1 Doka ni ntani Yawudawa ma kamani mbo kyakyawu de yaa zo a geba na; e shiya ma aniyi mbo woroni ba. Sobon yaa taba sila ntani dege lepi su ba, te sedeka de sua beyi shekera beyi shekera? 2 Nde ntani de sua bowuta Mirikisi wonkye lepi su, sua kwa yi tunani lepi ba, yomuna guru sedeka yaa sakisi. 3 Sede sedeka mu, sua munka yi a kowon shekera de su turunwa ntani lepi su na, 4 Sobon zini ni saa ko ni timshiya yaa taba shire lepi ba.

5 Sobon delili mu na, Kiristi yaa bilade zo a siki durinya, e pala gye Mirikisi nkye:

<<Ka bila Sedeka nja beiko ba,

sede ki ba ni nki.

6 Ka bila de ntani su beyi sedeka ni daba susuwuta a begedi ba

ko sedeka ni shire lepi su ba.

7 Se Kiristi nkye, <Mirikisi E ni naka anya mu,

Obagizi, na yi mbode ka so,

Yiride e ma rubutu a takada doka Musa.>>>

8 A pari e pala nkye, <<Sedeka nja beiko, nja sedeka daba susuwuta a begedi, nja sedeka ni yape lepi ba,>> <kode doka yaa bilade su yi su yomu>. 9 Se e pala nkye, <<Obagizi, E ni naka anya mu, de na yi mbode ka so.>> Se Mirikisi la sedeka ni wuri e sa sedeka ni Kiristi amomoko ni bi anya su. 10 Sobon Yesu Kiristi yi mbode Mirikisi yaa bila de yi, guru amu su wonkye mu dege lepi te anya sedeka de yi ni nki yi son daa sobon guru amu nsuseki.

11 Kowoni pirisi ni Yawudawa sua yi ANKI asu kowon nana sua munka sedeka yirida a kwanki nyowa; sede sedeka mu yaa taba la lepi ni ntani ba. 12 Sede Kiristi munka sedeka son daa sobon lepi, sedeka de man kyawu gbogbo, e zunwa a nani dama ni Mirikisi. 13 Anya ni e pekye ari Mirikisi sa nsu oboki gebeyi a kisi seni yi de e taka su. 14 Ni sedeka daa mu, se, Mirikisi sa ntani su ma dedeta gbogbo worede su wonkye su dege lepi.

15 Se Aworo Nsuseki kwa beyi sheeda mu a kiya Yesu. E pala nkye,

16 <<Nsum nama seda de Na yi nja su

Obagizi nkye, mbode Na yi mpari naka a kwanki nsu zo.

Na sa doka na a dishiya su,

Na sayi a siki tunani su.>>

17 Se e kwa pala nkye: <<Na turunwa ni lepi su nja mungu de su mayi gagaba dirim.>> Mma kwa turunwa nsu gagaba.>>

18 De Mirikisi yape ntani lepi su, sedeka ni la lepi ma kuma ba

19 Yayuwa na, tunde mwa sadishiya nkye mwa yuru anya Pi Seki te anya muntu ni Yesu, 20 E bure mu turiki sabuwa, turiki ni leyi, te anya labile, de ma nki yi, 21 Mu mani totolo pirisi nsu kone gizi ni Mirikisi. 22 Se mu zo kusa ni Mirikisi ni dishiya kyakyawu nja tabeshi gaskye, ni dishiya mu sere de ma wonkye dege lepi nja wonkye nki ni riki sere. 23 Bila de mu sakisi nsori a kiya sadishiya, sobon mu yeda nkye Mirikisi yaa yi mbode e yi anikowori. 24 Bila de mu kula ni nkyamu, de mu sua nkyamu nto anya so nja yi mbo kyakyawu. 25 Kede mu bila tala kiya mu, yiride worosu su su ma yi. De mwa yi yomu, se mu ja nkyamu sori guyam, tunde mu shina nkye nana zo ni Obagizi yi kusa.

26 Sobon ba woni sedeka de yaa la lepi nde mu sigeba ni yi lepi a beyi de mu rigye shina gaskye. 27 De yaama yomu, mbode rigye e shiya ma pekye a siki womba ni shiriya de yaa zo nja wuta nsu zapi de yaa shuwuta nsu oboki geba Mirikisi! 28 Du nsude ki biya doka Musa sua kisa yi ba toseyi anya sheeda ni ntani bi ko wuku. 29 Yaya, na, worede nene Yaa Mirikisi? Nsude yi banza ni zini ni seda Mirikisi de wonkye su dege lepi? Nsude basi Aworo ni aniyeri Nsuseki, woni mumungu poro na kwa geni sua yi nse ni? 30 Sobon mu shina nsude nkye, <<E ni na na lama; lama ma nna na,>> e kwa nkye, <<Obagizi yaa yi ntani yi shiriya.>> 31 Yaa ma mbo womba de nsebeki puari a nani Mirikisi nsu leyi. 32 Ku turunwa yiri mbode paru nja ku a beyi. A kwanki de bishe, beyi de asikye Mirikisi nana a kiya ku, ku Genbeki mbo nyowa, nzun yomu ku sakisi nsori. 33 A worosu kwanki su ma basi ku a pili nja ku Genbeki soseyi, a worosu su kwanki ku la kiya ku ma daa nja worede su yi su yomu. 34 Ku zi toseyi worede su ma a jaru, ku yi peri siki de su keleba ku mbode ku man shi, sobon ku shina nkye oku nkiyaku ku mani mbo kyakyawu de yaa ma ari gbogbo. 35 Sobon yomu ku sakisi nsori dishiya sobon nani wuta ku yaa ma totolo. 36 E kamata de ku yi takuwa, sobon de ku yi mbode yaa jima Mirikisi de ku keleba mbode e yi ku anikowori. 37 Yiride, takada Mirikisi nkye,

<<Yaa dede ba,

nsu zo mu yaa zo;

yaa taba dede ba.

38 Ntani na gangasi, sua mani leyi te anya beigaskye;

Sede nde nseda a siki su juyi mbayi,

Na zi dadi yi ba.

39 Sede omu muma ntani de su juyi beyi te alaka na ba, sede worede su beigaskye ni sila su na.