1 ዳዊቲ ዉርሴን ሃሳይዳ ቃላይ ሃይሳፌ ካሊዛይሳ፤

«ያቆቤ ጾሳን ቲዬቲዳይሲ፥

ኡባፌ ቃ ጾሳይ

ቁ ቁ ሂስቲዳ ኣሲ፥

ኢስራኤሌን ዶሴቲዳ ዬንቻይ፥

ኢሴዬ ና ዳዊቴ ቲንቢቴ

ቃላይ ሃይሳ፤

2 «ጎዳ ኣያናይ

ታ ባጋራ ሃሳይዴስ፤

ኢዛ ቃላይ ታ ዶናን ዴስ።

3 ኢስራኤሌ ጾሲ ሃሳይዴስ፤

ኢስራኤሌ ዛላይ ታስ፥

‹ኣሳ ጺሎቴን ሃሪዛይ፥

ጾሳ ያሻቴን ኣይሲዛይ፥

4 ኢዚ ሻራይ ባይንዳሶን፥

ማላዶ ጻልቄይ ኬዚዛ

ዎዴ ዲዛ ፖኦ ማላ፤

ኢዚ ቢታ ቦላ ማታ

ፑርጪሲዛ ጻልቄ ማላ፥

ኢራይ ቡኪ ኣሺን

ኬኢዛ ኣዋ ማላ› ጊዴስ።

5 «ታ ኬ ጾሳ ማታን

ሊኬ ጊዴኔ?

ኡባ ሚሽ ጊግሲዲኔ ናጊዲ፥

ታናራ ሜርና ጫቆ ቃላ

ጌሊዳይ ኢዛ ጊዴኔ?

ታ ኣቶቴ ፖሎ ጋናይ

ታ ኣሞ ኡባ ታስ ኢማናይ

ኢዛ ጊዴኔ?

6 ጊዶ ኣቲን ኢታ ኣሳቲ ኡባይ፥

ኩሼን ሺሻና ዳንዳዬቶንታ

ኣጉን ማላ

ዎራ ዎና።

7 ኣጉን ቦቺዛ ኡባስ፥

ቢራታ ዎይኮ

ቶራ ቶማ ኮሼስ፤

ኢስቲ ባ ዲዛሶን ሙሌራ

ታማን ጹጌታና።»

8 ዳዊቴስ ኤሬቲዳ ቃራ ኣሳታ ሱን ሃይሳፌ ካሊዛይሳ፤ ኮይሮይሲ ታሂኪሞኔ ዴሬ ኣስ ዮሼቢ-ባሼቤቴ ጊዲሺን ኢዚ ሄ ሃላቃታስ ሃላቃ፤ ኢዚካ ኢሲ ኦላን ባ ቶራ ጾንጊዲ 800 ኣስ ዎዳ ቃራ።

9 ናምኣንዚ ኣሂሆሄ ዴሬ ኣስ ዶዴ ና ኤልኤዜሬ፤ ኦሌታናስ ኢሲ ቦላ ሺቂዳ ፊሊስጼሜ ኣሳይ ኤቄቲዛ ዎዴ ኢስራኤሌ ኣሳይ ባቃቲዴስ፤ ዳዊቴራ ዲዛ ሄ ቃራታ ጋርሳፌ ኢሶይ ኢዛ። 10 ኢዚ ጊዲኮ ባ ኤቂዳሶ ዬዲቤና፤ ኢዛ ኩሼይ ኣርጋጫናሼኔ ማሻራ ኢሲፌ ኦይኬታናሼ ጋካናስ ፊሊስጼሜታ ኦሊዴስ፤ ሄ ጋላስ ጎዳይ ኢዛስ ጊታ ጾኖ ኢሚዴስ። ባቃቲ ቢዳ ኦላንቻቲ ሃይቂዳ ኣሳፔ ኦላ ሚሺኔ ማይኦ ጻላ ቃራታናስ ኤሌኤዜሬኮ ጉዬ ሲሚዳ።

