1 O orasi magena o Yesus kanagasi o Galilea ma tonaka wogoge so he o taungu muruo naga ipasaka, kagena de o Yohanes una o bi nyawa waoosi magena wahino de o Yudea ma tona ibobeleuka wogoge womatingaka.

2-5 So awi ino gena ka o galasosoko de o hopu ifofufuru ma madu, de awi baju lo ka o unta ma gogo, de awi doi ma bobiliku lo ka o haiwani ma kahi. Kanaga o Yerusalemno ma bi nyawa, o Yudea ma bi doku de ma bi kotano ma nyawa, de o Yordan ma Selera ma sigilolino ma bi doku-dokuno ma nyawa gena he yangodu o tona ibobeleuka yahino o Yohanes Wooosika. So kagena o nyawa yadadala manga simaka de una wadoto de wasingangasu, de womatoore wotemo, <<He! Ngini bilasu nimatoba de nimatoduba la nia dorou niodongosa, sababu ma orasi he imasidiado ma ngale o Gikimoi asa wopareta maro o kolano moi.>> O Yohanes gena una manena ḋabolo maro o kia iḋomaka o Jou Awi demo ma nabi Yesaya wosilelefo ḋaboloka, ena gena,

<<Kanaga o nyawa moi o tona ibobeleuka womatotoore,

<He! Ma ngale nanga Jou Awi hino gena ngini nimasidailako.

La o ngeko gena bilasu nisibolowo de nisitiai.> >>

6 O riho magenaka o nyawa yadala yoise de yamote o Yohanes awi dodoto so to ona manga dorou imamangaku o Gikimoi Awi simaka, ḋabolo de asa o Yohanes waosi o Yordan ma Seleraka.

7 So kanaga lo o Farisika ma nyawa de o Sadukika ma nyawa lo yahino ma ngale ona lo yaosi. Duma ma orasi o Yohanes wakelelo ona yahino de una wotemo onaka, <<Icala! Ngini manena o nyawa nikokulai, maro o ngihia gena o nyawaka yagoli. Ngini nia fikiri gena ka cawali tiniosi so aku niloḋa o Gikimoi Awi doosa ma sangisarano, duma nia fikiri maro magegena isala. 8 Hika nia sopo nisimane kasi, imatero de nia dorou ḋangodu niapalako, la aku tinipiricaya igogou ngini gena nimatoba de nimatodubaka. 9 De upa lo nia sininga ma rabaka niatagapi de nitemo, <Igogou, ngomi manena o Abraham awi ngopa de awi danoku so mia dorou ma fanggali gena miamakewa.> Komagenawa. Ngohi totemo nginika, igogou de o bi teto-teto manena bato o Gikimoi gena aku waaka o Abraham awi ngopa de awi dano so ḋadoohawa. Nakoso ngini nimatoba de nimatodubawa gena, bilasu Una asa winifanggali de o dorou. 10 O orasi manena naga o Gikimoi wosidailako ḋaboloka, la o nyawa nagoona imatoba de imatodubawa, ona magena asa wasisangisara de o narakaku waumo. Gena maro o bi basu kanaga isidailako de ihadoku o gota ma hutu ma golaka eko ma ngutuka, so o bi gota la ma sopo ḋatotorou gena igogou done asa yatoḋa de yaumo o uku isosora-sora ma rabaku.

11 So ngohi manena gena ngini o nyawa tiniosi de o ake la idadi maro o nonako moi gena, igogou ngini nimatoba de nimatodubaka, duma ma orasika kanaga wimoi asa wahino wotuuruno, gena Una Awi manara foloi ilamo, so ngohi manena to Una Awi simaka gena o kia lo waali idahe, ka Awi capato taaho maro o nyawa wileleleani moi lo idadiwa. De ngini la kanaga nimatoba de nimatodubaka, Una magena asa wosingosa o Gurumi Ḋatetebi ma kuasa de o uku la nia sininga ma rabaka wopareta.* 12 O Gikimoi wosidailako la o bi nyawa yangodu wafanggali. O nyawa de manga sininga itotiai ona magena wangaho o sorogaka, duma o nyawa ma dorou ona magena wasisangisara ka sidutu ikakali. Maro wotototoro moi awi giaka kanaga de awi tatapaka. Wosidailako ma ngale o tamo ḋangodu wataḋo sidago ḋatebi. O tamo ḋalalake gena asa watolomu de o polaka wadiahi, duma ma soora gena asa watupu so waumo o uku isosora-soraku de lo itatatu-tatu kawa.>>

13 O orasi magena ḋabolo de o Yesus o Galilea ma tonaka de wotagi o Yohaneska o Yordan ma Seleraka. So o Yesus wogolo la Una lo aku wiosi. 14 Duma o Yohanes asa woholu so wotemo, <<Idadiwa, Baba! Bilasu Ngona de asa aku ngohi noiosi. De ḋadoohaso Ngona nahino ngohino. Komagenawa, bilasu ngohi tahika Ngonaka.>>

15 Ma ngale komagena, so o Yesus wosango unaka wotemo, <<Ḋohaka, la o moi-moi magegena idadi, sababu ngone bilasu pamote komagena la o Gikimoi Awi dupa paaka patotiai.>> Ḋabolo de o Yohanes gena wisimote so o Yesus iwiosika.

16 Ma orasi o Yesus wiosi ḋabolo so o Yordan ma Seleraye asa ka wodolaye, de imatodoka o dipa ipelenga de yakelelo o Gikimoi Awi Gurumi iuti imatero maro o namo dara de itangi Unaku. 17 Ato itangi de o ili moi yoise o sorogaku itemo, <<Una manena to Ngohi Ai Ngopa towidododara. De Una magena Ngohi towidupa.>>