1 ዳሮ ዎዴ ሴሪን ኢጺዲ

ባ ሞርጌ ዞዲሲዳ ኣሲ

ሃሳኦንታ ሜቃና፤

ሄሳዴስ ፓጼቴካ ዴና።

2 ጺሎ ኣሳቲ ማታ ኦይኪዛ ዎዴ

ኣሳይ ኡፋዬቴስ፤

ጊዶ ኣቲን ኢታ ኣሳቲ

ቢታ ሃሪዛ ዎዴ ኣሳይ ኦሌስ።

3 ኣ ኤራቴ ዶሲዛ ኣሲ

ባ ኣዋ ኡፋይሴስ፤

ጊዶ ኣቲን ላይማታራ ላጌቲዛይ

ባ ኣቆታ ይሴስ።

4 ቱማ ፒርዲዛ ካዎይ

ባ ዴሬ ዎፑ ሂስቴስ፤

ጊዶ ኣቲን ማታኤ

ማናስ ዪቄቲዛይ

ባ ዴራ ላሌስ።

5 ባ ላጌዛስ ጪሞ ሃሳይዛ ኣሲ

ኢዛ ቶሆስ ዎጺማዴ ዋጼስ።

6 ኢታ ኣሲ ባርካ

ባ ናጋራን ኦይኬቴስ፤

ጊዶ ኣቲን ጺሎ ኣሲ

ኡፋዬቴሲኔ ዬጼስ።

7 ጺሎ ኣሲ ሂዬሳታስ

ሱሬ ፒርዳይ

ፒርዴታና ማላ ቆፔስ፤

ጊዶ ኣቲን ኢታ ኣሲ

ሄሳ ማላ ዉዱካ ጌና።

8 ሚሪዛይቲ ካታማን

ሺሮ ዴንቴስ፤

ጊዶ ኣቲን ኣ ኤራቴ ዲዛ

ኣሳቲ ሃንቆ ኢሪጺሴቴስ።

9 ኣ ኤራቴ ዲዛ ኣሲ

ኤያ ኣሳራ ፒርዳሶ ቢኮ

ኤያይ ሃንቄቴሲኔ ቂስ፤

ኢዛስ ሳሮይካ ዴና።

10 ሱ ጉሳናስ ጃሚዛ ኣሳቲ

ሱሬ ኣስ ኢጼቴስ፤

ቃሴ ጺሎ ኣሳካ

ዎናስ ኮዬቴስ።

11 ኤያ ኣሲ ዛዋይ ባይንዳ ሃንቄቴስ፤

ጊዶ ኣቲን ኣ ኤራንቻይ

ባ ሃንቆ ሚቴስ።

12 ዴሬ ሃሪዛዴይ

ዎርዶ ዮኦ ኤኪኮ

ኢዛ ሹሜቲ ኡባይ

ኢታ ጊዴቴስ።

13 ሂዬሳይኔ ኣስ ናቂዛዴስ

ኮ ሚሺ ዴስ፤

ጎዳይ ናምኣታስካ

ጼሊዛ ኣይፌ ኢሚዴስ።

14 ኢሲ ካዎይ ሂዬሳስ ሱሬ ፒርዲኮ

ኢዛ ካዎቴ ኣራታይ

ሜርናስ ሚኒ ዳና።

15 ጹንዱቂ ዲሾይ ናይታስ

ኣ ኤራቴ ኢሜስ፤

ጊዶ ኣቲን ዬዳ ዲጪዳ ናይ

ባ ኣዮ ካዉሼስ።

16 ኢታ ኣሳቲ ማታ ኦይኪዛ ዎዴ

ናጋራይ ዳሬስ፤

ጊዶ ኣቲን ጺሎቲ

ኢስታ ኩንዴ ቤኣና።

17 ኔ ና ሴራ፤

ሂስቲኮ ኔኒ ሳሮ ዴማና፤

ኢዚ ኔና ኡፋይሳና።

18 ኣጁታይ ባይንዳሶን

ዴሬይ ዬዳ ዳና፤

ጊዶ ኣቲን ዎጋ ናጊዛ

ኣሲ ኣንጄቲዳዴ።

19 ኣሽካራይ ጮ ዶናን ዮቲን

ጻላ ኤሬና፤

ዮኦይ ኢዛስ ጌሊዛኮካ

ኢዚ ኣዛዜቴና።

20 ኤሶን ሃሳይዛ ኣስ ቤያይ?

ኢዛፔ ኤያ ኣሳስ ሂዶታይ ዴስ።

21 ኣሲ ባ ኣይሌ

ናቴቴፌ ዶሚዲ

ኣልኢሶን ዲቺኮ

ዉርሴን ኢዛዴ ቦላ

ጬጬይ ጋካና።

22 ሃንቄቲዛ ኣሲ

ኦሽ ዴንስ፤

ኤሌ ዪሎቲዛ ኣሲ

ዳሮ ናጋራ ኦስ።

23 ኦቶሮይ ኣስ ካዉሼስ፤

ጊዶ ኣቲን

ኣሽኬቴ ቦንቺሴስ።

24 ካይሶራ ዙፔቲዛ ኣሲ

ባና ኢጺዛ ኣሳ፤

ቃንጊ ጫቂሲሺን ሲዪሼካ

ኢዚ ጮኡ ጌስ።

25 ኣሳስ ያዪዛይሲ

ኢዛዴስ ዎጺማዴ ጊዴስ፤

ጊዶ ኣቲን

ጎዳን ኣማኔቲዛ ኣሲ

ሳሮን ዴኤስ።

26 ዳሮቲ ዴሬ ሃሪዛይታ ሲንን

ኤሬታና ኮዬቴስ፤

ጊዶ ኣቲን ኣሳስ ሱሬ ፒርዳይ

ጎዳ ኣቻፌ ቤቴስ።

27 ጺሎቲ ኣስ ባሌዛይታ

ሻቴቴቴስ፤

ኢታቲ ሱሬ ኣሳታ ኢጼቴስ።