Mateus 18

Nako nanga dodiao ipipiricaya

o dorou yaaka ngoneka

15 <<Ngohi todoto nginika, nako ngini o nyawa moi kanaga de ani dodiao wopipiricaya moi o dorou waaka ngonaka, de notagi bato unaka de ngini ka nisinoto nimatingaka, de awi sala nosidumu la nowisitiai. De nakoso ani demo wamote de waḋehe, aku nia rimoi gena ḋaloha kali. 16 Duma nako waḋehe woholu, hika womatengo eko yasinotosi nangaho la unaka niwidemo. Sababu o Gikimoi Awi Jaji ma Buku ma rabaka iḋomaka isilelefo itemo, <Nakoso o nyawa moi kanaga wikalaki, de bilasu kanaga o saksi yasinoto eko yaruwange isingangasu la ma ngale o galaki unaka gena yaaku isinako itiai.> 17 De nakoso ona manga demo gena wamotewa de waḋehewa, ma ngale una gena nisingangasu o dodiao ipipiricaya manga dolomu yangoduka. De lo nakoso o dodiao ipipiricaya yangodu lo manga demo gena una wamotewa de waḋehewa, bilasu niwisidapano de ka niwiḋohaka, ngini niwisieto una ka o nyawa o Gikimoi wipipiricayawa de lo maro o balastengi itotolomu de o nyawa ma dorou ma binukali.>>

18 <<Ngini tinisingangasu igogou, o kia ngini o dunia ma ḋokuka nisitatapuka, imatero de o sorogaka lo o Gikimoi wositatapu iḋomaka. De lo o kia o dunia ma ḋokuka niatemo isimahaka, imatero de o sorogaka lo o Gikimoi wotemo isimaha iḋomaka. 19 De lo ngini tinisingangasu igogouli, nako ngini nia sidongirabaka nisinoto bato o kia o dunia manenaka nimafakati de nigolo o Gikimoika, Ai Baba o sorogaka, gena ma ngale nia gogolo igogou Una asa womanara. 20 Sababu o nyawa nakoso kekiaka bato ma ngale Ngohi so imatolomu, ngaroko ka yasinoto eko yaruwange gena, Ngohi kanaga dede onaka.>>