1 O wange moiku de o Farisika ma nyawa o bolu moi de o guru agama yamuruo naga o Yerusalemka yahino o Yesuska. Ona wisano Unaka, 2 <<Ḋadoohaso Ani muri-muri yatilaku to ngone nanga ete de nanga topora manga jojoho. Ce! Ona ioḋo de manga gia yatiodowa.>>

3 La Una wotemoli onaka, <<Igogou, ngini o Gikimoi Awi bobita nitilaku ma ngale nisilaku to ngini nia adati de nia galepu masirete. 4 O Gikimoi Awi bobita ma demo gena, <Niahoromati to ngini nia baba de nia awa,> de lo <Nagoona manga awa de manga baba la yatemo ḋatorou, ona magena manga fanggali bilasu yatooma.> 5,6 Duma ngini niasidoto o nyawaka: Ngone nanga baba de nanga awa upa he pahoromati de pariwo, hitilahi nanga dodihimoka potemo, <Ai baba de ai awa, ngaroko o pipi ngohi bilasu tinihike nginika, magena ka to ngohi ai suba o Gikimoika.> Ma ngale de to ngini nia dodoto masirete aku ngini gena niacoho nia adati de nia galepu, duma o Gikimoi Awi demo de Awi bobita ngini niapalako de nisidoohawa. 7 Igogou, ngini manena nikokulai! So itero maro ma nabi Yesaya wotemo iḋomaka de wosilefoka ma ngale ngini manena 8 o Gikimoi wotemo komanena,

<O bi nyawa ona magena ihoromati Ngohi,

duma ka cawali manga uru ma kahika,

so manga siningaka gena ihiwa.

9 Ma faida ihiwa ona isuba Ngohika,

sababu ka to nyawa manga adati de manga galepu gena yadoto,

itemo magena koloko to Ngohi Ai bobita!> >>

10 La o Yesus waaso kali o nyawa yadadala magena, de wotemo onaka, <<Hika niise, la ngini asa niasahe de nianako. 11 O ino kia ngone paoḋo la iwosa nanga uruko, gena akuwa inasitorou bai! Cawali o kia nanga uruno isusupu magena inasitorou o Gikimoi Awi simaka.>>

12 Ḋabolo de o Yesus Awi muri-muri yahino de yotemo Unaka, <<Idodooha Ngona nanako o bi Farisika ma nyawa ma ngale yoise notemo komagena, so ona manga sininga asa ikurangi.>>

13,14 Una wotemo, <<Ḋohaka o Farisika ma nyawa gena! Sababu o kia naga idadato la kanaga Ai Baba o sorogaka Awi dato ḋasowo, moi-moi magena ḋangodu igogou done asa irapu. O Farisika ma nyawa ona magena imatero maro o nyawa ipipilo de imakutuda ipipilo, sababu ona yanakowa o ngeko itotiai ikahika o Gikimoika. So nakoso o nyawa moi wopipilo de watuda o nyawa ipipiloli, de igogou yasinoto asa itura o busuneku.>>

15 Kagena de o Petrus wotemo, <<Baba, tanu Ngona o ade-ade ma ngale magena nomisingangasu nositotiai ngomika.>>

16 So o Yesus wotemo onaka, <<Ce! So niiseka de ka niasahe waasi bai! 17 Ḋadoohaso ngini niasahewa, ena gena o kia naga iwosa nia pokoku so ma duuru de nisihoho so isupu kali. Magena upa nitemo inisitorou o Gikimoi Awi simaka. 18 Duma o kia bato nia siningano isusupu de nia uruno itemo, magena inisitorou o Gikimoi Awi simaka. 19 Sababu o nyawa manga rabano, ena gena, manga siningano asa o bi dorou moi-moi ibao so manga manara itotooma, isusundali, o nyafusu ma dorou yaaaka, itotosi, yatotodamato de o ronga ma dorou iaaka. 20 O bi dorou ḋangodu gena o nyawa ona magena yasitorou o Gikimoi Awi simaka. Duma nioḋo de nia gia niatiodowa gena, idadiwa o Gikimoi Awi simaka inisitorou.>> 21 Kagena de o Yesus wodongosa o riho magena.

