1 O Yesus o talaka de wouti de o nyawa yadala icarawa Una iwisiduuruno. 2 Una iwisiduuruno, de imatodoka o nyawa moi wipapado wakahika Unaka. De wobukuku wosuba, de wotemo, <<Baba, nako nomode, de igogou aku noisiloha.>>

3 Magena de o Yesus Awi gia watoa de una magena, ngaroko wipapado, duma awi roheka wapaḋa de wotemo, <<Ngohi tomode, so nilohaka bato.>> So o orasi magena ḋabolo de una wilohaka so he wipado kawa. 4 Magena de o Yesus wotemo, <<Ngona bilasu nosininga, upa sidago nodedemo o nyawaka. Cawali nogila-gila o imamka la ani rohe yatailako. So naaka maro o Musa awi bobita wotetemoka, de ani gaso natota o Gikimoika, maro o sinako moi o bi nyawaka igogou ngona nilohaka.>>

5 Ḋabolo de o Yesus womasidiado o Kapernaum ma dokuka, de o Roma manga kapita moi wahino so wibaja, de wogolo Unaka 6 wotemo, <<Baba, ngohi ai leleani moi kadoka ai tahuka wopanyake. Una wolugaka so ka woidusa, de waakuwa wotagi so foloisi wisiri.>>

7 Magena de o Yesus wotemo, <<Ngohi asa totagi towisiloha.>>

8 Ma kapita gena wosango, <<Baba, ngaroko upa bai! Ngohi manena o Yahudika ma nyawa isowo, de Ani simaka gena o kia lo waali idahe so idadiwa ai tahuka toningaho. Nakoso ḋaloha, tanu hitilahi Ngona nopareta ka o demo o dola moi de ai leleani gena asa wilohaka. 9 Sababu ngohi lo tamote ai bobareta manga pareta, de kiaka kanaga ai prajurit-prajurit lo ai pareta lo yamoteka. Nako ngohi tosulo o prajurit moika, <Notagi!> de igogou una wotagi. Nako ngohi tosulo ai prajurit ma somoaka, <Nahino nonena!> de igogou una wahino. De lo nako ngohi tosulo ai gilalo woleleleanika, <Naaka manena!> de igogou una waaka. So komagena lo Ngona, Baba, so upa he ai tahuka notagi. Cawali Ani demo o dola moi kanena nodedemo, de igogou kadoka ai tahuka asa isiganapu.>>

10 Kagena de o Yesus ma kapita awi demo gena woise, de Una wohairani icarawa. Komagena so watemo o bi nyawa iwimomoteka, <<Awalele! Nginika tinisingangasu igogou, o bi Yahudika ma nyawa kagena o Israel awi ngopa de awi dano manga sidongirabaka, maro o nyawa una manena awi piricaya ma lamo komanena, gena o nyawa moi lo tamake waasi. 11 So Ngohi tinisingangasu ma ngale ngini aku nianako gena, done o orasi ma simaka o Gikimoi asa wodadi wokolano, de yadala o bi Yahudika ma nyawa yasowo ona magena asa yodadi Awi nyawa to Una Awi pareta ma rabaka. Ona magena manga sihino o wange ma siwano de lo o wange ma dumuno, de ona asa imatamiye irarame dede o Abraham, o Ishak, de lo o Yakub, ona gena o Yahudika manga ete de manga topora iḋoḋomaka. 12 Igogou, bilasu o bi Yahudika ma nyawa asa idadi o Gikimoi Awi nyawa la Awi pareta ma rabaka iwosa. Duma yadala asa yasidoperesu ma duduka de yaumo o bubutu ma rabaka eko o naraka, kiaka ona asa yoari de lo yasangisara.>> 13 Ḋabolo de ma kapitaka o Yesus wotemo, <<Notagi noliho bato! Sababu maro o kia ngona nopipiricaya magena asa igogou idadi.>> De o orasi magena bato awi leleani gena wilohaka.

14 O Yesus wotagi o Petrus awi tahuka. Kagena o Petrus ma toroa womimake, muna magena misiri de o sosahu mitubu. 15 Kagena de o Yesus ami giaka wapaḋa so milohaka. Gila-gila miputuruka, so muna aku Una mowileleani.

