1 ሲዪቴ! ኣ ኤራቴያ ባ ቃላ

ዶቁ ሂስታ ጼይጌኬ?

ኣኬካይካ ባ ጬንጉርሳ

ቁ ሂስታ ሲሴኬ?

2 ኦጌ ዶናን ዴኢዛ

ዙምቡላታ ቦላኔ

ዳጋላ ኦጌታን ኤቃዉስ።

3 ጊምቤዛ ላንቄን ካታማታ

ጌሊዛ ፔንጌን ኤቃዳ

ባ ቃላ ቁ ሂስታዳ፥✝

4 ሃይቶ ኣሳቶ!

ታኒ ኢንቴና ጼይጋይስ፤

ታኒ ኣሳ ዜሬ ኡባ ጼይጋይስ።

5 ኢንቴኖ ኣኬካይ ፓጪዳይቶ!

ዎዚናማ ጊዲቴ፤

ኢንቴኖ ኤያቶ ኣኬካ ዴሚቴ።

6 ታኒ ጎኢዛ ሚሽ

ዮቲዛ ጊሻስ ኤዝጊቴ፤

ታ ዶናፔ ሱሬ ዮኦይ ኬዜስ።

7 ታ ዶናይ ቱማ ሃሳዬስ፤

ታ ሜቴርሻቲካ

ኢታ ሚሽ ኢጼቴስ።

8 ታ ዶናፔ ኬዚዛ ቃላቲ

ኡባይ ቱማ፤

ጌላ ዎይኮ ቦካ ጊዴቴና።

9 ኣኬካይ ዲዛ ኣሳስ

ታ ሃሳያይ ሊኬ፤

ኤራቴ ዲዛይታስ

ታ ሃሳያን ዎርዶይ ዴና።

10 ቢራፔ ኣዲ ታ ዞሬ ኤኪቴ፤

ሙሩታ ዎርቃፌ ኣዲ

ኤራቴ ዶሪቴ።

11 ኣይስ ጊኮ፥ «ታኒ ኣ ኤራቴ

ዞኦ ኢንቁፌካ ኬሃ ኣልኣይስ፤

ኔኒ ኣሞቲዛ ሚሽ ኡባይካ

ታናራ ጊናታናስ ዳንዳዬና።

12 ታኒ ኣ ኤራቴ

ኣኬካራ ዳይስ፤

ኤራቴኔ ዎዚናማቴ

ታ ሚሻታ።

13 ጎዳስ ያሻቴ ኢታ ኢጾ፤

ታኒ ኦቶሮኔ ሃላጫ፥

ሜንጼ ኢታቴኔ

ጌላ ሃሳያ ኢጻይስ።

14 ዞሬይኔ ሎኦ ፒርዳይ ታይታ፤

ታስ ኣኬካይኔ ዎልቃይ ዴስ።

15 ካዎቲ ታናን ካዎቴቴስ፤

ዴሬ ኣይሲዛይቲ

ሱሬ ዎጋ ኬሴቴስ።

16 ዳናቲ ታኒ ማዲን

ዴራ ኣይሴቴስ፤

ዴራ ሃሪዛ ጊታ ኣሳቲ

ኡባይ ሃሬቴስ።

17 ታና ሲቂዛይታ ታኒ ሲቃይስ፤

ሚኒ ኮይዛይቲ ታና ዴማና።

18 ዱሬቴኔ ቦንቾይ

ታ ማታን ዴቴስ፤

ዉሮንታ ኣቆታይኔ

ኢንጄይ ታ ማታና።

19 ኢንቴ ታፔ ዴሚዛ ጎኣይ

ሙሩታ ዎርቃፌ ኣስ፤

ታ ኢሞታይካ

ሴሪሲ ኬሲዳ ቢራፔ ዳሬስ።

20 ታኒ ጺሎቴ ኦጌን ሄሜታይስ፤

ሱሬ ፒርዳ ካላይስ።

21 ታና ሲቂዛይታስ

ታኒ ዱሬቴ ኢማና፤

ኢስታ ሚንጃ ኬካ

ታኒ ኩንና።

22 «ጎዳይ ታና ባ ኦሶ ኡባፌ

ኮይሮ ሜዴስ፤

ቤኒፔካ ኢዛ ኦሳስ

ኮይሮይ ታና።✝

23 ሳሎይኔ ሳኣይ

ሜታናፔ ካሴ

ቤኒ ሜርናሶፌ ታኒ ሹሜታዲስ።

24 ዎጋ ጊታ ኣባቲ ባይንዳ ዎዴ፥

ሃ ፑልቶቲ ቃናፔ ካሴ

ታኒ ዬሌታዲስ።

25 ዙማቲኔ ዙምቡላቲ

ሜታናፔ

ካሴ ታኒ ዬሌታዲስ።

26 ጎዳይ ሳኣኔ

ሳኣ ቦላ ዲዛ ዴምባታ

ዎይኮ ኣላሜ ቦላ ዲዛ ጉዱላታ

ሜናፔ ካሴ ታኒ ዬሌታዲስ።

27 ጎዳይ ሳሎታ ሚጪዳ ዎዴኔ

ጊታ ኣባታፔ ቦላራ

ሳሎ ጉፋን ጊግሲዳ ዎዴ

ታኒ ሄን ዴኣይስ።

28 ጎዳይ ሻራታ ቦላን

ዎዳ ዎዴ፥

ጊታ ኣባ ፑልቶታ

ሲዳ ዎዴ፥

29 ኣባ ሃቲ

ባንታስ ኢሜቲዳ ዛዋፔ

ፒኒዲ ኣንታ ማላ

ዛዋ ዎዳ ዎዴ፥

ሳኣስ ዮች ዬጊዳ ዎዴ፥

30 ሄ ዎዴ ታኒ ኢዛ ማታን

ዋና ኦሳንቻ፤

ኡባ ጋላስ ታኒ

ኡፋይሳን ኩማይስ፤

ታኒካ ኢዛ ሲንን ኡፋዬታይስ።

31 ኢዛስ ጊዲዳ ኣላሜ ኡባን

ታ ኡፋዬታይስ፤

ኣሳ ናይታንካ ታ ኡፋዬታይስ።

32 «ሃኢካ ታ ናይቶ!

ታኒ ጊዛይሳ ኤዝጊቴ፤

ታ ኦጌ ናጊዛይቲ ኣንጄቲዳይታ።

33 ታ ቲሚርቴ ሲዪቴ፤

ኣ ኤራንቻታ ጊዲቴ፤

ዉዳ ዮፒቴ።

34 ታኒ ዮቲዛይሳ ሲዪዛ ኣሲ፥

ሃች ሃች ታ ፔንጌን ቤቲዛ ኣሲ፥

ታሶ ጌሊዛሶንካ

ናጊዛ ኣሲ ኣንጄቲዳዴ።

35 ታና ዴሚዳይ ዴኦ ዴሜስ፤

ጎዳፔ ኢዚ ሳባ ዴሜስ።

36 ጊዶ ኣቲን ታና

ዴሞንታ ኣጊዳ ኣሲ

ባና ቆሄስ፤

ታና ኢጺዛ ኡባቲ

ሃይቆ ሲቄቴስ» ጋዱስ።