ካዎ ሊሙኤሌ ኣያ ባ ናዛስ ኢሚዳ ቲሚርቴ
1 ካዎ ሊሙኤሌ ኣያ ካዎ ሊሙኤሌ ታማርሲዳ ቲሚርቴይ ሃይሳፌ ካሊዳይሳ።
2 «ታ ናዞ!
ታ ኡሎፔ ዎዳ ታ ናዞ!
ታኒ ኣዲኔታ ዬሊዳ ታ ናዞ!
3 ማጫሳን ኔ ዎልቃ ዉርሶፋ፤
ካዎታ ባሺዛ ሚሻን
ኔ ኣካታ ይሶፋ።
4 «ሊሙኤሌ ሃይሲ ካዎታስ
ቤሴና፤
ካዎቲ ዎይኔ ኡሹ
ኡያናስ ቤሴና፤
ዴሬ ኣይሲዛይቲ
ማሲዛ ኡሹ
ያሬታናስ ቤሴና።
5 ኢስቲ ኡዪዛ ዎዴ ዎጋ ባሌቴቴስ፤
ቆሄቲዳይታ ማታ ሱጌቴስ።
6 ሃይቃና ሃኒዛይታስ
ማሲዛ ኡሹ
ሜቶ ቦላ ዲዛይታስ
ዎይኔ ኡሹ ኢሚቴ።
7 ኢስቲ ኡዪዲ
ባንታ ማንቆቴ ዶጌቶ፤
ባንታ ቱጋካ ዛሪ ቆፖፌቶ።
8 «ባንታ ጊሻስ ሃሳያናስ
ዳንዳዮንታይታስ
ኔኒ ሃሳያ፤
ሜቶታንቻታ ማታ ጊሻስ
ኔኒ ሞቴታ።
9 ሃሳያዳ ኢስታስ ሱሬ ፒርዳ ፒርዳ፤
ሂዬሳታኔ
ሜቶታንቻታ ማታ
ቦንቺሳ» ጋዳ ታማርሳዱስ።
ዎዚናማ ማቾ
10 ዎዚናማ ማቾ
ኦኒ ዴማናዉ ዳንዳይዜ?
ኢዛ ዞኦ ኢንቁፌካ
ኬሃ ኣዉስ።
11 ኢዚ ኬ ኣዋይ
ኢዞ ኡባ ሚሻንካ
ኣማኔስ፤
ኢዛስ ኣይኮይካ ፓጬና።
12 ኢዛ ባ ዴኦ ላይ ኡባን
ኢዛስ ሎኦ ኣቲን
ኢታ ሚሽ ኦኩ።
13 ዶርሳ ኢስኬፌኔ
ታልባ ቡጻ ኤካዳ፥
ኦሶ ዶሲዛ ባ ኩሼን ሱቃዉስ።
14 ኢዛ ዛልኣንቻታ ማርካቤ ማላ፤
ባ ካ ሃኮ ቢታፌ ኤሃዉስ።
15 ኢዛ ባ ሶ ኣሳስ
ቁማ ካናሲኔ
ባ ማጫ ኣይሌታስ
ኦሶ ሻካ ኢማናስ፥
ሳኣይ ቡሮ ዎንታና ጊሺን
ዴንዳዉስ።
16 ኢዛ ባርካ ቆፓዳ
ጎሻ ጋዴ ሻማዉስ፤
ባ ዴሚዳ ሚሻን
ዎይኔ ቶካዉስ።
17 ኢዛ ሚናዳ ባ ኦሶ ፖላዉስ፤
ኢዚ ቄሴቲካ ኦሶስ ሚኖ።
18 ኢዛ ባ ኦሶስ
ዎይ ዲዛይሳ ኣኬካዉስ፤
ኦማርሲካ ኢዚ ጾምፔይ ቶኤና።
19 ኢዛ ባ ሊቃቃን ሱቃዉስ፥
ባ ኣፋላ ዳዳዉስ።
20 ኢዛ ሂዬሳታስ ባ ኩሼ ሚጫዉስ፤
ሜቶታንቻታስ
ኪያቴ ኢማዉስ።
21 ኢዚ ሶ ኣሳይ ኡባይ
ሆኢዛ ማይኦ ማይኢዳ፤
ሄሳ ጊሻስ ኢዛ
ሻቺ ቡኪኮካ ሂርጉኩ።
22 ሂን ኦንጊዛ
ማይኦ ኦዉስ፤
ላይኖኔ ኦቻ ቴራ ሚሳቲዛ
ማይኦ ማይኣዉስ።
23 ዴሬ ጪማቲ ዱቡሻ ሺቂዛሶን
ኢዚ ኬ ኣዋይ
ቦንቼቲዳ ኣሳ።
24 ላይኖፔ ሴሎ ማይኦታ
ኦዳ ባይዛዉስ፤
ዛልኣንቻታስካ ዳንጮ
ዳዳ ሺሻዉስ።
25 ኢዛ ሚኖኔ ፑላራ ዲዛ ማጫሳ፤
ኢዛ ዪዛ ላይታ
ኡፋይሳን ሞካዉስ።
26 ኣ ኤራን ኢዛ ሃሳያዉስ፤
ኢዚ ኢንጻርሳፌ
ሱሬ ዞሬይ ኬኤስ።
27 ኢዛ ባ ሶ ኣሳ ሃኖ
ሎኤ ካላዉስ፤
ኣዛላ ሃኖይ ኢዚ ቦላን
ቤቲ ኤሬና።
28 ኢዚ ናይቲ ኢዞ፥
«ኣንጄቲዳሬ» ጌቴስ፤
ኢዚ ኬ ኣዋይካ
ኢዞ ጋላቲሼ፥
29 «ሎኦ ሚሽ ኦዳ
ዳሮ ማጫሳቲ ዴቴስ፤
ጊዶ ኣቲን ኔኒ ኢስታ
ኡባፌ ኣሳ» ጌስ።
30 ማላ ሎኦይ ባሌስ፤
ፑላይካ ቆኬስ፤
ጊዶ ኣቲን ጎዳስ ያዪዛ
ማጫሲ ኢዛ ኣንጄቲዳሮ።
31 ኢዚስ ቤሲዛ ኢሞታ ኢሚቴ፤
ኢዛ ኦዳ ኦሶይ ኡባይ
ዱቡሻን ኢዞ ጋላቲሶ።