16 Ma orasi he ḋaputu de o nyawa yadala yabisisiri de yabikokitoka yatotota Unaka. De o Yesus yasisiri wasilohaka de yakokitoka manga toka wodusu so imahoika. 17 Komagena waaka sidago idadi de isiganapu o kia maro iḋomaka o Gikimoi Awi demo ma nabi Yesaya wosilefo ḋaboloka, ena gena,

<<Una magena bato nanga sangisara wamoku

de lo nanga panyake wosiloha.>>

18 Ma moika o talaga Galilea ma dateka, de o nyawa yadadala o Yesus iwisigilolino, so Una Awi muri-muri wasigaro, <<Hino la ngone pomasisihito o talaga ma sonongaka.>> 19 Kagena de o guru agama moi wahino Unano, de wotemo, <<Baba Guru, ngohi todupa kekiaka bato notagi Ngona tonimote bai!>>

20 Duma o Yesus wosango wotemo, <<O boulamo o pongaka de ma aru de lo o namo de ma igu, duma Ngohi o Nyawa ma Duhutu Ai ngihi ihiwa la ma ngale tomasidodogu.>>

21 Ḋabolo de kanaga Awi nyawa wimomote ma somoa moili wotemo Unaka, <<Baba, tanu noisimaha toliho kasi ma ngale ai baba wosone so towipoosu kasi, de ngohi asa Ngona tonimote.>>

22 Duma o Yesus wosangoli de ka woade-ade wotemo, <<Noimote Ngohi bai! Ḋohaka, la o nyawa isosoneka ona masirete manga dodiao isosone gena asa yapoosu.>>

23 So o Yesus Awi muri-muri wasigaro imasisihito o talaga ma sonongaka, kagena de ona yopane o deruku de imajobo yoside kadoka o talaga ma sonongaka. 24 So asa yahika o talaga ma dongirabaka, de imatodoka o paro de o rato ḋasosihilo imasidiado so manga deruku o ake yobane sidago manga deru he ikiloro. Kagena de Awi muri-muri ihawateri duma Una womaidu so wikioloka. 25 So yotagi iwisimomi de ona imasigaso, <<Ya Baba, nomiriwo! Done ngone inasigiloro!>>

26 So Una womomi de wotemo onaka, <<Ngini niamodo ilamo! He! To ngini nia piricaya ka ma cunu.>> Magena de Una womaokoye so wotemo o paro de o moku-mokuka, <<Niogo!>> De gila-gila o talaga magena irihika.

27 Komagena so Awi muri-muri yohairani de yotemo, <<Wewe! O nyawa Una manena paramoi bai! O bi moi-moi ḋangodu sidago lo o paro de o moku-moku lo ka wisigise.>>

28 O Yesus de Awi muri-muri o Galilea ma talaga ma dongirabaka de yakahisa o talaga ma sonongaka so imasidiado o Garada ma daeraka. Kagena de Una o deruku wouti de imakamake o nyawa yakokitoka yasinoto yotagi yokahoko o sone ma diaruno yosupu. Ona manga dogosa foloi sidago moiwa yobarani nogena yakahino. 29 Kagena de manga toka imatoore de itemo, <<He! O Gikimoi ma Ngopa, nomidooha ngomika! Migolo, kodo, upa nomisangisara! Ma orasi gena yaado waasi.>>

30 O orasi magena de o titi idadala kadoke naga itagi o ino imasari. 31 De ma bi toka imagolo Unaka, <<Nako Ngona nodupa nomisisupu, de o titika nomidusulo la asa miwosa o titika.>>

32 Magena de wotemo, <<Nitagi bato!>> So o toka magena isupu o nyawano, de yadongosaka de yowosa o titika. Imatodoka de o titi ma duduo magena iloḋa de kugena o dirasuku itura, so ḋangodu o talagaku ḋalutu de isoneka.

33 Imaaka komagena, de o titi yasosowohi gena yoloḋa de itagi o dokuka, kanaga o bi moi-moi idadadi o bi titika de lo o nyawa yasinoto yakokitoka ḋangodu magena isihabari. 34 Komagena so gila-gila o nyawa o dokuka magena yangodu yahino de o Yesus imakamake. Ona magena iwikelelo de yamodo so Una iwisulo, Una wosupu manga daerano.