sobon delili mu na Kiristi ma nsu sakisi a sisika Mirikisi nja ntani a siki sabuwa seda mu, sobon worede Mirikisi sukwa su, su samu anabirika ni gbogbo de Mirikisi yi su anikowori. Da mu e ma yomu la sobon muntu daa rigye paru de ba ntani yenshi dege lepi de su yi a kwanki de seda ni pari tuku ma.

16 Nde nseda yi seda a kiya nsude yaa si gado yi e ma dole na nseni e muntu tuku. 17 Sobon anikowori ni nsu si gado e mani sori ba sobon nsude yi anikowori e man leyi; ba nsude yaa yi anpani ni anikowori yi ba, se a beyi de muntu. 18 E shiya sa anikowori ni pari e mani sori de yaa sila ni ntani ba, se su yi anpani ni zini. 19 Beyi de Musa gye ntani guru mbode ma a siki takada doka Musa. Se e la zini nsu saa nja akuya, e dama e yi nja riki, se e la ntasi dende de sua sukwa yi isop nja gesa ni timshiya de ma zanza e yaapi a siki takada doka nja guru ntani. 20 Musa nkye, <<Osu na ma zini seda, de Mirikisi beyi doka nkye ntani su biya.>> 21 Yomuna du Musa kwa yaapi zini a rugwa Mirikisi nja guru mbode sua yi anpani nshi ni bowuta. 22 Gaskye, te doka Musa na guru mbo ni zini na yaa ma sere, zini te nya ba sua yape lepi ba.

23 Mbo worosu mu, e ma kamani ni mbo worede su ma a bisi, dole su wonkye su a turiki ni. Sede mbode ma a bisi nkyasu sua bila kyakyawu sedeka de pi worosu mu. 24 Sobon Kiristi yuru a siki anya Pi Seki de nsebeki na yi ba, de e ma kamani ni anihi mbode ma a bisi. E yuru a siki bisi nkiya yi, anya de e beyi kiya yi a geba Mirikisi sobon mu. 25 Tolense Pirisi ni Yawudawa yaa yuru anya Pi Seki kowon shekera ni zini daba. Sede Kiristi yuru a siki anya ni de e munka nki yi kowon kwanki naba, 26 sobon yomu la, e ma dole na Yesu e Genbeki nyowa tun dege pari durinya. Sede kuzukam, e pelesa kiya yi son daa a karishe sana sobon de e butu lepi ntani te anya beyi kiya yi sedeka. 27 Konse e ma dole na e muntu sen daa, a beyi nsum Mirikisi yaa yi shiriya, 28 Yomuna Mirikisi munka Kiristi sedeka son daa de e la lepi ntani nyowa; Yaa kuma zo ni bi, ba yaa zo de e la lepi na ba, sede e sila ni worede sua pekye yi.