ኣጉሬይ ሃሳይዳ ሌሚሶታ
1 ሃይሳፌ ካሊዲ ጻፌቲዳይሲ ያቄ ና ኣጉሬይ ሃሳይዳ ሌሚሶታ።
ኣጉሬይ ኢቲኤሌሲኔ
ኡካላስ ሃይሳ ሃሳይዴስ።
2 «ታኒ ኣሳ ኡባፌካ ኤያ ዳራይስ፤
ኣሳስ ዴኢዛ ኣኬካይ ታስ ባዋ።
3 ታኒ ኣ ኤራቴ ታማራቤኬ፤
ጌሻዛ ጊሻሲካ
ታኒ ኤሪዛ ሚሺ ዴና።
4 ሳሎ ፑዴ ኬኢዲ
ዱጌ ዎዳይ ኦኔ?
ጫርኮ ባ ኩሼን ኦይኪዳይ፥
ሃ ባ ኣፋላን ዪጪዳይ
ሳኣ ጋጻ ኢዛ ሶን ሶን
ዎዳይ ኦኔ?
ኣኔ ኤሪኮ ኢዛ ሱን ታስ ዮታ፤
ኢዛ ናዛ ሱን
ኦና ጌቴቲዜ?
5 «ጾሳይ ዮቲዛ ቃላይ
ኡባይ ቱማ፤
ኢዛን ኣማኔቲዛ ኡባስ
ኢዚ ጎንዳሌ።
6 ኢዛ ቃላ ቦላ ኣይኮካ ጉጆፋ፤
ጉጂኮ ኢዚ ኔና ሴራና፤
ኔኒ ዎርዳንቻ ጊዲዳይሳካ
ኢዚ ቆንጪሳና።
7 «ጎዳዉ! ታኒ ኔና
ናምኡ ሚሽ ኦይቻይስ፤
ታኒ ሃይቃና ጋካናስ
ኢስታ ታና ዲጎፋ።
8 ታኒ ኣስ ጪሞንታ ማላኔ
ዎርዶ ሃሳዮንታ ማላ
ታና ናጋ፤
ታና ዱሬ ዎይኮ
ማንቆ ሂስቶፋ፤
ጊዶ ኣቲን ሃቺስ ሃቺስ
ጊዲዛ ካ ታስ ኢማ።
9 ሂስቶንታ ኣጊኮ
ታኒ ኬሃ ካላዳ ኔና ካዳና፤
‹ጎዳይ ኢዚ ኦኔ?› ጋና፤
ዎይኮ ማንቃዳ ካይሳና፤
ሂስታዳ ታኒ ጾሳ
ሱን ጫይሳና።
10 «ኔና ቃንጎንታ ማላኔ
ኢዚ ቃንጊን ኔስ
ጎሜቶንታ ማላ፥
ኣይሌ ኢዛ ጎዳ ሲንን
ኢታን ዴንፋ።
11 ባ ኣዋ ቃንጊዛኔ
ባ ኣዮካ ኣንጆንታ
ዬሌታይ ዴስ።
12 ቱና ጊዲ ኡቲዲ
ባንታና ጌሻ ማላ
ቆዲዛ ኣሳቲ ዴቴስ።
13 ኦቶሮን ኩሚዳ ኣሳቲኔ
ኣስ ካዲ ጼሊዛ ኣሳቲ ዴቴስ።
14 ሂዬሳታኔ ሜቶታንቻታ
ዴሬ ጊዶፌ ይሳናስ
ኢስታ ኣቻይ ማሻ ማላ ጊዲዳ
ኢስታ ጋጊናይ ቢላማ ማላ
ጊዲዳ ኣሳቲ ዴቴስ።
15 «ኡሎስ ናምኡ ማጫ ናይቲ ዴቴስ።
ኢስቲ፥ ‹ኑስ ኢማ! ኑስ ኢማ!›
ጊዲ ዋሴቴስ።
ሙሌካ ካሊ ኤሮንታ
ሄቲ ዴቴስ፤
ኦይዳንዚ ቃሴ ሙሌራ፥
‹ጊዳና› ጊ ኤሬና።
16 ሄሳንቲካ ዱፎ፥ ማይኒዳ ኡሎ፥
