1 ኡባፌ ዎልቃማ ጎዳይ ታና ሃራ ኣጁታ ቤሲዴስ፤ ሄሲካ ቴራይ ኢዛን ኩሚ ዲዛ ኬሼ። 2 ጎዳይ ታና፥ «ሄሲ ኔ ቤኢዛይሲ ኣዜ?» ጊ ኦይቺዴስ፤ ታኒካ ኢዛስ፥ «ቴራራ ዲዛ ዳቾ ቤያይስ» ጋዲስ፤ ቃሴካ ጾሲ ታስ፥ «ታ ዴሬ ኢስራኤሌስ ዉርሴ ጋኪዴስ፤ ሃይሳፌ ጉዬን ታኒ ኢስታ ቃጻዮንታ ኣጊኬ።

3 «ኢስቲ ጾሳ ኬን ሲሲዛ ዬይ ሄ ዎዴ ዬሆን ላሜታና፤ ዳሮ ኣሳ ኣሃይ ኣዋን ኣዋንካ ኩንዲ ኣታና፤ ኣዋንካ ጮ ዬጌቲ ኣታና» ጌስ።

4 ኢንቴኖ ሜቶቲዳ ኣሳ ቆሂዛይቶ!

ቃሴ ማንቆታ ቢታፌ ይሳና

ኮይዛይቶ! ሃይሳ ሲዪቴ!

5 ኢንቴ፥ «ኑኒ ኑ ካ

ባይዛና ማላ

ኣጊና ጼሮን ቦንቺዛ

ባኣሌይ ኣይዴ ኣኔሻ!

ኑኒ ካ ጊያ ጌልናስ

ሳምባታይካ ኑስ ኣይዴ

ኣኔሻ!

ሄ ባኣሌይ ኣኮ

ኑኒ ማካ

ሚሻ ጉዲ

ኣልኦ ዋጋን ባይዛና፤

ቃሴካ ዎርዶ ሜዛኔን

ኣሳ ባሌና።

6 ጊስቴ ሃርቆካ ሙሩታ

ጊስቴ ዋጋን ባይዛና፤

ማንቆታ ቢራን፥ ሜቶቲዳይታካ

ቶሆ ጫማን ሻማና» ጌታ።

7 ያቆቤይኔ ኢዛ ዜሬቲ ኢዛን ጬቄቲዛ ጎዳይ፥ «ኢስቲ ኦዳ ኦሶ ኡባ ታኒ ባሊኬ፤ 8 ሃይሳ ጌዶን ቢታይ ቡሮ ቃጻና፤ ቢታይ ቦላ ዲዛይ ዉሪካ ዬካና፤ ኣባዬ ሻፋይ ኪጺዲ ጉሚዛይሳ ቢታ ኡባይ ቃ ዮሺኩዮሺካና» ጊዲ ባርካ ባናን ጫቂዴስ።

9 ኡባፌ ዎልቃማ ጎዳይ፥ «ሄ ዎዴ ታኒ ጋላሳ ሴታን ኣዋ ኣርሼ ዉልሳና፤ ጋላሳ ሴታን ጋዴ ሚሳና። 10 ኢንቴ ላይን ላይን ቦንቺዛ ባኣሌዛ ዬሆን ላማና፤ ኢንቴ ዬጺዛ ዬካ ዋሶን ላማና፤ ዲዛ ፔጺ ኢሲ ናይ ሃይቂን ጫሞ ዬሆ ዬኪዛ ኣሳ ማላ ኢንቴ ኢንቴ ሁኤ ቢናና ቡጪዲ ማቃ ማይኣና ማላ ታኒ ኢንቴና ኦና፤ ሄ ዉርሴ ጋላሳይ ጫሞ ጋላስ ጊዳና።

11 ሄኮ ታኒ ቢታ ቦላ ኮሻ ኤሃና ዎዴይ ያና፤

ሄሲካ ኣሳይ ጾሳ ቃላ

ሲያና ጋፋኔ

ሳሞ ኣቲን ካ ጋፋኔ

ሃ ሳሞ ጊዴና።

12 ዴሬይ ዉሪ ፑዴሃፔ

ዱጌሃ ጋካናስ

ኣርሼይ ሞኪዛሶፔ

ዉሊዛሶ ጋካናስ

ጎዳ ቃላ ኮሽ

ያኔ ሃ ዬሞታናሺን

ዴሜና።

13 ሄ ዎዴ ሎኦ ጌላኦቲኔ

ሚኖ ፓንቲ

ሳሞፔ ዴንዳናይሳን

ዳቡራና።

14 ሳማሪያ ዴሬን፥ ‹ኣሻሞ›

ጌቴታ ጼይጌቲዛ

ኤቃ ጾሳይን ጫቂዛይቲ፥

‹ዳኔ ጾሳይ ቤዪን›

ዎይኮ፥ ‹ቤርሳቤሄ

ጾሳይ ቤዪን›

ጊ ጫቂዛይቲ ዉሪካ ኩንዳና፤

ባ ኩንዲዳሶሆፔ ሙሌካ

ዴንዳናስ ዳንዳዬቴና» ጌስ።