11 ሄንዚ ሃራሬ ዴሬ ኣስ ኣጌ ና ሻማ፤ ፊሊስጼሜቲ ሌሃን ኩሜ ሚሲራይ ዜሬቲዳ ጋዴን ኢስቲ ኢሲ ቦላ ሺቂ ዲሺን ኢስራኤሌ ኦላንቻቲ ፊሊስጼሜታ ሲንፌ ባቃቲዳ። 12 ሻማይ ጊዲኮ ባ ኤቂዳሶ ዬዲቤና፤ ሄ ኦላ ኤቄቲዲ ፊሊስጼሜታ ዎዴስ፤ ሄ ጋላስ ጎዳይ ጊታ ጾኖ ኢሚዴስ።

13 ካ ሺሾ ዎዴ ፊሊስጼሜ ኦላንቻቲ ኤራፋይሜ ዙሌን ዱንካኒ ኡቲዳሼ ሄ ታሙ ሃላቃታፔ ሄቲ ዳዊቲ ዲዛሶ ኣዱላሜ ጎንጎሎ ዪዳ። 14 ሄ ዎዴ ዳዊቲ ሚጻ ጊዶን ዴስ፤ ፊሊስጼሜ ኦላንቻቲ ቤቴሊሄሜን ዴቴስ። 15 ዳዊቲ ላሞቲዲ፥ «ቤቴሊሄሜ ፔንጌ ኣቻን ዲዛ ኦላ ሃፌ ታስ ኦኔ ኤሃናይ!» ጊዴስ። 16 ሄሳ ጊሻስ ኤሬቲዳ ኦላ ቃራ ሄቲ ፊሊስጼሜ ኦላንቻታ ጊዶራ ካን ቢዲ ቤቴሊሄሜ ፔንጌ ኣቻን ዲዛ ሃ ኦላፌ ዱቂ ዳዊቴስ ኤሂዳ፤ ኢዚ ጊዲኮ ጎዳ ሲንን ያርሾ ሂስቲ ጉሲዴስ ኣቲን ኡዪቤና። 17 «ኣቤት ጎዳዉ! ሃይሳ ማላ ኦሶ ታ ዎስታ ኦ? ሃይሲ ታፔ ሃኮ! ሃይሲ ባንታ ሼምፖ ቦላ ፒርዲዳ ኣሳታ ሱ ዴኔ?» ጊዲ ዳዊቲ ኡያና ኮዪቤና፤ ሄኮ ኤሬቲዳ ሄ ኦላ ቃራቲ ኦዳ ጎባቴ ኦሶይ ሄሳ።

18 ጹሪያ ና ኢዮኣቤ ኢሻ ኣቢሳዬይ ሄ ኤሬቲዳ ኦላ ቃራታስ ሃላቃ፤ ሄ ጼቱ ኣሳ ቦላ ባ ቶራ ጾንጊዲ ዎዳኔ ሃ ሄ ቃራታ ማላ ኤሬቲዳ ጎባ ኣሳ። 19 ኣቢሳዬይ ሄታፔ ቦላራ ኬሂ ኤሬቲዳ ኣስ ጊዴኔ? ኢዚ ኢስታፌ ጊዶንታ ኣጊኮካ ኢዚ ኢስታስ ሃላቃ።

20 ሃራ ኤሬቲዳ ቃራይ ቃብጺኤሌ ዴሬ ኣስ ዮዳሄ ና ባናያይ ጊታ ኤሬቲዳ ኦሶ ኦዴስ። ኢዚካ ናምኡ ኤሬቲዳ ሞኣቤ ኣሳታ ዎዴስ፤ ቃሴካ ሻቺ ቡኪዳ ጋላስ ኦላ ጊዶ ጌሊዲ ጋሞ ዎዴስ። 21 ሄሳካ ኢሲ ጊታ ጊብጼ ኣስ ዎዴስ፤ ሄ ጊብጼ ኣዴዚ ባ ኩሼን ቶራ ኦይኪዴስ፤ ጊዶ ኣቲን ባናያይ ኢዛራ ኦሌታናስ ጉፌ ኦይኪዲ ኢዛኮ ቢዴስ፤ ጊብጼ ኣዴዛ ኩሼፔ ኢዛ ቶራ ዎ ኤኪዲ ኢዛ ቶራን ኢዛ ዎዴስ።

