1 ጌላ ዮኦ ሃሳይዛ ኢታ ኣሳፔ

ባ ዴኦን ቦሬይ ባይንዳ

ሂዬሳ ኣሲ ሎኦ።

2 ኤራቴ ባይንዳ ዚልኤቴ

ሎኦ ጊዴና፤

ኤሶ ሄሜታይ ኦጌ ባሌስ።

3 ኢሲ ኢሲ ኣሳይ ባ ኤያቴን

ባ ዴኦ ሞሬስ፤

ሂስቲዲ ጎዳ ቦላ ዪሎቴስ።

4 ዱሬቴ ዳሮ ላጌ ሜስ፤

ጊዶ ኣቲን ማንቆቴ

ካሴ ዲዛ ላጌ ሃሴስ።

5 ዎርዶ ማርካይ

ቃጻዬቶንታ ኣቴና፤

ዎርዶ ፑኪዛይካ

ቃጻዬቶንታ ኣቴና።

6 ዳሮ ኣሳይ ሎኦ ሚሳታናስ

ዳና ሲንን ኣላንስ፤

ጮ ኢሚዛ ኣሳራ

ኣሲ ኡባይ ዳቦቴስ።

7 ማንቆ ኢዛ ዳቦ ኡባይ ኢጼስ፤

ሂስቲን ኢዛ ላጌቲ ኣይ ኬና

ኢዛፔ ባቃታኔ!

ካሊ ኣዳሺዲካ

ኢዚ ኢስታ ዴሜና።

8 ኣ ኤራቴ

ባስ ሚሽ ኦዛይ

ባና ሲቄስ፤

ኣኬካ ሲቂዛዴስ ኢንጄቴስ።

9 ዎርዶ ማርካይ

ቃጻዬቶንታ ኣቴና፤

ዎርዶ ፑኪዛይካ ያና።

10 ኤያቲ ኢሻሎ ዱስ

ዳናስ ቤሴና፤

ኣይሌይ ጎዳ ቦላ ጎዳቲኮ

ሄሲ ኣይ ኬና ኢታ!

11 ኣ ኤራቴ

ኣስ ዳንዳያንቻ ኬሴስ፤

ቆሆ ዬ ኣ ቦንቾን ጋስ።

12 ካዎ ሃንቆይ ጋሞ ጻጎ ማላ፤

ጊዶ ኣቲን ኢዛ ሲንን

ሳባ ዴሞይ

ማታ ጪሊሊሲዛ ኢራ ማላ።

13 ኤያ ናይ ባ ኣዋ

ባሻስ ኣ ኢሜስ፤

ኦሽ ኤሂዛ ማቻ

ኢራ ኣዛ ኬ ማላ።

14 ኬኔ ኣቆታይ

ዬሊዳይታፔ ላቴቴስ፤

ኣኬካራ ዲዛ ማቻ ጎዳፔ ቤታዉስ።

15 ኣዛላቴ ዴጾ ስኮ ኤሄስ፤

ኦሶ ኦንታ ኣሲ ጋፌስ።

16 ኣዛዞ ናጊዛይ

ባ ሼምፖ ናጌስ፤

ጊዶ ኣቲን

ኢዞ ኢጺዛዴይ ሃይቄስ።

17 ማንቆስ ኪዪዛ ኣሲ

ጎዳስ ታልኤስ፤

ጎዳይ ሄ ሎኦ ኦሶ

ዋጋ ቃንጻና።

18 ዎዴራ ኔ ና ሴራ፤

ኢዚ ሃይቆስ ቢሺን

ጮኡ ጋ ጼሎፋ።

19 ኤሶን ዪሎቲዛ ኣሲ

ቃጻዬታናስ ቤሴስ፤

ኔኒ ኣጋ ኣኮ

ሃራ ዎዴካ

ኔስ ሄሳ ኦሶይ ኣቴና።

20 ዞሬ ሲያ፤ ሴራካ ኤካ።

ሂስቲኮ ኔኒ ዉርሴን

ኣ ኤራንቻ ጊዳና።

21 ኣሳ ዎዚናን ዳሮ ሃልቾይ ዴስ፤

ጊዶ ኣቲን

ጎዳ ቆፋይ ፖሌቴስ።

22 ኣሳፔ ኮዬቲዛይ ሚኖ ሲቆ፤

ዎርዳንቻ ጊዳናፔ

ማንቆቴ ሎኦ።

23 ጎዳስ ያሺ ዴኦስ ካሌስ፤

ሄሳ ማላ ኣሲ ዎፓን ዴስ፤

ኢታይካ ኢዛ ቦቼና።

24 ኣዛላይ ባ ኩሼ ማዳን ዬዴስ፤

ጊዶ ኣቲን ፑዴ ባ ዶናን

ዛራናዉ ዋዬቴስ።

25 ቂልጪዛዴ ሾጪኮ

ዎዚና ፓጬይ ኣኬካ ታማራና፤

ኣኬካንቻ ኣሳ ሴሪኮ

ኢዚ ኤራቴ ዴማና።

26 ባ ኣዋ ቦንቂዛ ናይ፥

ባ ኣዮካ ኬሲ ዬዴዛ ናይ

ኢዚ ዬላቴኔ

ካዉሻቴ ኤሂዛ ና።

27 ታ ናዞ!

ታ ዞሬ ኔ ሲዮንታ ኣጊኮ፥

ኔ ኤሪዛ ቃላካ ባላና።

28 ዎርዶ ማርካይ

ሱሬ ፒርዳ ቦላ ቂልጬስ፤

ኢታ ኣሳ ዶናይ

ኢታቴ ባንቺኬስ።

29 ቂልጪዛይታስ ፒርዳይ፥

ኤያታ ዞኮስ ሊሶይ

ጊጊ ኡቲዴስ።