1 ኢዚ ኪያኔ ኢዛ ሲቆይ

ሜርናስ ጊዲዳ ጊሻስ

ጎዳ ጋላቲቴ!✝

2 ኢስራኤሌ ኣሳይ፥

«ኢዛ ሲቆይ ሜርናሳ» ጎ።

3 ኣሮኔ ዜሬቲ፥

«ኢዛ ሲቆይ ሜርናሳ» ጌቶ።

4 ጎዳስ ያዪዛይቲ ኡባይ፥

«ኢዛ ሲቆይ ሜርናሳ» ጌቶ።

5 ታኒ ኡንኤቲዳ ዎዴ

ጎዳኮ ዋሳዲስ፤

ሂስቲን ኢዚ ታ ዋሶዛ ኣሊዲ

ታና ኡንኦፌ ኬሲዴስ።

6 ጎዳይ ታናራ ዲዛ ጊሻስ

ታኒ ያዪኬ።

ኣሲ ታና ኣይ ኦኔ?✝

7 ጎዳይ ታና ማዳናስ

ታናራ ዴስ፤

ታ ሞርኬታ ጾኔቴ

ታኒ ኣይፌን ቤኣና።

8 ኣሳን ኣማኔቴፌ

ጎዳን ኣማኔቴይ ሎኦ።

9 ዳናታን ኣማኔቴፌ

ጎዳን ኣማኔቴይ ሎኦ።

10 ካዎቴቲ ኡባይ

ታና ዶዲዳ፤

ጊዶ ኣቲን ጎዳ ሱንን

ታኒ ኢስታ ጾናዲስ።

11 ኢስቲ ታና ኡባሶራ

ዶዲ ኦይኪዳ፤

ጊዶ ኣቲን ጎዳ ሱንን

ታኒ ኢስታ ጾናዲስ።

12 ኢስቲ ታና

ማ ዶዲዛ ማላ ዶዲዳ፤

ጊዶ ኣቲን ኣጉን

ኤጺዛ ማላ

ኤጺ ይዳ፤

ጎዳ ሱንን

ታኒ ኢስታ ጾናዲስ።

13 ታና ሱጊን ኩንዳናስ

ጋንዲጋራዲስ፤

ጊዶ ኣቲን ጎዳይ

ታና ማዲዴስ።

14 ጎዳይ ታስ

ሚኖቴኔ ዬ፤

ታና ኣሺዛይ ኢዛ።✝

15 ጺሎታ ዱንካኔ ጊዶን

ጾኖ ኢሊሊሲኔ

ኡፋይሳ ዬ፥

«ጎዳ ኡሻቻ ኩሼይ

ዎልቃማ ሚሽ

ኦዴስ!» ጊሼ ሴቴቴስ።

16 ጎዳ ኡሻቻ ኩሼይ

ቁ ቁ ጊዴስ!

ጎዳ ኡሻቻ ኩሼይ

ዎልቃማ ሚሽ ኦዴስ።

17 ታኒ ሃይቂኬ

ሼምፖራ ፓጻ ዴኣና፤

ጎዳይ ኦዳ ኦሶ

ቡሮፔካ ኣዋጃና።

18 ጎዳይ ታና ኬሂ ቃጻይዴስ፤

ጊዶ ኣቲን ሃይቆስ

ኣ ኢሚቤና።

19 ታኒ ጊዶ ጌላዳ

ጎዳ ጋላታና ማላ

ጺሎቴ ፔንጌታ

ኣኔ ታስ ዶይቴ!

20 ሃይሲ ጎዳ ፔንጌ፤

ኢዛራ ጺሎቲ ጻላ ጌላና።

21 ኔኒ ታስ ሲዪዳ ጊሻሲኔ

ጾኖ ኢሚዳ ጊሻስ

ታኒ ኔና ጋላታይስ።

22 ጊምቢዛይቲ ካዲ

ኢጺዳ ሹቻይ

ጉላስ ሁኤን ዎዛ

ሹች ጊዲዴስ።✝

23 ሃይሲካ ጎዳ ኦሶ፤

ቃሴ ኑ ኣይፌሲካ

ማላሊሲዛ ሚሻ።✝

24 ሃይሲ ጋላሳይ

ጎዳይ ኦዳ ጋላሳ፤

ኣኔ ኑኒ ኢዛን

ኡፋዬቶሲኔ ኢሊሎስ።

25 ኣቤት ጎዳዉ!

ሃኢ ኑና ኣሻርኪ!

ኣቤት ጎዳዉ!

ሃኢ ኑስ ኢንጄሳርኪ!✝

26 ጎዳ ሱንን ዪዛ ኣሲ

ኣንጄቲዳይሳ ጊዶ!

ኑኒ ጎዳ ኬን

ኢንቴና ኣንጆስ።✝

27 ጎዳይ ጾሳ፤

ኢዚ ኑስ ፖኢሲዴስ፤

ጪሊላ ሚ ሃጋታ ኦይኪቴ፤

ያርሾ ያርሺዛሶዛ ቦላ ዲዛ

ካጬታኮ ጋካናስ ኬዚቴ፤

ባኣሌ ቦንቺቴ።

28 ኔኒ ታ ጾሳ፤

ታኒ ኔና ጋላታና፤

ኔኒ ታ ጾሳ፤

ታኒ ኔና ጊታሳና።

29 ኢዚ ኪያ ጊዲዳ ጊሻስ

ጎዳ ጋላቲቴ!

ኢዛ ሲቆይ ሜርናሳ።