ሃ ካሊ ኤሮንታ
ሜላ ቢታኔ፥
‹ታስ ጊዳና!› ጊ ኤሮንታ ታማ።
17 «ባ ኣዋ ቂዛ ና ኣይፌኔ፥
ባ ኣዮ ካዛ ና ኣይፌ
ኬልካን ዴኢዛ ቁሮቲ ዎጫና፤
ኢዛ ኣሾዛ ኣንኮቲ ማና።
18 ታና ኬሂ ማላሊሲዛ
ሄ ሚሻቲ ዴቴስ፤
ኦይዳንዚ
ኡባራካ ታስ ጌሌና።
19 ሄሳንቲካ ጎሌቲ
ሳሎራ ፓሊዛ ፓሎ፥
ሾሺ ሹቻ ቦላራ
ሶሎሉ ጊ ቡስ፥
ማርካቤይ ኣባ ቦላራ ቢዛ
ቡስ ኣዴይ ማጫ ና ሲቆ
ዴማናስ ሃኒዛ ሃኖታ።
20 «ላይማ ማጫሳያ
ሃኒዛ ሃኖይካ
ሄሳ ማላ።
ኢዛ ሙሳ ማዉስ፤
ጊዶ ኣቲን ሚዳፔ ጉዬን፥
ባ ዶና ቁጫዳ፥
‹ታኒ ኣይኮካ
ሞራቤኬ› ጋዉስ።
21 «ሄ ዮኦታን
ቢታይ ቃጼስ፤
ኦይዳንዛ ኡባካ
ቶካናስ ዳንዳዬና።
22 ሄሳንቲካ ኣይሌይ ካዎቲዳ ዎዴ፥
ኤያይ ካ ካሊዳ ዎዴ፥
23 ኣሲ ኢጺዳ ማጫሳያ
ኣዴ ጌሊዳ ዎዴኔ
ማጫ ኣሽካሪያ ባ ጎዳቴዮ
ላቲዳ ዎዴ ሃኒዛ ሃኖታ።
24 «ሳኣ ቦላ ኦይዱ
ጉ ሜታቲ ዴቴስ፤
ጊዶ ኣቲን ኢስቲ
ኬሂ ኣ ኤራንቻታ።
25 ሄሳንቲካ ጩንጫሌቲ
ዎልቃይ ባይንዳ ሜታ፤
ጊዶ ኣቲን ባንታስ ሚዛ ሚሽ
ቦኔ ሺሺ ዳጋሴቴስ።
26 ጉፓሌቲ ጉ
ዎልቃይ ዴኢዛይታ፤
ጊዶ ኣቲን ባንታ ኬ
ዛላ ጊዶን ኬጼቴስ።
27 ቦሌታስ ካዎይ ዴና፤
ጊዶ ኣቲን ኢስቲ ኡባይካ
ማራን ማራን ዛቴቴስ።
28 ዛሬቲ ኩሼን
ኦይኪንካ ኦይኬቴቴስ፤
ጊዶ ኣቲን ኢስቲ
ካዎ ኬንካ ዴኤቴስ።
29 «ባንታ ማታ ቤሲሼ ሄሜቲዛ፥
ሄ ሜታቲ ዴቴስ፤
ኦይዳንዚካ
ፑላቲዲ ሄሜቴስ።
30 ሄሳንቲካ ዶኣ ኡባፌ
ዎልቃማኔ
ኣይኮስካ ያዪዲ
ባቃቲ ኤሮንታ ጋሞ።
31 ማጫሳታ ጊዶን ኮሶሲ
ሄሜቲዛ ኣዴ ኩቶ፥
ዴይሻ ኦርጌኔ
ባ ኦላንቻታን
ኣጃቤቲዳ ካዎ።
32 «ኔኒ ኤያዳ
ኦቶሬቲዳ ጊዲኮኔ
ኢታ ሚሽ ኦናስ
ሃልቺዳ ጊዲኮ
ኣኔ ታኪ ጋዳ ቆፓ።
33 ማ ቡኪን ኦይሲ ኬኢዛ ማላ፥
ሲ ኢጪንካ
ሱ ዪዛ ማላ
ሃንቆ ዴንኮ
ኦሽ ሜስ።»