22 ዮዳሄ ና ባናያ ጎባቴ ሄሳ፤ ኢዚካ ኤሬቲዳ ሄ ቃራ ኣሳታ ማላ ኤሬቲዳ ጎባ ኣሳ። 23 ኢዚ ሄ ሄ ታሙ ኣሳታፔ ኣ ቦንቼቲዳዴ፤ ጊዶ ኣቲን ኤሬቲዳ ሄ ቃራ ኣሳታ ማላ ሳቤቴና። ዳዊቲ ባናያ ባ ቦንቾ ዛቤታ ቦላ ሹሚዴስ።

24 ሄ ሄ ታማታፔ ባጋይታ ሱን ሃይሳፌ ካሊዛይሳ።

ኢዮኣቤ ኢሻ ኣሳሄሌ፥

ቤቴሊሄሜ ዴሬ ኣስ ዶዴ

ና ኤልያኔ፥

25 ሃራሬ ዴሬ ኣስ ሻማሃ፥

ሃራሬ ዴሬ ኣስ ኤሊቃ፥

26 ፓሊጼ ዴሬ ኣስ ሄሌጼ፥

ቴቁሄ ዴሬ ኣስ ኢቄሻ

ና ኢራ፥

27 ኣናቶቴ ዴሬ ኣስ ኣቢኤዜሬ፥

ሁሼ ዴሬ ኣስ ሜቡናዬ፥

28 ኣሂሆሄ ዴሬ ኣስ ጻልሞኔ፥

ናጾፌ ዴሬ ኣስ ማሂራዬ፥

29 ናጾፌ ዴሬ ኣስ ባኣና

ና ሄሌቤ፥

ቢኒያሜ ባጋፌ ጊቢኣ ዴሬ ኣስ ኤሪባዬ ና ኢታዬ፥

30 ፒራቶኔ ዴሬ ኣስ ባናያ፥

ጋኣሼ ዙሌ ኣስ ሂዳዬ፥

31 ኣራቤ ዴሬ ኣስ ኣቢ-ኤልቦኔ፥

ባርሁሜ ዴሬ ኣስ ኣዚሞቴ፥

32 ሻልቦኔ ዴሬ ኣስ ኤሊያሂቤ፥

ያሼኔ ናይታ፥

ዮናታኔ፥

33 ሃራሬ ዴሬ ኣስ ሻማሃ ና፥

ሃራሬ ዴሬ ኣስ

ሻራሬ ና ኣሂኣሜ፥

34 ማኢካቴ ዴሬ ኣስ

ኣሃሲባ ና ኤልፋሌጼ፥

ጊሎ ዴሬ ኣስ

ኣክጾፌሌ ና ኤልኣሜ፥

35 ቃርሜሎሴ ዴሬ ኣስ ሄጺሮ፥

ኣራቤ ዴሬ ኣስ ፓራዬ፥

36 ጾባ ዴሬ ኣስ

ናታኔ ና ዪጊኣሌ፥

ጋዴ ዴሬ ኣስ ባኔ፥

37 ኣሞኔ ዴሬ ኣስ ዛላቃ፥

ጹሪያ ና ኢዮኣቤስ

ጎንዳሌ ኦይኪዛ ቢኤሮቴ

ዴሬ ኣስ ናሂራዬ፥

38 ያቲሬ ዴሬ ኣስ ኢራ፥

ያቲሬ ዴሬ ኣስ ጋሬቤ፥

39 ሄሳካ ሂቴ

ዴሬ ኣስ ኦሪዮ፥

ኢስቲ ኢሲ ቦላ ሄ

ታማኔ ላፑና።