So de o Yesus wotagi o doku Tirus de lo o doku Sidon ma sigilolika. 22 De kanaga o ngopeḋeka moi muna magena o Kanaan ma daerano, so ngaroko o Yahudika ma nyawa misowo. Muna magena mahika Unaka, de momatoore, <<Ya Jou, o Daud awi ngopa de awi dano moiku, kodo! Noigalusiri ngohi. To ngohi ai ngopa moi o toka mingosa so mitogosaka.>>

23 Una he womisangowa. So Awi muri-muri gena yahino Unano de yotemo, <<Baba, tanu nomisulo o ngopeḋeka magena motagika, sababu mototuuru nanga duduno de momatotoore.>>

24 So Una wotemo o ngopeḋeka muna magenaka, <<Ngohi isisulo ma ngale ka o Israel awi ngopa de awi danoka, igogou ona magena o Gikimoi Awi dupa yamote kawa, maro o bi duba isisisa.>>

25 Kagena de muna mahino de Awi simaka mobukuku de ami suba matide, de motemo, <<Jou, kodo, noiriwo.>>

26 Una wotemo, <<Bilasu ngona notamaha la o bi ngopa o ino pahike iḋoma, la ioḋo de yapunuka. Sababu ḋalohawa o bi ngopa ma ino de paḋehe so o kasoka pongike.>>

27 De muna magena mosango motemo, <<Kodo, Baba! O bi kaso o meja ma litimika lo yodamaha o ino ma reremo, la nako itura, de o kaso magena lo aku yaoḋo.>>

28 De Una womitemo, <<We! Igogou, ani piricaya ḋaputuru. Mahasi la asa idadi maro o kia ngona nodudupa.>> De o orasi magena bato igogou ami ngopa magena ami toka imahoika.

29 Ḋabolo de o Yesus womajobo wotowongi o Galilea ma Talaga ma dateka. Kagena wahika, de Una wodola o pido moi ma ḋokuye, so wogogeku. 30 O nyawa yadala icarawa yahino Unaka, o nyawa ibipopanyake lo yatotota Unaka, kanaga manga ḋohu isosoneka, ibipipilo, ibilulugu, de ibimomou de lo ma binukasi o panyake ma somoa. O bi nyawa ibipopanyake gena yasiidusa to Una Awi simaka de Una ona wasiloha. 31 Pei! Ona yadadala gena yohairani yakelelo o nyawa yadala de Una wasilohaka: o nyawa ibimomou lo aku ibicaraka, o nyawa ibilulugu lo aku itagika, o nyawa manga ḋohu isosoneka lo aku yotagi itiaika, o nyawa ibipipilo lo aku imasigeleloka. Komagena so o Gikimoi o Israelka ma nyawa wisusuba Una ona magena iwisigiliri.

32 Ḋabolo de o Yesus Awi muri-muri waaso de wotemo onaka, <<Kodo! Ngohi tasayangi o nyawa yadadala ona manena. Kanaga he o wange saange ḋabolo ona dede Ngohi, de o orasi manena ona manga maru ihiwaka. Ngohi todupawa tosulo ona iliho de manga poko ma raba ihiwa, done ona yalumo-lumo so o ngeko ma soaka de iruba.>>

33 Una Awi muri-muri isango itemo, <<Baba, o riho manena imatinga-tingano. De o ino kiano pamake la o nyawa yangodu manena pasioḋo.>>

34 De Una wosano onaka, <<Kanena naga ngini ningodu de nia maru?>>

De Awi muri-muri itemo, <<Manena naga ka o roti ngai tumudingi de lo o nao ibiuuḋu ngai muruo naga.>>

35 Kagena de Una wasulo o nyawa yadadala magena, yangodu o tonaka imagogeku. 36 De o roti ngai tumudingi magena de lo o bi nao magena waḋehe so Awi sukuru watide o Gikimoiye. Ḋabolo de watepi-tepi de to Una Awi gia, so wahike Awi muri-murika la ona isitoku o nyawa yadadala magenaka. So Awi muri-muri ona yaaka maro o kia Una wasulo. 37,38 Kagena de o nyawa ona magena yaoḋo sidago yangodu yapunuka, gena yanau manga dala nagala yacala iha, o ngopeḋeka de o ngopa gena yaeto waasi. Ḋabolo Awi muri-muri wasulo so o ino ma soohu yatolomu so yamake sidago o karaja tumudingi lo iwedo. 39 Ḋabolo de Una wasulo so o nyawa yadadala magena moi-moi iliho manga dokuka. So Una de Awi muri-muri gila-gila o deruku ipane so imajobo itagi o Magadan ma tonaka.