1 ካዎ ዎዚናይ

ጎዳ ኩሼን ዴስ፤

ኢዚ ኢዛ ዎዚና

ጎጊዛ ሃ ማላ

ባ ዶሲዳሶ ዛሬስ።

2 ኣሲ ቢዛ ኦጌይ ኢዛዴስ

ሱሬ ሚሳቴስ፤

ጎዳይ ጊዲኮ

ዎዚና ፒልጊ ጼሌስ።

3 ያርሾፌ ቦላራ ጺሎኔ

ሱሬ ፒርዳ ጎዳይ ዶሴስ።

4 ኦቶሮይኔ ሃላጫይ

ኢታ ኣሳታ ቤሲዛ ማላታ፤

ሄሲካ ናጋራ።

5 ሚኖ ኦሳንቻ

ሃልቾይ ዱሬሴስ፤

ጊዶ ኣቲን ቢቻሪሲ ማንቂሴስ።

6 ዎርዶቲዲ ዳጋሲዳ ኣቆታይ

ይዛ ፔንታ ማላ፤

ቃሴካ ዎዛ ዎጺማዴ ማላ።

7 ኢታቲ ሱሬ ኦሶ ዶሶንታ ጊሻስ

ኢታታ ኢስታ ማካላቴ

ይሳና።

8 ሞራንቻቲ

ጌላ ኦጌራ ሄሜቴቴስ፤

ጊዶ ኣቲን ጌሻቲ ሱሬ ሃኔቴስ።

9 ዱናማ ማቺራ ዳናፔ

ኬ ዳራንቻን

ኣቆይ ሎኦ።

10 ኢታቲ ኢታ ሚሽ ኦናስ

ኬሂ ኣሞቴቴስ።

ኢዛ ላጌይ ኢዛፔ

ቃታ ዴሜና።

11 ቂልጪዛዴይ ቃጻዬቲዳ ዎዴ

ዎዚናይ ፓጪዳ ኣሲ

ኣ ኤራቴ ታማሬስ፤

ዎዚናማ ኣሲካ ታማርዲ

ኤራቴ ዴሜስ።

12 ጺሎ ጾሳይ ኢታታሶን

ኦሴቲዛ ኡባ ጫዲ ጼሌስ፤

ኢስታ ሙሌራ ይሴስ።

13 ማንቆ ዋሶ ሲያናፔ ጊዲ

ባ ሃይ ቱጪኮ

ኢዚካ ዋሲዛ ዎዴ

ኣሊዛ ኣሲ ያና።

14 ጌማን ኢሚዛ ኢሞታይ

ሃንቆ ዶሺሴስ፤

ኣፋላ ጊዶራ ኢሚዳ ማታኤይ

ሱሌ ሃንቆ ኢርጺሴስ።

15 ሱሬ ፒርዳይ ጺሎታ ኡፋይሴስ፤

ኢታ ኦዛይታ ጊዲኮ

ሺሮሴስ።

16 ኣኬካ ኦጌፔ ካሬ ኬዚዛ ኣሲ

ሞይቲሌ ዱላታን ሼምፔስ።

17 ሃላጫ ዱስ ዳና

ኮይዛ ኣሲ ማንቄስ፤

ኡሺኔ ሙስ

ጎዲዛ ኣሲ ዱሬቴና።

18 ጺሎታ ቦላ ዪዳ ሜቶይ

ኢታታ ቦላ ሲማና፤

ሱሬ ኣሳታ ቦላ ዪዳ ሜቶይ

ኣማኔቶንታይታ ቦላ ጋካና።

19 ዎጫሚዛኔ ዶናቲዛ

ማቺራ ዳናፔ

ባዞን ዱሲ ኪያ።

20 ዎዚናማ ኣሳ ሶን

ማልኦ ቁማይኔ

ዛይቴይ ዳጋቲ ዴስ፤

ጊዶ ኣቲን ኤያ ኣሲ

ባስ ዲዛይሳ፥ ባይንዳ

ኡባ ዲፒ ሂስቲ ሜስ።

21 ጺሎቴኔ ሲቆ

ካሊዛዴይ ዴኦ፥

ዱሬቴኔ

ቦንቾ ዴሜስ።

22 ዎዚናማ ኣሲ

ዎልቃማ ኦላንቻቲ ዲዛ

ካታማ ሜን ጌሌስ፤

ኢስቲ ኣማኔቲዳ ሚጻታካ

ላሊ ዬጌስ።

23 ባ ዶናኔ ባ ኢንጻርስ ናጊዛ ኣሲ

ባና ቦሻፔ ናጌስ።

24 ኦቶራንቻይኔ ሃላጫ ኣሲ

ቂንቻ ጌቴቴስ፤

ኢዚ ኦቶሮ ሃኖ ሃኔስ።

25 ኣዛላ ኣሞይ ዎስ፤

ኣይስ ጊኮ

ኢዚ ኦናስ ኮዬና።

26 ኣዛላይ ጋላስ ኩሜ

ኣሞቲሼ ፔኤስ፤

ጺሎይ ጊዲኮ ኡዜቶንታ ኢሜስ።

27 ኢታ ኣሳ ያርሾይ ሃራሴስ፤

ኢታ ቆፋን ሺሺዛ ጊዲኮ

ኣይ ማላ ኢታ ጊዳኔ?

28 ዎርዶ ማርካይ ያና፤

ጊዶ ኣቲን ቱሙ ማርካቲዛይ

ሚኒዲ ዴኣና።

29 ኢታ ኣሲ ቤሶንታዝ ጻላ ጻሌስ፤

ጊዶ ኣቲን ሱሬ ኣሲ

ዩሺ ቆፔስ።

30 ኣሲ ባ ኤራን፥ ኣኬካኒኔ

ሃልቾን ጎዳራ

ኤቄታናስ ዳንዳዬና።

31 ኦላ ጋላሳስ ፓራ ጊጊሴስ፤

ጊዶ ኣቲን ጾኖይ

ጎዳፔ ዬስ።