Oséias 4

ኢስራኤሌ ቦላ ዴንዲዳ ሞቶ

1 ሃኖ ቢታይ ቦላ ዲዛ ኣሳ ኡባ ቦላ

ጎዳይ ሺሺዛ ሞቶይ ዴስ።

ሄሳ ጊሻስ ኢስራኤሌ ኣሳዉ!

ኢዚ ኢንቴና ጊዛይሳ ሲዪቴ፤

«ሃኖ ቢታይ ቦላፌ

ኣማኔቴይ፥

ሲቆይኔ ጾስ ኤሮይ ይዴስ።

2 ሃን ዲዛይ ቃንጌ፥ ዎርዶ፥

ሼምፖ ዎ፥ ላይማቴኔ

ጫቂዳ ቃላ ሙሲ ጻላ ዴስ።

ጌኔይኔ ሼምፖ ዎይ

ዳሪ ዳሪ ቤስ።

3 ሄሳ ጋሶን ቢታይ ቦላ

ኮሻይ ዬስ፤

ኢዚ ቦላ ዲዛይ ዉሪ ጊልቄስ፤

ሜሄቲ፥ ዶኣቲ፥ ካፎቲኔ

ኣባ ጊዶን ዲዛ ሞሌቲ

ኡባይ ዉሬቴስ።»

ጎዳይ ቄሴታ ቦላ ሃንቄቲዴስ

4 ጎዳይ፥ «ኢንቴኖ ቄሴቶ

ታ ኢንቴና ሞቲዛ ሚሺ ዴስ፤

ሄሳ ጊሻስ ኦኒካ

ሃራ ኣሳራ ፓላሜቶፎ፤

ቃሴ ኦኒካ ሃራ ኣስ ሞቶፖ።

5 ኢንቴ ኦማርሲኔ ጋላስ

ጴቴታ፤

ናቤቲካ ኢንቴናራ

ጴቴቴስ።

ሄሳ ጊሻስ ታኒ ኢንቴ ኣዮ

ኢስራኤሌ ይሳና።

6 ታ ዴሬዛስ ኤራቴ

ፓጪዳ ጊሻስ ይዴስ።

ኢንቴ ታና ኤራናስ

ኮዮንታ ጊሻስ

ታኒካ ኢንቴ ታስ ቄሴታ ጊዲ

ኦና ማላ ኮይኬ።

ኢንቴ ታ ዎጋ ባሌቲዳ ጊሻስ

ታኒካ ኢንቴ ናይታ ባላና።

7 ቄሴታ ቆዳይ ዳሪ ዳሪ ቢሺን

ኢስቲ ታ ቦላ ኦዳ ናጋራይ

ዳሪ ዳሪ ቢዴስ፤

ባንታ ቦንቾካ

ካዉሻን ላሚዳ።

8 ታ ዴሬዛ ናጋራይ

ኢስታስ ሙሳስ ኪዪዴስ፤

ሄሳ ጊሻስ ዴሬይ

ናጋራ ኦዛይሳ

ኬሂ ዶሲዳ።

9 ኢንቴ ቄሴቲካ ዴራፔ

ዱማቴኬታ፤

ሄሳ ጊሻስ ታ ኡባካ

ኢዛዴ ሃኖ ማላ ኢዛ ቃጻያና፤

ኢዛ ኦሶ ማላካ ኢዛስ ኢማና።

10 ታ ዴሬይ ታና ጎዳ

ኣጊዳ ጊሻስ

ኢስቲ ማናሺን

ካሌቴና፤

ላይማታናሺን

ጮራቴቴና» ጌስ።

ጎዳይ ኤቃ ጾሳታስ ጎይኖ ኢጼስ

11 «ላይማቴስ፥

ጫሊዳ ዎይኔ ኡሻስ፥

ማልኦ ዎይኔ ኡሻ ሱኬስ

ባንታና ኣ ኢሚዳ፤

ሄሳንቲ ታ ዴሬዛ

ዎዚና ኤኪዳ።

12 ሄሳ ጊሻስ ሚፌ ኦሴቲዳ

ኤቃ ጾሳ ዞሬ ኦይቼቴስ፤

ኢስቲ ኢዛን ማሮዛ ጉፌዚካ

ኢስታስ ዛሮ ኢሚዛ ሚሳቴስ፤

ላይማቴ ቆፋይ ባሌዴስ፤

ባንታ ጾሳስ

ኣማኔቲቤቴና።

13 ዙማይ ዲዛሶን ዲዛሶን

ያርሾ ያርሼቴስ፤

ዙምቡላታ ቦላ፥

ጊታ ዳሻ ሚታ

ኩዋ ጋርሳን

ጹጌቲዛ ያርሾ ያርሼቴስ።

ሄሳ ጋሶን ኢንቴ ማጫ ናይቲ

ላይማን ዳና፤

ኢንቴ ናይታ ማቼቲ ላይማታና።

14 ኢንቴ ማጫ ናይቲኔ

ኢንቴ ናይታ ማቼቲ

ላይማቲሺን ታኒ ኢስታ ቃጻይኬ፤

ጋሶይካ ኢንቴ ኣቱማሳቲ

ላይማ ማጫሳታራ ሱኬቴቴስ፤

ኤቃ ጾሳታስ ላይማቴ

ያርሾ ሺሺዛይታራ

ኢንቴካ ኢዛ ያርሼታ።

ሄሳ ጊሻስ ኣኬካይ ባይንዳ

ዴሬይ ያና።

15 «ኢንቴኖ ኢስራኤሌ ኣሳቶ!

ኢንቴ ላይማቲኮካ

ዩሁዳ ኣሳይ

ላይማታና ማላ ኦፍቴ፤

ሄሳ ጊሻስ ታስ ጎይናናስ

ጌልጌላ ዎይኮ

ቤቲ-ኣዌኔ ጌቴቲዛሶ ቦፒቴ፤*4፡15 ቤት-ኣዌኔ፡ ቤት-ኣዌኔ ጉሲ ኢታቴ ኬ ጊዲሺን ቤትኤሌስ ኢሜቲዳ ጫቻ ሱን።

‹ዴኦ ጎዳይ ቤዪን› ጊዲ

ታ ሱንን ጫቆፍቴ።

16 ኢስራኤሌ ዴሬይ ማካላንቻ

ኡሳ ማላ ማካሊዴስ፤

ሂስቲን ጎዳይ ኢስታ

ዶርሳ ላቃታ ማላ

ሎኦሶን ዎስቲ ሄማኔ?

17 ኤፍሬሜይ ኤቃ ጾሳታ ጎይኖን

ኦይኬቲዳ ጊሻስ

ኢስታ ጌዴ ኣጋጊቴ።

18 ዎይኔ ኡሹ ኡዪዳፔ ጉዬ

ላይማቴቴስ።

ኢስታ ኣይሲዛይቲካ

ዬላቺዛ ሚሽ ዶሴቴስ።

19 ኢስታ ጎቴ ጫርኮይ ፒቲ ኤፋና፤

ኢስታ ያርሾይ ኢስታ ቦላ

ዬላ ኤሃና።