1 ቦኔን ሻቺ፥ ካ ሺሺዛ ዎዴንካ

ኢራይ ኮሾንታይሳ ማላ፥

ኤያስ ቦንቾይ ኮሼና።

2 ካፎቲ ያኔ ሃ ፓሊሼ

ኣስ ቆሆንታይሳ ማላ፥

ጋሶይካ ባይንዳ

ቃንጊዛ ቃንጌ

ኣስ ጋኬና።

3 ፓራሲ ሊሶ፥

ሃሬስ ኣንጫፋ ኮሺዛይሳ ማላ፥

ኤያ ዞኮዛስ ዱርቃ ኮሼስ።

4 ኤያ ኣሳስ

ኢዛ ኤያቴ ማላ ዛሮፓ፤

ዛሪኮ ኔኒካ

ኢዛ ማላ ጊዳና።

5 ጊዲኮካ ኤያስ

ኢዛ ኤያቴ ቤሳ፤

ሂስቶንታ ኣጊኮ ኢዚ ባና

ኤራንቻ ማላ ቆዳና።

6 ኤያ ኣሳ ቦላ ኪታ ዬዶይ

ባርካ ባ ቶሆታ

ቃንጺዛይሳ ማላ፤

ዎይኮ ዎዛ

ማርዜ ኡሻ ማላ።

7 ኤያ ኣሳ ሌሚሶይ

ሲሊዳ ቶሆ ማላ።

8 ኤያ ኣሳስ ቦንቾ ኢሞይ

ያንባርሻ ቦላ

ቃቺ ዎዲ

ዩሺዛ ሹቻ ማላ።

9 ኤያ ኣሳ ሌሚሶይ

ማቲዳ ኣሳ ኩሼን ኤቂዳ

ኣጉን ማላ።

10 ኤያ ኣስ ዎይኮ

ባስ ኦጌራ ካን ቢዛ ኣስ

ኦሶስ ቃጻሪዛ ኣሲ

ባ ዎንዳፌን ጮ ዴሚዳ ኣስ

ዱኪ ማዱንዛ ኣሳ ማላ።

11 ካናይ ባ ጮሺ

ሲሚ ላጪዛ ማላ፥

ኤያይ ባ ኤያቴ ኦሶ

ዛሪ ዛሪ ዬጌስ።

12 ባርካ ባና፥

«ታኒ ኣ ኤራንቻ»

ጊዛ ኣስ ቤያዲ?

ኢዛፔ ኤያ ኣሳስ

ሎኦ ቃዳይ ዴስ።

13 ኣዛላይ፥ «ኦጌን ጋሞይ ዴስ፤

ያሺዛ ጋሞይ

ዎጋ ኦጌን ዩዬስ» ጌስ።

14 ፔንጌይ ባ ማጻፋ ቦላን

ያኔ ሃ ቃጺዛ ማላ

ኣዛላይካ ባ ሂጻን ያኔ ሃ

ሺሬቲ ሺሬቲ ዎስ።

15 ኣዛላይ ባ ኩሼ ማዳን ዬዴስ፤

ጊዶ ኣቲን ፑዴ ባ ዶናን

ዛራናስ ዋዬቴስ።

16 ኣዛላ ኣሲ ኣኬካን ዮቲዛ

ላፑን ኤራንቻታፔ

ባና ኣ ኤራንቻ

ጊዲ ቆፔስ።

17 ባና ጋንታ ኣሳ ዮኦን

ጉፒ ጌሊዛ ኣሲ

ካና ሃይ ኦይኪዛ ኣሳ ማላ።

18 ጎዪዛ ኣሲ ታማ ጺፋ ኦሊዛ ማላ

ዎይኮ ዎንዳፌ ዱኪዛ ማላ፤

19 «ታኒ ካሳስ ኦዲስ» ጊሼ

ባ ላጌዛ ጪሚዛ ኣሲካ

ሄሳ ማላ።

20 ሚ ዉሪኮ ታማይ ቶኤስ፤

ዚጊርሲ ይኮ ኦሺ ኣቴስ።

21 ጺጺን ቦንቆ ዳርሲዛይሳ ማላኔ

ሚ ታማ

ዳርሲዛይሳ ማላ፥

ዶናማ ኣሲ ኦሽ ዳሪሴስ።

22 ዚጊርሳንቻ ቃላይ

ማልኦ ቁማ ማላ

ኣሳስ ዱጌ ማራጬ ጋኬስ።

23 ዎዚናን ኢታ ሚሺ ዲሺን፥

ባ ኢንጻርሳን ሊቆ ቃላ

ሃሳይዛ ኣሲ

ቢራን ሜሼቲዳ

ማና ሚሻ ማላ።

24 ጌኔ ኣሲ ባ ዶናን ጪሜስ፤

ጊዶ ኣቲን ባ ዎዚናን

ኢታቴ ጹንቴስ።

25 ኢዛ ዎዚናን ላፑን ቱናቴ

ኩሚ ኡቲዴስ፤

ሄሳ ጊሻስ ኢዚ

ሎኦ ቃላ ሃሳይኮካ

ኣማኖፓ።

26 ኢዚ ባ ጌኔ ባሌን

ጌንናስ ዳንዳዬስ፤

ጊዶ ኣቲን ኢዚ ኦዳ

ኢታቴ ዱላታን ቆንጫና።

27 ሃራታስ ኦላ ቦኪዛ ኣሲ

ሄ ኦላን ባስ ኩንዳና፤

ሃራታ ቦላ ሹች

ቡሉሊዛ ኣሳ ቦላ

ሄ ሹቻይ ሲሚ

ኢዛ ቦላ ኩንዳና።

28 ዎርዶቲዛ ኢንጻርሲ

ባ ቆሂዳ ኣሳታ ኢጻዉስ፤

ጪሚዛ ሜቴርሺካ ባሽ ኤሃዉስ።