1 ኤራ ናይ ባ ኣዋ ዞሬ

ዎዚናፔ ሲዬስ፤

ቂልጪዛይ ጊዲኮ ሴራ ሲዬና።

2 ኣሲ ባ ዶናፔ ኬኢዛ ቃላን

ሎኦ ሚሽ ዴሜስ፤

ኣማኔቶንታይቲ ጊዲኮ

ማካላቴ ኣሞቴቴስ።

3 ባ ዶና ናጊዛ ኣሲ

ባ ሼምፖ ናጌስ፤

ዶናን ዪዳ ማላ ሃሳይዛ ኣሲ

ባና ይሴስ።

4 ኣዛላይ ኬሂ ኣሞቴስ ሺን

ኣይኮካ ዴሜና፤

ሚኒ ኦዛይታ

ኣሞይ ጊዲኮ ኩማና።

5 ጺሎ ኣሳቲ ዎርዶ ሃሳያ ኢጼቴስ፤

ኢታ ኣሳታ ሃሳያይ ጊዲኮ

ዬላሴሲኔ ካዉሼስ።

6 ጺሎቴ ሱሬ ኣስ ናጌስ፤

ኢታቴ ጊዲኮ

ናጋራንቻ ይሴስ።

7 ኣይኮይ ባይንዳ

ባና ዱሬ ሚሳቲሲዛ ኣሲ ዴስ፤

ሃራ ባጋራ ባስ

ዳሮ ኣቆታይ ዲሺን

ማንቆ ሚሳቲ ቤቲዛ ኣሲ ዴስ።

8 ኣሲ ባ ዱሬቴን

ባ ሼምፖ ዎዛና ጊዳና፤

ማንቆይ ጊዲኮ

ሂርጋይ ባይንዳ ኡቴስ።

9 ጺሎታ ፖኦይ ኬሂ ፖኤስ፤

ኢታታ ጾምፔይ ጊዲኮ ቶኣና።

10 ኦቶሮይ ኦሽ ዬሌስ፤

ኣ ኤራቴ ጊዲኮ

ዞሬ ኤኪዛይታ ማታን ዴስ።

11 ቤሶንታ ኦጌራ ዴሚዳ ሚሺ

ዪ ዪ ቤስ፤

ባ ጫዋ ጉሲዲ ዴሚዳ ኣቆታይ

ዳሪ ዳሪ ቤስ።

12 ሂዶታይ ፖሌቶንታ ጋምኢኮ

ዎዚናይ ሜቄስ፤

ጊዶ ኣቲን ኣሞቲዳይሲ

ፖሌቲሺን ኡፋይሴስ።

13 ዞሬ ካዛ ኣሲ ሜቶን ጌሌስ፤

ኣዛዞ ቦንቺዛ ኣሲ ጊዲኮ

ባ ዋጋ ኤካና።

14 ኣ ኤራንቻይ ኢሚዛ ቲሚርቴይ

ዴኦ ፑልቶ፤

ሄሲ ኣሲ ሃይቆ ዎጺማዴን

ጌሎንታ ማላ ናጌስ።

15 ኣኬካይ ዴኢዛ ኣሲ ቦንቼቴስ፤

ኣማኔቶንታ ኣጎይ

ባሻ ኦጌ ኤፌስ።

16 ኣኬኪዛ ኣሲ ኤራን ኦስ፤

ኤያይ ጊዲኮ

ባ ኤያቴ ቆንጪሴስ።

17 ኢታ ኣሲ ኪቴቲኮ ሜቶን ጌሌስ፤

ኣማኔቲዳ ኣሲ ኪቴቲኮ

ሳሮቴ ኤሄስ።

18 ሴራ ኢጺዛ ኣሲ

ማንቄሲኔ ካዉዬስ፤

ሃንቆ ሲዪዛ ኣሲ ጊዲኮ

ቦንቼቴስ።

19 ኣሞይ ፖሌቲኮ ኬሂ ኡፋይሴስ፤

ኤያቲ ጊዲኮ

ኢታፔ ሃካናስ ኮዬቴና።

20 ኣ ኤራንቻታራ ሄሜቲዛ ኣሲ

ኣ ኤራንቻ ጊዴስ፤

ጊዶ ኣቲን ኤያታራ ሄሜቲዛ ኣሲ

ሜቶን ጌሌስ።

21 ናጋራንቻታ

ኢታ ቃዳይ ካሌስ፤

ዱሬቴ ጊዲኮ

ጺሎታስ ኢሜቲዛ ዎይቶ።

22 ሎኦ ኣሲ ባስ

ና ናይታ ጋካናስ ላቲሴስ፤

ናጋራንቻ ኣቆታይ ጊዲኮ

ጺሎታስ ዳጋቴስ።

23 ማንቆ ጋዴይ

ዳሮ ካ ኢማና ዳንዳዬስ፤

ጊዶ ኣቲን ሱሬ ፒርዳይ ይኮ

ፒቴቲ ዬስ።

24 ሴሮንታ ዲቺዛይ ባ ና ኢጼስ፤

ጊዶ ኣቲን ሴሪ ዲቺዛይ

ባ ና ዶሴስ።

25 ጺሎይ ካላናሼ ጋካናስ ሜስ፤

ኢታቲ ጊዲኮ ጋፊዳ ማላ ዳና።